1 Moran 20 - Bibilia Buk na Ŋun nagon koti luŋu a

Aba a te ’ya ŋutu ti Suria

¹ A Ben-adada mor lo Suria momori kamörök kanyit liŋ i pirit na geleŋ; a moran merya musala wot murek gwe ko lepeŋ, ko kusanjin ko arabiajin lo jirikö; a nye iti tu a gömbi Samaria, a möröni ko lepeŋ.

² A nye yökiöddi ŋutu i köji i takiŋdya na Aba mor lo Suria adi, Ben-adada a kulya sona adi,

³ Pödö kunök ko dakap kunok a kwe; ko wate kunok ko ŋwajik kulök lo ’but parik kulo köti a kwe.

⁴ A mor lo Yisaraele waddi adi, Gwoso na kulyari do na ŋon mor duma liŋ, nan a ilot, ko ŋo liŋ nagon kata köyö kune a kunök.

⁵ A luyökie kulu poni ŋo köti, a kulyani adi, Ben-adada a kulya sona adi, Nan a sunyukiŋdyö do lore adi do ködyö tiŋdu nan pödö kunök ko dakaŋ kunök, ko wate kunök ko ŋwajik kulök;

⁶ ama nan de soson köliŋönök kwe konut yu de ko ’bure i na saa, a se de ga ’yi kadi inot ko kadijik ti köliŋönök kulök, a se de ’du ’dumbe ŋo liŋ nagon se a met a na ’but, a de joŋgi joŋga.

⁷ A mor lo Yisaraele luŋgi ŋutu temejik liŋ ti jur, a kulyani adi, Deŋdi ta ’bura ko meddi ta, ŋilo ŋuto ga ’yu mörö; kogwon nye a sunyuŋdyö ŋutu i luŋgu na wate kwe ko ŋwajik kwe, ko pödö ko dakaŋ kwe, ama nan a ko renyakin lepeŋ.

⁸ A ŋutu temejik ko ŋutu liŋ kulyani ko lepeŋ adi, An do yiŋga lepeŋ kode ruggö lepeŋ.

⁹ A nye kulyani ko luyökie ti Ben-adada kulo adi, Taki ta mor duma liŋ adi, Nan de titin lepeŋ ŋo liŋ nagon nye a luŋ ko köliŋönit lonyit a kokwe kune, ama nan ti bulö ruggö kine kulya. A luyökie kulo piörö piörö a nyökökiŋdye lepeŋ kutuk köti.

¹⁰ A Ben-adada sunyukiŋdye lepeŋ lore adi, ’Diri ’diri ti punyen konakin-dye nan arabat ko lwölwöŋ kine köti, ko ködyö ŋutu ti Samaria de tetema-kiŋdya i tojoreju na könisi ti kakepok kwe liŋ.

¹¹ A mor lo Yisaraele waddi adi, Taki lepeŋ adi, Ti ŋuto logon jupukiŋdya tito kanyit möriesi lo gwe ti bu ’ya mugun gwoso nye logon rusuŋdyö se kaŋo.

¹² A Ben-adada ko yiŋge kilo kulyaesi i diŋit nagon se mömöju i murugujin ko moran kulo i pirit na geleŋ nu, a nye kulyani ko ŋutu kanyit kulo adi, Reara ta kasu i piritön tumesi. A se reara reara i tumba na ŋinu köji.

¹³ Mete, a lele nebi ŋoŋdi ko Aba mor lo Yisaraele nyona, a kulyani adi, MATAT lo pija sona adi, Do a met ŋilo lodir duma lo ŋutu liŋ? Mete, nan de tiŋdu se konut i könin i lo lor; a do de kuruŋdye adi nan a MATAT.

¹⁴ A Aba pipije adi, Ko riŋit nipa? A nebi waddi adi, MATAT lo kulya sona adi, Ko riŋit na köliŋönök ti kasarak ti maraka ŋin. A nye pipije adi, ŋa de lo suluja mörö? A nye waddi adi, Do lo suluja.

¹⁵ A nye momori köliŋönök ti kasarak ti maraka ŋin, a se gwe a ŋutu miajin murek ko merya musala wot murek; a nye momori ŋutu liŋ ti Yisaraele kase i mukök aliŋan buryo.

