1 Moran 9 - Bibilia Buk na Ŋun nagon koti luŋu a

Ŋun a pukökin ko Solomona daŋ tomurek

¹ A ko gwe sona, i mukök nagon Solomona aje tutuŋgö ’duggö kadi na MATAT se ko kadi nanyit na mor ko kunie liŋ nagon nye a ’deggi ’duggö kunu,

² a MATAT puköki ko Solomona daŋ tomurek, gwoso na pukökiŋdye nye ko lepeŋ Gibeon nu.

³ A MATAT kulyani ko lepeŋ adi, Nan aje yiŋ kwakwasesi kunök, ko momolesi kunök nagon do aje wukin köyö i komor kune; nan aje geluŋdya kadi nagon do aje ’duk ŋina a nake, ko nan aje tiŋdu karin kwe nyu ŋupi; a konyen kwe ko töili lio mo gwe nyu i diŋitan liŋ.

⁴ Ama do ko mugun, ko do ködyö wörö köyö i komor ko töili ilot liŋ ko torigwo, gwoso na wöröri Dawidi monye ilot nu, i koŋdya na ŋo liŋ nagon nan a sarakin do kine, i ’debba na saresi kwe lo wurö, ko kulya na ’duŋ nan kune,

⁵ a nan mo togwo ’yi si ’daet na tumatyan inot go ko Yisaraele ŋerot ŋupi, gwoso nagon nan a milyekin monye ilot Dawidi adi, Do mo ti jaran ko ŋuto logon mo si ’daki i si ’daet na tumatyan na Yisaraele.

⁶ Ama ko ta kode ŋwajik kasu a giran i kepöddu na nan, a tine ’debba jujuwesi kwe kode saresi kwe lo wurö logon nan aje tin kasu ŋerot kulo, a ko ta a tu i kitakiŋdya na kulye ŋunyen a kwakwa-di se,

⁷ a nan mö ’duŋöddi ŋutu ti Yisaraele kaŋo i jur logon nan aje tin se lo; a nan mo tolikiŋdye ŋina kadi köyö i metet nagon nan aje gelakin karin kwe na; a ŋutu ti Yisaraele mo gwe a temet ko a tojowet i kiden na jurön liŋ.

⁸ Ama ma ’di nagon ŋina kadi a yeŋga ki sona, a ŋutu liŋ logon wöwö-röri kanyit nyona kulo mo söŋi söŋu a se mo piuŋge piugga, a pipije adi, Ko nyo nagon MATAT a konakin lo jur ko na kadi sona?

⁹ A kulye mo waddi adi, Lepeŋ a koŋdya sona kogwon se a kö ’yu MATAT Ŋun lose logon a joŋdya merenyejin kase kaŋo i jur lo Ejipeto lo, a ’depakiŋdye i kulye ŋunyen, a kwakwaddi se, a kitakiŋdye se; nyenagon ko ŋina kwe MATAT aje tiŋdu kine delyaesi liŋ kase loki.

Kunie konesi ti Solomona

¹⁰ A gwe sona i mukök na kiŋajin merya murek, i diŋit nagon Solomona gwon i ’duggö na kunu kadijik murek, ko kadi na MATAT ko kadi nanyit na mor nu,

¹¹ a mor Solomona tiŋdi Kiram köjinö merya murek i jur lo Galilaya, kogwon Kiram mor lo Turo aje tiŋdu Solomona kaden logon gwoso tika, ko kaden berosa ko dakaŋ gwoso temet na ’deket nanyit.

¹² Ama na pöri Kiram Turo nu i meddya na köjinö nagon Solomona a tin nye kunu, a se gwe ’bayin a na ’but kanyit i metet.

¹³ Nyena a nye pipije adi, Pon luŋaser lio, kine köjinö a nyo nagon do aje tin nan kine? A nye gweŋ se a jur lo Kabula, a kine gwe a karin kase tojo ko lo lor.

¹⁴ A Kiram ’beron aje sunyu-kiŋdyö mor dakaŋ nagon temuŋdya a talentajin mia geleŋ ko merya murek.

¹⁵ A ŋina gwe a kwe nagon mor Solomona momori ŋutu logon ri ’diki i kita anyen ’duggö kadi na MATAT, ko kadi nanyit, ko Milo, ko gorom nagon a mariŋ na Yerusalema, ko Kasor, ko Megido, ko Gejer.

¹⁶ (Kogwon Paro mor lo Ejipeto a tu a morgi Gejer, a iŋge ’yur ŋinu köji, ko a tatu ŋutu ti Kanana logon si ’da nyu kulu, a nye tiŋdi ŋuro nanyit nagon a narakwan na Solomona ŋinu pirit a ’doket;

¹⁷ a Solomona nyöggi ’duggö Gejer.) A mor köti ’duŋge Bete-koron na gwon i ’dir,

¹⁸ ko Balat, ko Tamar na gwon i yöbu kase i jur,

¹⁹ ko köjinö liŋ nagon a ti Solomona nagon a ’delesi ti tito, ko köjinö ti arabiajin kanyit lo jirikö, ko köjinö ti ŋutu kanyit kajoŋak ti kusanjin, ko kunie liŋ nagon Solomona ’de ’deggi ’duggö Yerusalema ko Libanon ko i tumatyan nanyit liŋ.

²⁰ A ŋutu liŋ logon a pitwe ti Amori, ko ti Kiti, ko ti Peŋi, ko ti Kiwi, ko ti Yebusi, logon a leŋe ŋutu ti Yisaraele,

²¹ logon nyakwatiat kase a pituŋdyö i ŋilu jur, logon ŋutu ti Yisaraele ti bulö tukaŋu asut, kilo a se logon Solomona a ri ’dikin ikitaa ’duŋi, asegwesona tojo kololor.

²² Ama a Solomona gwe a ko ri ’dikiŋdya lele lo ŋutu ti Yisaraele a ’duŋiet; a se lo gwe a kamörök, ko a köliŋönök kanyit, ko a kanyömök kanyit ti kamörök, ko a dumalak ti teŋon kanyit, ko a kasarak ti arabiajin kanyit lo jijikö, ko a kajoŋak ti kusanjin kanyit.

²³ A kilo gwe a kametak dumalak miajin mukanat ko merya mukanat logon meddya ŋutu kakitak lo koŋdya kita na Solomona.

²⁴ A nagon ŋuro na Paro aje wusaddu kaŋo i köji na Dawidi tojo ko kadi nanyit nagon Solomona a ’dukökin nye nu, a kirut Solomona ’duŋge Milo.

²⁵ Solomona yeŋ wukiŋdya rubaŋga-jin lo ’yu ’yura ’buluŋ ko rubaŋgajin ti taliŋ, daŋin musala i kiŋa, i loki na pirit ’yuret na rubaŋgajin nagon nye a ’dukökin MATAT nu, a nye ’yuŋe bökur ko MATAT i komor. A nye tutuŋge kadi na MATAT.

²⁶ A mor Solomona teteŋdi teŋ na ki ’bojin Esion-geber yu nagon gwon nyona ko Elot i kijit na Tör Nator, i jur lo Edom.

²⁷ A Kiram sonyoddi köliŋönök kanyit logon a ŋutu ti ki ’bojin logon a diniki wörö i tör na ’balaŋ anyen tu kase köliŋönök ti Solomona ko ŋina teŋ na ki ’bojin;

²⁸ a se iti tojo Opir, a joŋdi dakaŋ nyu nagon temu-ŋdya a talentajin miajin iŋwan ko merya murek; a se jakiŋdye mor Solomona kinu dakaŋ.