1 Petero 1 - Bibilia Buk na Ŋun nagon koti luŋu a

Romesi

¹ Nan Petero luyökie lo Yesu Kristo roman ko ta nutu ti ŋun logon aje tore aji, a mönuŋdye i Ponto, ko i Galatia, ko i Kapodokia, ko i Asia, ko i Bitunia kilo.

² Ta koju aje wulwe ko yeyeet na Ŋun Monye anyen tokela ko Mulokötyo lonyit, anyen twoju Yesu Kristo, ko anyen gwagwata ko rima kanyit. Nan roman ko ta adi, Ti ’busan ko taliŋ gwe ko ta bia parik.

Yenet nagon ti twan

³ Ti Ŋun Monye Matat likaŋ Yesu Kristo purani pura. Lepeŋ ko yatet nanyit duma a tiŋdu yi i yuŋwe a luduko kogwon nye a toniju Yesu Kristo i twan, anyen yi gwon ko yenet nagon ti twan.

⁴ Yenet nagon yi a yuŋweki kata na kweja adi yi mo wuju lomore. Ŋina lomore a ’delaki ta ki yu, a mo tine bulö ’buron, kode koro, kode toriŋö.

⁵ Nyena kogwon ta a yubbö Ŋun, a lepeŋ iŋge tiju ta ko riŋit nanyit tojo ko lwoko nasu. Ŋina lwökit mordu kweye kaŋo i diŋit na ’dutet.

⁶ Ko ŋina kwe lyöni ta lyöŋön, ma ’di soŋinana ta ŋoŋoŋga moriesi ka ’de ka ’de ko diŋit a na ’dit,

⁷ anyen yupesi kasu tetema kode a gwak. Dakap kakaŋu ma ’di nagon se a tema ko kimaŋ. Yubbo nasu ko a tema gwon ko ’bulit Iwolwöŋ dakap, a mojakiŋdye ta pupuresi, ko kwelen, se ko bula i lor lo kweyari Yesu Kristo lu.

⁸ Ta nyanyar lepeŋ ma ’di kodyo ta a ko met lepeŋ: ta yuyuŋ lepeŋ ma ’di ködyö ta a ko met lepeŋ, a ta lyoŋi lyoŋön ko lyöŋön a duma parik nagon kulya kanyit ti bulo jama, ama gwon ko bulet a duma nagon po ki,

⁹ a ta wuji lwökit na kodudwolön kasu nagon a tutupet na yubbö nasu.

¹⁰ Nebijin logon koju aje keju adi Ŋun mo ’dogga ta kilo aje ga ’yu nina lwökita iŋge piyuŋdya kulya kanyit ko tirikwet.

¹¹ Mulökotyo lo Kristo lo gwon kasu i mugunya lo a ’beron tuggo ŋoŋesi ti Kristo ko ŋo nakwekwelen nagon popo i mukok, a se mori denuŋdya kaŋo ko ŋilo Mulokotyo yutakin se ko kine ŋo gwon i nan diŋit, koti ko se po ada.

¹² A kweki lepeŋat adi ŋo nagon se a keju kune se ti kikin ’borik ama kikin ta ŋo na kiun se koju kunu soŋinana ŋutu lo jakiŋdya ta Loŋe Lo ’but i riŋit na Mulokotyo Loke logon a sunyue ki yu lo aje tukokin ta. Ma ’di malaikajin ’de ’dekan galuŋdya kine kulya kaŋo.

Gwe ta a loke i ŋo liŋ

¹³ Gwe ta ajo kasu i yeyeesi gwoso ŋuto lo kukunakiŋdya mugun i kita. Tiji ta ’borik. Tuŋ yeŋdi ta ’doket nagon Yesu Kristo mo jakin ta na poŋdi nye nu.

¹⁴ Gwe ta a ŋutu kayiŋak ti kulya, an ta ko gwolor ta gwosoi ’dekesi kasu ti ’beron nagon ta a ko nyuŋ den kulya nu.

¹⁵ Nye lo luŋgu ta lo a loke, nyena koti gwe ta a loke i ŋo liŋ.

¹⁶ Kogwon a wuro adi, Ta kodyo gwon a loke kogwon nan a loke.

¹⁷ Ko ta kwakwaddu nye logon ’duŋokiŋdyo ŋutu liŋ gwoso i konesi kase ’bak nyunyumbö lo, a ta ’diŋdye lepeŋ adi Baba, nyena kuŋge ta lepeŋ na mönuŋdye ta i na kak ni na.

¹⁸ Kogwon ta deden adi ŋo na ’bu ’burön gwoso podo kode dakap a ko dakuŋdya ta i gwiliŋit lo ’bak ’bulit logon ta a mirun ko merenyejin kasu, ama ta a dakwe ko rima ti Kristo nagon ko ’bulit a duma parik.

¹⁹ Kine rima gwoso ti kilolor logon ’bak yuyuket kode moriko.

²⁰ Lepeŋ a wulöki kine kulya a kokwe na gweya na kak, ko aje kweya i kulo perok ’dutesi kogwon kulya kasu.

²¹ Ta a yubbö Ŋun kogwon lepeŋ. Ŋun a toŋiju lepeŋ i twan a tiŋdi lepeŋ i bula, anyen ta yuyubbö a yeŋdi Ŋun.

²² Ta soŋinana aje toke ’ya ’börik i twöju nasu na kulya ’diri, a ta nyaŋi luŋasirik lo yubbö kilo ko tugwakan, nyena nyare ta nyar ’börik ko töilyet kasu liŋ.

²³ Ta aje yuŋwe a luduko. Yuŋwe nasu ti gwon a na na mugun nagon ’bu ’burön na, ama a na yeyeŋon. Ta aje yuŋwe kogwon kulyaet lo Ŋun logon gwon jörun lo ko yeyeŋon.

²⁴ Kogwon adi, Ŋutu liŋ gwon gwoso doru, a kwelen nase liŋ gwe gwoso koturon ti mu ’diŋ. Döru teteyon, a koturön ’do ’done kak;

²⁵ ama kulyaet lo Matat yeyeŋon ŋupi.Ŋilo kulyaet a Loŋe Lo ’but logon aje tokuki ta lo.