1 Moran 6 - Bibilia Buk na Ŋun nagon koti luŋu a

¹ A Solomona suluje ’duggö kadi na MATAT i yapa lo luŋu a Jiwi, logon a yapa tomurek, i kiŋa toiŋwan logon nye gwon a mor lo Yisaraele nu. A ŋilu kiŋa gwe a tomiajin iŋwan ko merya budök i mukök na pöri ŋutu ti Yisaraele kaŋo i jur lo Ejipeto nu.

² A tojolan na kadi nagon mor Solo­mona a ’dukökin MATAT nu gwe a lokiliŋan merya buker, a tugalaŋ nanyit gwe a lokiliŋan merya murek, a tojolan nanyit ki gwe a lokiliŋan merya musala.

³ A kadi na MATAT gwe ko kadi najo, a ŋina kadi najo gwe ko baraŋöa, a tojolan na ŋina baraŋöa gwe jojo ko tugalaŋ na kadi nagon a lokiliŋan merya murek, a tugalaŋ nanyit i komor na kadi gwe a lokiliŋan puök.

⁴ A nye tetenakiŋdye ŋinu kadi kulupitan nagon a görö ko kaden.

⁵ A nye köti ’duŋge nene kadi a koŋilore nagon toto ’bo ko gorom na ŋinu kadi na MATAT, i lolorga na lepeŋ ’bukuluŋ kweja adi i kadi najo ko i toŋkwet liŋ; a nye kokoŋi ŋinu kadi lolopet a kadijik na ’di ’dik.

⁶ A tugalaŋ na kadi na gwon kak na gwe a lokiliŋan mukanat, a tugalaŋ na koŋilore na gwon kiden na gwe a lokiliŋan buker, a tugalaŋ na koŋilore tomusala na gwe a lokiliŋan buryo; kogwon nye aje teteŋdya kunie piritön na rimuŋdyö kaŋo i gorom na kadi na MATAT i mara kanyit kaŋo, an ŋinu kadi lolopet to ’depaki i gorom nanyit.

⁷ A i diŋit ’duket na kadi na MATAT, a se kitani ko ŋurupö lo tuturu ajo i pirit gwalaket nase, a nene woŋon na ’beket kode na tulu kode na wititöt gwe a ko yiŋa i ŋinu kadi i ’dukö nanyit.

⁸ A kötumit na kadi na gwon kak na gwe i swöt lo loki lo kadi na MATAT; ŋuto bubulö kija ko kiyesi tojo ko koŋilore na gwon i kiden, a kirut i ŋina koŋilore tojo i koŋilore tomusala.

⁹ A Solomona tojoji ’duggo kadi na MATAT; a nye muŋge lukata na lo ’dek ko kaden ko paraŋgijin ti kaden logon gwoso tika.

¹⁰ A nye ’duŋge nu kadi a koŋilore nagon toto ’bo ko kadi na MATAT ’bukuluŋ, a koŋiloreki geleŋ geleŋ gwe ko lokiliŋan mukanat i tojolan nase ki, a se iŋge tomoraki i kadi na MATAT ko kaden logon gwoso tika.

¹¹ A kulyaet lo MATAT poki ko Solomona adi,

¹² Nan jambu ko do i kulya ti ŋina kadi nagon do ’du ’duk na, adi ko do mo wöröji i saresi kwe lo wurö, ko do mo koŋdya gwoso jujuwesi kwe ko ’de ’deŋ saresi kwe liŋ anyen kepöddu se, a kirut nan mo togo ’yi kulyaesi kwe ko do logon nan a takin Dawidi monye ilot kulo.

¹³ A nan mo si ’dani i kiden na ŋutu ti Yisaraele, a mo tine kölökin ŋutu kwe Yisaraele.

¹⁴ A Solomona tojoji ’duggö kadi na MATAT ajo.

¹⁵ A nye muŋge lukata na gorom na ŋinu kadi ko baulan ti kaden logon gwoso tika, suluja kak tojo ko kaden na muggö lo ’dek i lukata nanyit; a nye muŋge kak na kadi ko baulan ti berosa.

¹⁶ A nye teteŋdi temet na lokiliŋan merya murek i lobot na kadi ko baulan ti kaden logon gwoso tika suluja kak tojo ko kaden na muggö lo ’dek i lukata nanyit, a nye teteŋdi ŋina toŋkwet i lukata na kadi gwoso pirit nake na rurwan na totoŋundya.

¹⁷ A temet na kadi najo na kadi na MATAT na gwon i komor na ŋinu toŋkwet na gwe a lokiliŋan merya iŋwan.

