1 Moran 8 - Bibilia Buk na Ŋun nagon koti luŋu a

Solomona a tosi ’dakiŋdya saŋduk na tomoret I lukata na kadi na MATAT

¹ A mor Solomona momori ŋutu temejik ti Yisaraele kanyit i komor Yerusalema yu, se ko ŋutu ti kokwe liŋ ti kotumiton logon a kusik ti kötumitön ti merenyejin ti ŋutu ti Yisaraele. A nye momori se anyen dogga saŋduk na tomoret na MATAT na gwon i köji na Dawidi nagon a Siona.

² A ŋutu liŋ ti Yisaraele momori ko mor Solomona yu i rorwe i yapa Etanim, logon a yapa toburyo.

³ A ŋutu temejik liŋ ti Yisaraele iŋge po, a koanejin ’dukuŋdye nu saŋduk.

⁴ A se joŋdi nu saŋduk na MATAT, ko kemia torumet, ko toro ’bo liŋ loke lo gwon i ŋinu kemia; a koanejin se ko Lewijin yekuŋdye se.

⁵ A mor Solomona ko kurumi liŋ na Yisaraele, logon a momora kanyit i komor kulu iti ko lepeŋ i ŋerot na nu saŋduk, a se gwe i ’dupoddu na rubaŋgajin kase ti köbilu ko dwönin jore parik logon ti bulö kena kwöŋ.

⁶ A kulu koanejin joŋdi ŋinu saŋduk na tomoret na MATAT tojo ko pirit nanyit i toŋkwet na kadi na MATAT, na lupu a pirit nake na lurwan na totopuŋdya, a tiŋdi lepeŋ i mukök na köpukön ti kerubajin,

⁷ Kogwon köpukon ti kilu kerubajin a ririki i loki na pirit na saŋduk anyen kerubajin muggö ki na nu saŋduk ko turya ’dokesi kanyit.

⁸ A kilu turya gwe a lojo parik, a ’dutesi kase metani meta i pirit nake na gwon i komor na nu toŋkwet; ama nagon se ti bulo meta kaŋo; tojo ko lo lor se nyuŋ gwon kata nyu.

⁹ A ŋinu saŋduk gwe kana, tuŋ ŋurupö murek na ’dayatak nagon Mose a tikin nyu Orebe, i pirit nagon MATAT teteŋdi tomoret ko ŋutu ti Yisaraele, na pöri se kaŋo i jur lo Ejipeto nu.

¹⁰ A gwe sona, na lupe ’i kulu koanejin kaŋo i ŋinu pirit nake nu, a luru iŋge tojoreju kadi na MATAT,

¹¹ a kilu koanejin tine bulö gwo ’dan i koŋdya na kita nase kogwon ŋilu luru; kogwon minyo lo MATAT a tojoreju kadi na MATAT.

’Boroki na kadi na MATAT

¹² A kirut Solomona kulyani adi, Pon MATAT do aje tiŋdu kolor ki yu, ama do a kulya adi do ’de ’dekan si ’da i mudwe logon adi ’dii.

¹³ Nan aje ’dukökiŋdyö do kadi si ’daet inot, nagon a pirit inot gwiliŋit ŋupi ŋupi.

¹⁴ A mor wöripuŋdye ko ŋutu kulo ni, a ’boroji kurumi liŋ na Yisaraele na gwo ’di ’e se liŋ nu.

¹⁵ A nye kulyani adi, Ti MATAT Ŋun lo Yisaraele purani pura, kogwon nye aje koŋdya ko könin lonyit gwoso nagon nye aje milyekin monye lio Dawidi ko kutuk nanyit adi,

¹⁶ Suluja i lor logon nan a joŋdi ŋutu kwe Yisaraele kaŋo i Ejipeto lu, a nan gwe a ko wuluŋdyö köji i kötumitön liŋ ti Yisaraele nagon ’dukörikin kadi, anyen karin kwe mo gwon nyu; ama nagon nan a wuluŋdyö Dawidi a duma lo ŋutu kwe Yisaraele.

¹⁷ Nyena a Dawidi monye lio gwe ko ’deket kanyit i töili anyen ’dukökiŋdyö karin ti MATAT Ŋun lo Yisaraele kadi.

¹⁸ Ama MATAT a kulya ko Dawidi monye lio adi, Kogwon ’deket kata konut i töili nagon do ’duŋge kadi kogwon karin kwe na, nyena do a koŋdya ’bura i ’debba na Ŋina ’deket konut i töili;

¹⁹ nagon kölumbö do mo ti ’duggö kadi, ama ŋuro ilot logon mo yuyupweki do lu nye mo lo ’duggö kadi kogwon karin kwe.

