1 Samuele 11 - Bibilia Buk na Ŋun nagon koti luŋu a

Saula a te ’ya ŋutu ti Amon

¹ A ko gwe sona, a Nakasa ŋuto A lo Amon iti i tumba na Yabesa-gilada; a ŋutu liŋ ti Yabesa kulyani ko Nakasa adi, Teteŋdi tomoret koyi, a yi de kitakiŋdye do.

² Ama a Nakasa ŋuto lo Amon kulyani ko se adi, Ko ŋina kwe nan de bubulö teteŋdya tomoret ko ta, kweja adi nan de wuludun konyen kasu liŋ ti lutaten kaŋo, anyen tiŋdu yu na kwe i Yisaraele ’bukuluŋ.

³ A temejik ti Yabesa kulyani ko lepeŋ adi, Kölöki yi perok buryo anyen yi bubulö sonyoddu ŋutu i kak liŋ na Yisaraele. A kirut ko lele ŋuto ’bayin logon lwo-ggu yi, a yi mo pakiŋdye ’borik a kulok.

⁴ A nagon ŋutu lo sonyo kulo aje ’durökin Gibea na gwoŋdi Saula nu, a se nyonyoggi kine kulya a ŋutu yiyiŋga; a ŋutu liŋ gwine gwien parik.

⁵ Nyena mete, a Saula gwe i poŋdya i melesen kipuŋdyo öwönin murek logon jiggo kurit lo kak. A Saula pije adi, A kilo ŋutu gwi ko nyo? A se nyonyo-kokiŋdye lepeŋ kulyaesi ti ŋutu ti Yabesa.

⁶ A Mulökötyo lo MATAT ’duki ko Saula ko riŋit a duma na yiŋge nye kilo kulyaesi nu, a woran nanyit poŋdi pape parik.

⁷ A lepeŋ ’dumuŋdye öwönin murek a tutubbe tutubbo, a sonyoddi i kak liŋ na Yisaraele ko luyo-kie i könisi kulya adi, ŋuto logon ti kebbu Saula ko Samuele lo, öwönin kanyit mo konaki sona. A kujono na MATAT morgi ŋutu liŋ, a se lupuŋdye kaŋo i daŋ geleŋ.

⁸ A nye pepenuŋdye se Bejek, a ŋutu ti Yisaraele gwe gwoso aliŋan miajin musala, a ŋutu ti Yuda gwe gwoso aliŋan merya musala.

⁹ Ase kulyani ko luyökie lopete ’durkulo adi, Taki ta ŋutu ti Yabesa-gilada adi, ko ’bure i diŋit na tuparan a se de lwokoni lwoko. A luyökie kulo ko ’dure a takiŋdye ŋutu ti Yabesa, a se lyoŋi lyoŋon.

¹⁰ Nyenagon a ŋutu ti Yabesa kulyani ko Nakasa adi, De ko ’bure yi papakin ’borik a kulok, anyen do bubulö konakiŋdya yi ŋo nagon do a met adi a na ’but konut.

¹¹ A i ko ’bure a Saula tetenakiŋdye ŋutu i teŋon musala; a se poŋdi i kiden na mera na ŋutu ti Amon i diŋit tiyit na ko ’bure, a rembi se kak tojo ko tuparan; a se logon a pituŋdyö kulo torekine toreki, a ma ’di murek kase gwe a ko rye i pirit na geleŋ.

¹² A kirut ŋutu kulo pije Samuele adi, Ko ŋa lo kulya adi, Saula bubulö gwon a kasaranit likaŋ le? Taki ta yi kilo ŋutu anyen yi tatatu lepeŋat.

¹³ Ama a Saula kulyani adi, ŋuto lele ’bayin logon tatatua i lo lor, kogwon MATAT aje teteŋdya lwökit i Yisaraele i lo lor.

¹⁴ A Samuele kulyani ko ŋutu kulo adi, Po ta, ti yi iti Giligala, anyen ko nyö-nyoggu kulya ti tumatyan nyu.

¹⁵ a ŋutu iti Giligala, a se tiŋdi Saula a mor ko MATAT i komor Giligala yu. A se ’duŋge rubaŋgajin ti taliŋ ko MATAT i komor yu, a Saula ko ŋutu liŋ ti Yisaraele lyöŋi lyöŋön parik.