¹⁸ A kaden logon gwoso tika lo gwon i lukata na kadi kulo iŋge gigiru ko ŋöjinö ti keria ko köturön lo ŋaju; a lukata na kadi liŋ tetenani ko kaden logon gwoso tika, a gorom na ŋurupö tine meta kwöŋ.

¹⁹ A nye teteŋdi ŋina toŋkwet i ’dutet na kadi na MATAT, anyen saŋduk na tomoret na MATAT tiki nyin.

²⁰ A tojolan na ŋina toŋkwet ko tugalaŋ nanyit ko tojolan nanyit ki liŋ gwe a lokiliŋan merya murek; a nye muluje lukata nanyit ko dakap nake. A nye köti teteŋdi nene pirit ’yuret na rubaŋgajin ko kaden logon gwoso tika.

²¹ A Solomona muluje lukata na kadi na MATAT ’bukuluŋ ko dakap nake, a nye görökindye i komor na nu toŋkwet toŋot nagon a dakap, a muluje nye ko dakap.

²² a nye muluje kadi na MATAT ’bukuluŋ ko dakap, tojo ko nye a tutuŋ liŋ. Köti a nye muluje ko dakap nu pirit ’yuret liŋ nagon a na toŋkwet nu.

²³ A nye teteŋdi kerubajin murek ko kaden ti jeitun i lukata na toŋkwet, a tojolan nase geleŋ geleŋ gwe a lokiliŋan puök.

²⁴ A tojolan na köpukönit geleŋ na keruba gwe a lokiliŋan mukanat, a tojolan na tomurek gwe a lokiliŋan mukanat; suluja i ’dutet na nene köpukönit tojo i nene gwe a lokiliŋan puök.

²⁵ A tojolan na keruba lele lo gwe a lokiliŋan puök; se murek liŋ gwon ko temet nase geleŋ ko gweya nase geleŋ.

²⁶ a tojolan na ki na kilu kerubajin murek gwe jojo a lokiliŋan puök.

²⁷ A nye tiŋdi kilu kerubajin i kiden na kadi na lukata; a köpukön kase iŋge ŋai anyen köpukön na gwon kaŋo kune ’bo ’yu gorom i swötön liŋ murek, a köpukön na gwon lukata kune to ’bole ko ’börik i kiden na kadi.

²⁸ A nye muluje kilu kerubajin ko dakap.

²⁹ A nye gigiŋi gorom na kadi na MATAT i swötön liŋ ko ŋöjinö na gigiru ti kerubajin ko ti kaden ti tömur ko ti köturön lo ŋaju i kadijik ti lukata na kaŋo liŋ kulo.

³⁰ a nye muluje kak na kadi nu ko dakap i kadijik ti lukata ko kaŋo liŋ.

³¹ A nye teteŋdi kaden ti jeitun a kötumitön na lupörikin i toŋkwet; a görit ko goŋesi kanyit gwe a regorego nagon ko pelela mukanat.

³² a nye gigiŋi kinu kötumitön nagon a tetena ko kaden ti jeitun ko ŋöjinö ti kerubajin ko ti kaden ti tömur ko ti köturön lo ŋaju; a nye muluje se ko dakap, a totorekiŋdye dakap i loki na kerubajin ko kaden ti tömur.

³³ A nye köti teteŋdi kaden ti jeitun a goŋesi nagon a regorego nagon ko pelela iŋwan, anyen gwon a lupet ra kadi najo,

³⁴ se ko kötumitön murek nagon a kaden berosa; a kine kötumitön murek gwe ko ŋudulesi kase i swötön liŋ murek ti kötumit.

³⁵ A nye gigiŋi ŋöjinö ti kerubajin ko ti kaden ti tömur ko ti köturön lo ŋaju, a muluje se ko dakap jojo i piritön nagon a gigiru kunu.

³⁶ a nye ’duŋge gorom lolopet na ’ba ŋina lukata ko ’dokiŋ musala ti ŋurupö lo tuturu ko ’doke gelen na baulan ti kaden logon gwoso tika.

³⁷ A togwi ’diet na ŋinu kadi na MATAT a ’boroki i yapa Jiwi i kiŋa toiŋwan;

³⁸ a ko tutuŋoni ’duko i kiŋa topuök wot geleŋ, i yapa Bulu logon a yapa tobudök, a nye iŋge tutupo i swötön kanyit liŋ ko i po liŋ nagon a tetenaki nye kune. A Solomona iŋge joŋga kiŋajin buryo i ’duko nanyit.