²⁰ MATAT aje kon milye lonyit logon nye a jam lu; kogwon nan aje ruddya pirit na Dawidi monye lio, ko aje si ’daki i si ’daet na tumatyan na Yisaraele, gwoso nagon MATAT a milyeji nu, nan aje ’duggö kadi kogwon karin ti MATAT Ŋun lo Yisaraele.

²¹ Nan aje tetenakiŋdya pirit na saŋduk nyu, a tomoret na MATAT gwe i lukata nanyit nagon nye a teten ko merenyejin kaŋ na joŋdi nye se kaŋo i jur lo Ejipeto nu.

²² A Solomona gwo ’de i komor na pirit ’yuret na rubaŋgajin ti MATAT ko i ŋerot na kurumi liŋ na Yisaraele, a nye mamanyaddi ko könisi kanyit ki i ’diko;

²³ a kulyani adi, Pon MATAT Ŋun lo Yisaraele, lele Ŋun ’bayin gwoso do, i ki yu kode i kak ni. Do ’debba tomoret inot ko köliŋönök kulök logon wöwörö konut i komor ko ’deket nase geleŋ na töili, a do kwekiŋdye se nyaŋu inot nagon ti ’duddyö kwöŋ.

²⁴ Do a ’debba milye ilot ko köliŋönit ilot Dawidi monye lio; köti kulya nagon do aje milyekin ko kutuk inot kunu do aje koŋdya se ko könin ilot i lo lor.

²⁵ Nyenagon pon MATAT, ŋun lo Yisaraele, ’depe ’deŋ milye ilot logon do a milyekin köliŋönit ilot Dawidi monye lio adi, Nyakwari ilot logon nan a wulökin i si ’daki i si ’daet na tumatyan na Yisaraele lo mo ti jaran konut kwöŋ, ko ködyö ŋwajik kulök a met ’bura ko se wörö ada, anyen se wörö köyö i komor gwoso na wöröri do köyö i komor na.

²⁶ Nyenagon pon Ŋun lo Yisaraele, ti kulyaesi kulok logon do aje jamakin köliŋönit ilot Dawidi monye lio kulo böŋo gwe a ’diri.

²⁷ Ama do ŋun ’diri bubulö si ’da i na kak le? Mete, ma ’di ki ko wi nanyit ti jukin do; ake kirut ŋina kadi jujukin do nagon nan aje ’duk na?

²⁸ Kölumbö pon MATAT Ŋun lio, yiŋge kwakwasesi ko momolesi kwe nan köliŋönit ilot; yiŋge gwien nio ko momolesi nagon nan köliŋönit ilot kwakwaddi konut i komor i lo lor kune.

²⁹ Ti konyen kulök böŋö gwe ŋa i meddya na na kadi ko tukwaje ko tuparan, na pirit nagon do aje kulyari adi karin kunök mo gwon nyu, anyen do boŋo yiŋga kwakwasesi nagon nan köliŋönit ilot wuwukin i na pirit kune.

³⁰ Ko yiŋge momolesi kwe nan köliŋönit ilot ko ti ŋutu kulok Yisaraele, i diŋit nagon se kwa-kwaddu komorga na pirit, iye, yiŋge ki yu nagon a pirit inot gwiliŋit; a ko do a yiŋga a ti do pitökiŋdye se.

³¹ Ko ködyö ŋuto a toroŋdya marate lonyit, a iŋge tiki i nyesu na milye, a nye poni po a milyeji milyeju i komor na pirit ’yuret na rubaŋgajin kulök i na kadi,

³² a ti do böŋö yinge yiŋga ki yu a kitani kita inot, ko ti do lileŋ köliŋönök kulök, i ’duŋökiŋdyö na putet lo ŋuto loron anyen ropakiŋdya lepeŋ toron nanyit kanyit i kwe, ko i tuggö adi ŋuto logon ko löti lo ’but a ’buŋu, a ropaki-ŋdye lepeŋ gwoso löti lonyit lo rigwo.

³³ A ko ködyö ŋutu kulök Yisaraele a tela ko merok kase kogwon se a toroŋdya do, a ko se köti a löpuköddu konut i ruggö na karin kunök, i kwa-kwaddu ko i momo ’yu na do i na kadi;

³⁴ a ti do boŋo yiŋge yiŋga ki yu, a pitökiŋdye toron na ŋutu kulök Yisaraele, a do böŋö toyituŋdye se i jur logon do a tin merenyejin kase lo.

