1 Moran 5 - Bibilia Buk na Ŋun nagon koti luŋu a

Solomona a torukökin ko mor Kiram

¹ A Kiram mor lo Turo ko yiŋge adi ŋutu aje welakiŋdya Solomona a mor i pirit na monye lonyit nu, a lepeŋ soŋdi kölipönök kanyit ko Solomona yu, kogwon Kiram ’beron nyanyar Dawidi.

² A Solomona sunyukiŋdye Kiram lore adi,

³ Do a den adi Dawidi monye lio köju ti bulö ’duggö kadi a na karin ti MATAT ŋun lonyit kogwon kulya ti mörö na gwon i swötön kanyit liŋ ti jur nu, tojo ko MATAT a tiŋdu lepeŋ i ryokakiŋdya na merok kanyit kak.

⁴ Ama soŋinana MATAT ŋun lio a tin nan yukan i swötön liŋ, a merok gwe ’bayin kode nene ŋo naron.

⁵ Nyenagon nan yöŋö ’duggö kadi a na karin ti MATAT ŋun lio, gwoso na kulyari MATAT ko Dawidi monye lio nu, adi, ŋuro ilot logon nan mo titin konut i si ’daet i pirit inot lu, nye molu lo ’duggi kadi kogwon karin kwe.

⁶ Nyenagon böŋö tiŋdi saret anyen kaden ti Libanon logon gwoso tika kulo böŋö tukuki nan, a kölipönök kwe mo mori ko kulök, a nan mo ropakiŋdye do ropesi ti kölipönök kulök gwoso do a tetenakin; kogwon do deden adi lele ŋuto ’bayin kayaŋ kiden logon deden toggu kaden gwoso ŋutu ti Sidona.

⁷ A gwe sona na yiŋge Kiram kulyaesi ti Solomona kulu, a nye lyöŋi lyöŋön parik, a kulyani adi, Ti MATAT purani pura i lo lor kogwon nye a tikiŋdya Dawidi ŋuro lokoŋ a kasaranit lo ŋina kötumit duma.

⁸ A Kiram sonyoddi lore ko Solomona yu adi, Nan a yiŋ lore logon do a sunyukin nari lo; nan a ruk i koŋdya na ŋo liŋ nagon do ’de ’dekan i kulya ti kaden logon gwoso tika ko ti kaden berosa.

⁹ A kölipönök kwe mo ’doggi se kak Libanon tojo ko tör nu; a nan mo totorone se a kusik ti kaden na ’doko ko tör tojo ko pirit nagon do mo kwekwekin nan nu, a nan mo lalakane se nyu, a do mo wuji wuju; a do mo tikiŋdye nan kinyo lo mede nio gwoso ’deket nio.

¹⁰ A Kiram tikiŋdye Solomona kaden logon gwoso tika, ko kaden berosa liŋ logon lepeŋ a ’deggi kulu,

¹¹ a Solomona tikiŋdye Kiram koresi ti ’bolot alipan merya murek a kinyo lo mede nanyit, ko temet na welet nake gwoso sapiajin alipan merya murek. A Solomona tiŋdi Kiram kilo kinyojin temba i kiŋa.

¹² A MATAT tiŋdi Solomona koŋon gwoso na milyekiŋdye lepeŋ nye nu; a taliŋ gwe kata i kiden na Kiram ko Solomona; a se murek liŋ toruköki tomoret nase.

¹³ A mor Solomona momori ŋutu i kiden na Yisaraele liŋ logon a ri ’diki i kita kulo, a se gwe a kakitak alipan merya musala.

¹⁴ A nye sonyoddi ŋutu alipan puök Libanon a kiyukan temba i yapa; se gwon yapa geleŋ Libanon ko yapala murek kase i midijik; a Adoni­ram lo gwe a katiyunit lo kilo kakitak.

¹⁵ A Solomona köti gwe ko ka ’dokök alipan merya buryo, a nye gwe ko kulye katuturuk ti ŋurupö alipan merya budök i jur lo merya,

¹⁶ kökö kamemetak temejik ti kita alipan musala ko miajin musala logon a kamemetak ti kilu kakitak.

¹⁷ A mor tiŋdi saret anyen se gwagwalaggu ŋurupö lobot lo gwörwe go, anyen ŋinu kadi pipilu ko ŋurupö lo tuturu.

¹⁸ A ka ’dukök ti Solomona ko ka ’dukök ti Kiram se ko ŋutu liŋ ti Gebala tutuŋi ŋurupö, a se teteŋdi kaden ko ŋurupö ajo anyen ’dukörikin ŋinu kadi.