¹⁶ A se iti kaŋo i tuparan kiden, a Ben-adada gwe i möju i murugujin tojo ko lepeŋ a meran, se ko moran merya musala wot murek kulo logon a kaparak kanyit.

¹⁷ A köliŋönök ti kasarak ti maraka ŋin iti kaŋo a kokwe. A Ben-adada aje soŋdu kawirak a se takiŋdye lepeŋ adi, ŋutu kulu luŋe kaŋo Samaria yu.

¹⁸ A nye kulyani adi, Ko se a luŋe kaŋo kana, momorgi ta lepeŋat; a ko se a luŋe kaŋo i mörö, momorgi ta lepeŋat köti, ama an ta ko tatuja se.

¹⁹ A köliŋönök ti kasarak ti maraka ŋin ko kamörök logon a kakepok kase kulu luŋöni kaŋo i köji.

²⁰ A ŋutu liŋ geleŋ geleŋ tatuje ŋuto lonyit; a ŋutu ti Suria kulu wöki wökön, a ŋutu ti Yisaraele riköddi se, ama Ben-adada mor lo Suria a lwököddu mugun wökön ko kusan se ko kulye ŋutu logon joŋga kusanjin.

²¹ A mor lo Yisaraele iti kaŋo a momorgi kusanjin ko arabiajin lo jijikö, a togirökiŋdye ŋutu ti Suria.

²² A lu nebi ŋoŋdi ko mor lo Yisaraele nyona, a kulyani ko lepeŋ adi, Iti, ’yalakiŋdye mugun riŋit, ko yeyeji yeyeju ’bura ko do ködyö koŋdya nyo; kogwon mor lo Suria mo yiyitwe i mörö ko do i suluet na kiŋa.

²³ A köliŋönök ti mor lo Suria kulyani ko mor lose adi, Ŋun lose a pun lo merya, nyenagon lepeŋat köju a iŋgo lwölwöŋ yi; ama ti yi möröni ko lepeŋat i ’dar, a yi mo ’diri gwe a iŋgo lwölwöŋ se.

²⁴ Ko koŋdi na ŋo: ’dumara kilo moran kaŋo i piritön kase geleŋ geleŋ, ko tiŋdi dumalak ti kamörök i ruddya na se;

²⁵ a do momori teŋ na kamörök kulye gwoso ŋinu teŋ nagon aje toliki na, ko kusanjin ko arabiajin lo jirikö gwoso na ’beron nu; a kirut yi mo möröni ko lepeŋat i ’dar, a yi mo ’diri gwe a iŋgo lwölwöŋ se. A nye yiŋge jujuwesi kase a koŋdi sona.

²⁶ A i suluet na kiŋa, a Ben-adada momori ŋutu ti Suria, a iti tojo ko Apek, i mörö ko ŋutu ti Yisaraele.

²⁷ A ŋutu ti Yisaraele aje momora, ko aje koraki kinyo lose, a se iti i mörö ko lepeŋat; a ŋutu ti Yisaraele teteŋdi mera nase ko ŋutu ti Suria i komor gwoso teŋon na ’di ’dik murek ti yidin, ama ŋutu ti Suria a tojoreju ŋilu jur.

²⁸ A ŋuto lo Ŋuro ŋoŋdi nyona a kulyani ko mor lo Yisaraele adi, MATAT lo kulya sona adi, Kogwon ŋutu ti Suria a kulya adi MATAT a pun lo merya ama lepeŋ ’bayin a ŋun lo luruki, nyenagon nan de tiŋdu ŋilu lodir duma liŋ lo ŋutu konut i könin, a ta de kuruŋdye adi nan logon a MATAT.

²⁹ A se gwe kase i merajin totodirakin ko ’börik perok buryo. A i mukök na perok buker a se suluje mörö; a ŋutu ti Yisaraele iŋge tatuja kamörök ti Suria aliŋan mia geleŋ lo wörö ko mok i lor geleŋ.

³⁰ A pitönö kulu wöki i köji na Apek; a gorom nagon a mariŋ na köji iŋge muju ŋutu aliŋan merya murek wot buryo lo pituŋdyö kulu. A Ben-adada köti wöki wökön, a luŋöni i nene kadi na lukata i nu köji.