³⁵ A ko ködyö ki a gwo ’dan a kudu gwe ’bayin kogwon se a toroŋdya do, a ko se a kwakwaddu komorga na pirit, ko a ruggö karin kunök, a iŋge löpuggö i toron nase, kogwon do a tudaraju se,

³⁶ a ti do böŋö yiŋge yiŋga ki yu, a do pitökiŋdye toron na köliŋönök kulök logon a ŋutu kulök Yisaraele. A ti do böŋö todinikiŋdye se kiko lo ’but logon se agu ködyö wöwöröri, a do ruköki-ŋdye se kudu i ŋilo jur ilot logon do aje tin ŋutu kulök a lomore lose.

³⁷ A kö ködyö dyaŋ kata i ŋilo jur, kode lele twanti loron, kode twanti logon tiŋdu kinyojin wora a juggu, kode a buggi, kode mayat kode kuru; a ko ködyö merok kase tumba se i nene na köjinö kase; a ko ködyö twanti kata, kode gilö;

³⁸ a ko ködyö lele ŋuto kode ŋutu kulök Yisaraele liŋ a kwakwaddu kode a momo ’yu do, kweja adi ŋutu liŋ geleŋ geleŋ lo deŋdya delyaesi ti töilyet kase a mamanyaddu ko könisi kase komorga na kadi,

³⁹ nyena a ti do böŋö yiŋge yiŋga ki yu nagon a pirit inot gwiliŋit, a do böŋö pitökiŋdye se, a kitani kita inot, a do ropakiŋdye ŋutu liŋ gwoso i konesi kase ka ’de ka ’de, gwoso na deŋdi do töilyet kase na, kogwon do geleŋ tuŋ lo deŋdya töilyet ti ŋutu liŋ;

⁴⁰ anyen se böŋö kukujonö do perok liŋ logon se sisi ’dari i jur logon do a tin merenyejin kaŋ lo.

⁴¹ A sona köti, ko lwakatyo logon a leŋe lo ŋutu kulök Yisaraele, ko a po i jur lo pajo kogwon karin kunök

⁴² (kogwon ŋutu mo yiyiŋ lore lo karin kunök na kukwön, ko lo könin ilot iŋgo lo riör,) a ko ŋilo lwakatyo a po i kwakwaddu komorga na kadi,

⁴³ a ti do böŋö yiŋge yiŋga ki yu nagon a pirit inot gwiliŋit, a ti do böŋö konaki-ŋdye ŋilo lwakatyo gwoso i ŋo liŋ nagon nye a luŋ konut kine; anyen ŋutu liŋ ti kak böŋö deŋdya karin kunök a kujönöni do gwoso na ŋutu kulök Yisaraele na, köti anyen se böŋö deden adi na kadi nagon nan aje ’duk na luŋu ko karin kunök.

⁴⁴ A ko ködyo ŋutu kulök tu i gor i motö ko merok kase, i kiko logon do mo soŋdi se lu, a se kwakwaddi do MATAT komorga köji nagon do aje wulun na ko kadi nagon nan aje ’duk kogwon karin kunök na,

⁴⁵ a ti do böŋö yiŋge kwasesi ko momolesi kase ki yu, a ti do juŋdye se.

⁴⁶ A ko ködyö se a toroŋdya do, kogwon lele ŋuto ’bayin logon ti koŋdya toron, a do iŋge woran ko se, a tiŋdi se i könisi ti merok kase, anyen se jopa a ’dupi i jur lo merok kase logon pajo kode nyona;

⁴⁷ ama ko se ködyö a yeyeju kase i töilyet i jur logon se a jopa kata a ’dupi lu, a iŋge löpuggö, a momo ’yi do i ŋilu jur lo ŋutu lo joŋga se a ’dupi kulo adi, Yi a koŋdya toron-jin, yi a giran aka koyi a koŋdya arabat;

⁴⁸ a ko ködyö se a löpuggö ko töilyet kase liŋ, ko ködu dwölön kase liŋ i jur lo merok kase logon a joŋga se a ’dupi kulu, a se iŋge kwakwaddu do komorga jur lose logon do a tin merenyejin kase lo, ko köji nagon do a wulun na, ko na kadi nagon nan aje ’duk kogwon karin kunök na;

⁴⁹ a ti do böpö yiŋge kwasesi ko momolesi kase ki yu, nagon a pirit inot gwiliŋit, a ti do juŋdye se,

⁵⁰ ko ti do böŋö pitökiŋdye ŋutu kulök logon a toroŋdya do kilo, ko lyapesi kase liŋ nagon se a lyaŋgi konut kine; ko tiŋdi ŋutu lo joŋga se a ’dupi kilo i won konyen ko se, anyen se böŋö yatakiŋdya se.

⁵¹ (Kogwon se a ŋutu kulök, ko a lomoriot kulök logon do a joŋdya kaŋo i Ejipeto, i kiden na tuka niter.)

