1 Moran 21 - Bibilia Buk na Ŋun nagon koti luŋu a

Aba a be ’ya luköbi na Nabota

¹ A lele ŋuto lo Yejerele karin kanyit a Nabota gwe ko luköbi na kaden ti binyo Yejerele yu, nyona ko kadi duma na Aba mor lo Samaria.

² A Aba kulyani ko Nabota adi, Tiki nan luköbi inot na binyo na, anyen gwon a melesen nio na ’dötilön, kogwon nye gwon nyona ko mede nio; a nan de tiŋdi do nene luköbi na ’but lwölwöŋ ŋina; kode luŋa meta a na ’but konut a nan tiŋdi do gurut ropesi kanyit.

³ A Nabota kulyani ko Aba adi, Ti MATAT teŋgi nan i tiŋdu na do lomore na merenyejin kwe.

⁴ A Aba luŋöni kanyit kadi ko ŋoma ko yulön kogwon kulyaesi logon Nabota lo Yejerele a jamakin lepeŋ kulu, kogwon lepeŋ a kulya adi nye de ti tiŋdu lepeŋ lomore na merenyejin kanyit. A nye pirikine kanyit i dotoet a ’de ’yi komor nanyit, a tine nyesu kinyo.

⁵ A ŋebele nakwan nanyit ŋoŋdi ko lepeŋ ni, a pipije lepeŋ adi, Ko nyo nagon do gwon ko ŋoma a tine nyesu?

⁶ A nye waddi adi, Kogwon nan a pija Nabota lo Yejerele adi ti lepeŋ tiŋdi nan luköbi nanyit na binyo na ko gurut; kode ko lepeŋ luŋa ’de ’dekan a nan tiŋdi lepeŋ nene luköbi na binyo; a Nabota waddi adi, Nan ti ’bön tiŋdu do luköbi nio na binyo na.

⁷ A ŋebele nakwan nanyit pipije lepeŋ adi, Do ’bayin a kasaranit lo Yisaraele le? Ŋine ki ko nyesi kinyo, ko ti töili ilot lyöŋi lyöŋön; nan de titin do luköbi na binyo na Nabota lo Yejerele nu.

⁸ A gwe sona a ŋebele wuŋe waraga-lan i karin ti Aba, a joggi se ko nya ’dotet nanyit, a soŋdi kine waragalan i temejik ko i kimak logon si ’da kase ko Nabota i köji nanyit kulu.

⁹ A nye wuŋe i waragalan kunu adi, Laikiŋdye ta lor minyet, ko tosi ’dakiŋdye ta Nabota i ŋerot na ŋutu;

¹⁰ ko tosi ’dakiŋdye ta kamönyök murek i todir ko lepeŋ, ko ti se ŋökiŋdye lepeŋ adi, Do a lömbu Ŋun se ko mor. A kirut ta joŋgi lepeŋ kaŋo a gugubuje lepeŋ ko ŋurupö, anyen nye twatwan.

¹¹ A ŋutu ti köji nanyit, ko temejik ko kimak logon si ’da i ŋinu köji kulo koŋdi gwoso saresi ti ŋebele lo wur nye i waragalan nagon nye a sunyukin se kune.

¹² A se laikiŋdye lor minyet, a tosi ’dakiŋdye Nabota i ŋerot na ŋutu.

¹³ A kamönyök murek kulo poni ŋo, a si ’dakine totodir ko lepeŋ; a se ŋökiŋdye Nabota i komor na ŋutu adi, Nabota a lömbu Ŋun se ko mor. A se joŋgi lepeŋ kaŋo köji kata, a gugumbe lepeŋ ko ŋurupö, a nye twane twan.

¹⁴ A se sonyoddi lore ko ŋebele yu adi, Nabota aje guguba ko ŋurupö; a nye aje twan.

¹⁵ A gwe sona na yiŋge ŋebele adi Nabota aje guguba ko ŋurupö, ko aje twan nu, a nye kulyani ko Aba adi. Ŋine ki, ko ruddye luköbi na Nabota lo Yejerele nagon nye köju a renya tiŋdu do ko gurut nu; kogwon Nabota gwe ’bayin ama aje twan.

¹⁶ A na yiŋge Aba adi Nabota aje twan nu, a nye ŋine ŋien a dudulara kak i luköbi na binyo na Nabota lo Yejerele i ruddya na lepeŋ.

¹⁷ A kulyaet lo MATAT ŋoki ko Eliya Tisebetyo adi,

¹⁸ Ŋine ki, ko dudulara kak i rum ko Aba mor lo Yisaraele, logon gwon Samaria; mete, lepeŋ lu ’i luköbi na binyo na Nabota, nagon nye aje tu i ruddya na lepeŋ na.

¹⁹ A do pipije lepeŋ adi, MATAT lo kulya sona adi, Do aje tatuja a do lo ruddye köti le? A do de kulyani ko lepeŋ köti adi, MATAT lo kulya sona adi, I pirit nagon ’dioŋ jin a dadaŋgu rima ti Nabota kata na, nyena ’dioŋ jin de dadaŋgu rima kunök köti.

²⁰ A Aba kulyani ko Eliya adi, Miriku liŋ, do a ryö nan? A nye waddi adi, Nan aje ryö do, kogwon do aje tugwörökiŋdyö mugun a ’duŋiet lo toron ko MATAT i komor.

²¹ Mete, nan mo joŋdya ŋo naron konut loki; nan mo tutukar do asut, a nan mo ’duŋge ŋutu lyan liŋ ti Aba, ’duŋi kode lui lo gwon Yisaraele kulo;

²² A nan mo tiŋdi kötumit inot anyen gwon gwoso kötumit na Yerobama ŋuro lo Nebat, ko gwoso kötumit na Basa ŋuro lo Akiya, kogwon woran nagon do a towopi nan na, köti kogwon do a tiŋdu ŋutu ti Yisaraele i toroŋdya.

²³ MATAT köti a jambu i kulya ti ŋebele adi, ’Dioŋ jin mo nyönyö mugun na ŋebele i lukata na mariŋ na Yejerele.

²⁴ a nye logon a lo kötumit na Aba logon a twakin köji lo a ’dioŋ jin mo nyesi lepeŋ; a lele lo ŋutu kanyit logon twakin mu ’diŋ a kwen ti ki nio nyesi lepeŋ.

²⁵ A ŋuto gwe ’bayin logon a tugwörökiŋdyö mugun a ’duŋiet lo toron ko MATAT i metet gwoso Aba, logon a lulukaki ko nakwan nanyit ŋebele.

²⁶ Lepeŋ a koŋdya ŋo na mamana i keŋoddu nanyit na nyömuejin, gwoso na koŋdi ŋutu ti Amori logon MATAT a rikörö kaŋo ko ŋutu ti Yisaraele i komor kulu.

²⁷ A Aba ko yiŋge kilo kulyaesi, a nye kekereŋdi boŋgwat kanyit, a jupu-kiŋdye boŋgwat terekesi, a paji kinyo, a dotoni ko terekesi, a gwe ko delya.

²⁸ A kulyaet lo MATAT ŋoki ko Eliya Tisebetyo adi,

²⁹ Do aje met tokoyok na Aba köyö i komor le? Nyena kogwon nye a tokoyogga mugun köyö i komor, nan mo ti joŋdya ŋo naron i perok ti gwiliŋit nanyit; ama nan mo joŋdya ŋo naron i kötumit nanyit i perok ti gwiliŋit na ŋuro lonyit.