³¹ A köliŋönök kanyit kulyani ko lepeŋ adi, Mete, yi a yiŋga adi moran ti kötumit na Yisaraele a kaŋitök; ti yi doggi mukökö kaŋ ko boŋgwat terekesi ko kusik kaŋ ko patala, a yi iti ko mor lo Yisaraele yu; kode lepeŋ ŋona de kökölökin do.

³² a se doggi mukökö kase ko boŋgwat terekesi ko kusik kase ko patala, a iti ko mor lo Yisaraele yu a kulyani adi, Köliŋönit ilot Ben-adada a kulya adi, Böŋö ti do kölöki nan i gwon jörun. A mor pipije adi, Lepeŋ nyuŋ gwon kata? Nye a luŋaser liŋ.

³³ A kilo ŋutu moji moja kode se a köpukö ko moköt lo ’but kode loron, a se nyoŋgi mokuŋdya ŋilo jamet ko lepeŋ, a se waddi adi, Ee, luŋösur Ben-adada. A nye kulyani adi, Iti ta, ko jo ta lepeŋ. A Ben-adada luŋene kaŋo a ŋoŋdi ko lepeŋ ni, a nye lupundye lepeŋ kanyit i arabia lo jirikö.

³⁴ a Ben-adada kulyani ko lepeŋ adi, Nan de nyönyökökin do köjinö nagon baba köju a ripara ko munyi kunu; a do bulöni bulö tetenakiŋdya mugun piritön tujaresi Damaseke, gwoso na teteŋdi baba Samaria köju nu. A Aba kulyani adi, Nan de kökölörö do ko ŋina tomoret. A nye teteŋdi tomoret ko lepeŋ, a kölöddi lepeŋ.

³⁵ A lele ŋuto lo teŋ na nebijin kulyani ko marate lonyit i kulyaet lo MATAT adi, Gwute nan böŋö. Ama ŋilo ŋuto a renya gwuddyö lepeŋ.

³⁶ A nye kulyani ko lepeŋ adi, Kogwon do a ko yiŋ gworo lo MATAT, mete, na tiri do kaŋo köyö a kömiru de köji do a do twane twan. A gwe sona na tiri lepeŋ kaŋo ko lepeŋ nu, a kömiru ryeji lepeŋ a köji lepeŋ tojo ko nye a twan.

³⁷ A ŋilu ŋuto lo teŋ na nebijin ryeji lele ŋuto, a kulyani adi, Gwute nan böŋö. A ŋilu ŋuto gwuddye lepeŋ a böŋöddi lepeŋ.

³⁸ A lu nebi iti tu, a möŋdi mor i merete lo kiko, koŋdya mugun a lepetyo ko boŋgo a toraki kanyit i konyen.

³⁹ A na lwöpöddi mor nu, a nye maraŋgi ko mor adi, Nan köliŋönit ilot a tu tojo i gor lu pape; mete, a lele lo kamörök boŋgi boŋga a jakiŋdye nan lele ŋuto, a kulyani adi, Mete met ŋilo ŋuto; a ko ködyö lepeŋ a wökön a nan de robbi ru na ŋilo ŋuto ko ru inot, kode luŋa do robba pödö na temuŋdya a talenta geleŋ.

⁴⁰ A i diŋit nagon nan köliŋönit ilot gwon i taŋgu na mugun ko kita nu, a nye gwe ’bayin. A mor lo Yisaraele kulyani ko lepeŋ adi, Ti kulya na ’duŋ do kune gwe sona kogwon do ko mugun inot lo ’duŋökiŋdyö ŋilo putet.

⁴¹ A ŋilu ŋuto rumara i ’dumaddu na ŋinu boŋgo toret kanyit i konyen; a mor lo Yisaraele gwulu ’ye lepeŋ a lele lo nebijin.

⁴² A lu nebi kulyani ko lepeŋ adi, MATAT lo kulya sona adi, Kogwon do aje kölöddu ŋuto logon nan aje wulökin konut i könin i tukara lo, nyenagon ru nanyit de ropa ko ru inot, a ŋutu kanyit de ropani ko ŋutu kulök.

⁴³ A mor lo Yisaraele iti kanyit i ’baŋ ko ŋoma ko yulön, a kirut lwöpöddi tojo Samaria.