⁵² Ti konyen kulök böpö gwe i meddya ko ’busan momolesi kwe nan köliŋönit ilot ko ti ŋutu kulök Yisaraele, anyen do böpö yiŋga se i dipitan liŋ nagon se luŋgi do kunu.

⁵³ Kogwon do aje koraddu se i kiden na ŋutu liŋ ti kak, anyen gwon a lomoriot kulök, gwoso na jambi do ko Mose köliŋönit ilot i kutuk, na joŋdi do merenyejin kaŋ kaŋo i Ejipeto nu, pon MATAT ŊUN.

⁵⁴ A gwe sona, a Solomona ko tutuŋge kwakwaddu ŋilo kwaset momolet lo MATAT liŋ, a nye pine ki i pirit na rugwuŋöri nye nu ko könisi mama-nyaddu ki i ’diko i komor na pirit ’yuret na rubaŋgajin ti MATAT;

⁵⁵ a nye gwo ’de gwo ’dan, a ’boroji kurumi liŋ na Yisaraele ko gworo lobot adi,

⁵⁶ Ti MATAT purani pura, kogwon nye a tiŋdu ŋutu kanyit Yisaraele yukan, gwoso po liŋ na milyeji nye kunu; a nene po gwe a ko jaran kona i po na ’but kanyit liŋ, na jamakin nye ko Mose köliŋönit lonyit i kutuk nu.

⁵⁷ Ti MATAT Ŋun likaŋ gwe koyi, gwoso na gwoŋdi nye ko merenyejin kaŋ köju nu; ti nye böŋö gwe ti kölökin yi kode paju yi.

⁵⁸ Ti lepeŋ böŋö löpuköddi töilyet kaŋ kanyit, anyen yi wörö kanyit i kikolin liŋ i ’debba na jujuwesi kanyit, ko saresi kanyit lo wurö, ko kulya na ’duŋ nye kune nagon nye a sarakin merenyejin kaŋ kune.

⁵⁹ Ti kilo kulyaesi kwe logon nan a momo ’yi ko MATAT i komor kulo, ti se böŋö gwe nyona ko MATAT Ŋun likaŋ ko tuparan ko tukwaje, ko ti nye böŋö juŋdye nan köliŋönit lonyit ko ŋutu kanyit Yisaraele, gwoso nagon ’de ’dekarikin temba i lor na;

⁶⁰ anyen ŋutu liŋ ti kak böŋö deden adi MATAT ’diri a Ŋun, a lele pun gwe ’bayin.

⁶¹ Ti töilyet kasu liŋ gwe a ti MATAT Ŋun likaŋ gwak, anyen ta wörö i saresi kanyit lo wurö ko ’de ’deŋ saresi kanyit gwoso na lo lor na.

⁶² A kirut mor se ko ŋutu liŋ ti Yisaraele ’duŋge rubaŋgajin ko MATAT i komor.

⁶³ A Solomona ’duŋökiŋdye MATAT rubaŋgajin ti taliŋ logon a dwönin aliŋan merya murek wot murek, ko köbilu aliŋan mia geleŋ ko merya murek. A mor se ko ŋutu liŋ ti Yisaraele ’boroji nu kadi na MATAT.

⁶⁴ a i ŋilu lor a mor koruŋdye swöt lo ’baŋ logon i komor na kadi na MATAT logon i mariŋ lukata lu, anyen gwon a loke lo rurwan; kogwon nye a ’duŋgö rubaŋga lo ’yu ’yura ’buluŋ nyu se ko ’doket na ’bolot, se ko welesi ti rubaŋgajin ti taliŋ, kogwon pirit ’yuret na rubaŋgajin na tetena ko mölwö nagon gwon ko MATAT i komor nu gwe a na ’dit, ti temakiŋdya wuki ’e rubaŋga lo ’yu ’yura ’buluŋ ko ’doket na ’bolot se ko welesi ti rubaŋgajin ti taliŋ.

⁶⁵ A Solomona se ko ŋutu liŋ ti Yisaraele koŋdi rorwe i nu diŋit ko MATAT Ŋun likaŋ i komor perok buryo, a ŋutu lo momora kulo gwe jore parik logon a po suluja i kwake nagon luŋörikin Kamat tojo ko Loro lo Ejipeto.

⁶⁶ A nye ruköddi kulu ŋutu i tu kaŋo i lor tobudök lonyit; a se pu-purje mor, a reara kase i midijik ko lyöpön duma na töili kogwon po na ’but liŋ nagon MATAT aje konakin Dawidi köliŋönit lonyit ko ŋutu kanyit Yisaraele kune.