Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

1 Moran 19 - Bibilia Buk na Ŋun nagon koti luŋu a


Eliya a wökön Orebe

1 A Aba nyönyökökiŋdye ŋebele ŋo liŋ nagon Eliya aje kon kunu, kegga tatuja nanyit na kulu nebijin liŋ ko baŋdu.

2 A ŋebele yokiöddi ŋuto i takiŋdya na Eliya adi, ’Diri ’diri, ti punyen konakiŋdye nan arabat ko lwölwöŋ kine köti, ko ködyö nan ti tolikin ru inot de ko ’bure i na saa gwoso na tolikiŋdye do ru nase.

3 A Eliya iŋge kujönö, a nye pine ŋien a lwököddi ru nanyit, a nye ’dure Ber-saba na Yuda, a kölökiŋdye köliŋönit lonyit nyu.

4 Ama a nye lo lwöŋöddi geleŋ i yöbu na sese nagon jölö nanyit a lor geleŋ, a nye iti tu a si ’dakine i ’bukuli mukök; a nye momo ’yi momo ’yu adi ti nye twane twan, kulya adi, Aje jo; soŋinana ŋon MATAT, joŋgi ru nio kaŋo; nan ’bayin a lo ’but lwölwöŋ merenyejin kwe.

5 A nye pirikine kak a dotoni doto i ’bukuli mukök; mete, a malaikatat ’bo ’yi lepeŋ kulya ko lepeŋ adi, Ŋine ki ko nyesi.

6 A nye boŋgi boŋga, mete, a ambata na pelo ko ŋurupö logon a nama pape na ko tuli lo pioŋ gwe kanyit i kwe nyona. A nye nyesi nyesu a möji möju, a pirikine kak köti.

7 A malaikatat lo MATAT ŋor.i ŋo köti daŋ tomurek, a ’bo ’yi lepeŋ kulya adi, Ŋine ki ko nyesi kogwon jölö inot a duma.

8 A nye ŋine ŋien, a nyesi nyesu, a möji möju, a nye jölöjine perok merya iŋwan ko riŋit na ŋilo kinyo tojo ko mere lo Ŋun logon a Orebe.

9 A nye ’dure i nene kuggi nyu, a möŋdi kata; mete, a kulyaet lo MATAT ŋoki ko lepeŋ adi, Eliya, do koŋdya nyo ni?

10 A nye waddi adi, Töili liŋ gwon ko pusök i kulya kunök ŋon MATAT Ŋun lo kurumi; kogwon ŋutu ti Yisaraele aje paju tomoret inot, a dukakiŋdye piritön kunök ’yuresi ti rubaŋgajin kak, a tatuje nebijin kulök ko baŋdujin; a nan geleŋ tuŋ lo pitun-dye; a se köti ga ’yi tatuja nan.

11 A nye kulyani adi, Lupöni kaŋo, ko gwo ’de i mere ki ko MATAT i komor. Mete, a MATAT gwe i lwöpöddu, a köbuŋöt duma logon ko riŋit luggi merya a gwagwalaggi ŋurupö kase ko MATAT i komor ka ’de ka ’de, ama MATAT ’bayin i köbuŋöt; a i mukök na köbuŋöt a gwe a rigirigi, ama MATAT ’bayin i rigirigi;

12 A i mukök na rigirigi, a gwe a kimaŋ, ama MATAT ’bayin i kimaŋ; a i mukök na kimaŋ a gwe a gworö lo taliŋ adi lii.

13 A gwe sona, a Eliya ko yiŋge, a nye muŋge komor nanyit ko boŋgo nanyit duma nagon a muit, a nye luŋene kaŋo a gwo ’de i lupet na nu kuggi. Mete, a gworo pipije lepeŋ adi, Eliya, do koŋdya nyo ni?

14 A nye waddi adi, Töili liŋ gwon ko pusök i kulya kunök ŋon MATAT Ŋun lo kurumi; kogwon ŋutu ti Yisaraele aje paju tomoret inot, a dukakiŋdye piritön kunök ’yuresi ti rubaŋgajin kak, a tatuje nebijin kulök ko baŋdujin; a nan geleŋ tuŋ lo pituŋdye; a se köti ga ’yi tatuja nan.

15 A MATAT kulyani ko lepeŋ adi, Iti, yitöni ko kiko ilot tojo ko yöbu na Damaseke; a ko do a ’dur nyu, a do mo welakiŋdye Kajaele a mor lo Suria;

16 a do mo welakiŋdye Yeu ŋuro lo Nimisi a mor lo Yisaraele; a do welakiŋdye Elisa ŋuro lo Sapat lo Abele-mekola a nebi anyen ruddya do.

17 A mo gwe sona adi nye logon lwökuŋdyö mugun i baŋdu lo Kajaele lo, a Yeu mo tatuje lepeŋ; a nye logon lwökuŋdyö mugun i baŋdu lo Yeu lo, a Elisa mo tatuje lepeŋ.

18 Ama nan mo kökölökin mugun ŋutu aliŋan buryo ti Yisaraele, kweja adi ŋutu liŋ logon a ko rugwuŋö ko Bala i komor logon kutusen kase a ko ’biyuŋdya lepeŋ i twöju na lepeŋ kilo.


Ŋun a luŋgu Elisa i gwon a nebi

19 A Eliya ŋiörö ŋiörö nyu, a ryeji Elisa ŋuro lo Sapat kukuŋu, keŋoddu dwönin logon a toraki murek murek i gwolor kurisi puök wot murek, a Elisa lo tiyuddi dwönin ti gwuluŋi topuök wot murek kulo. A Eliya lwöŋöddi kanyit nyona, a gubakiŋdye boŋgo nanyit muit ko Elisa loki.

20 A nye kö ’yi kulu dwönin, a wöki ko Eliya i mukök, a kulyani adi, Kölörö nan i roman ko baba koyaŋgo, a kirut nan de kepoddi do. A Eliya waddi adi, Yitöni bot, nan a konakin do nyo?

21 A Elisa kö ’yi keŋoddu lepeŋ, a ’dumuŋdye dwönin lo gwon ko gwuluŋi kulo, a ’duŋge se, a deŋi lokore nase ko kaden kurisi ti kilu dwönin, a tiŋdi kulu ŋutu, a se nyesi nyesu. A nye ŋine ŋien a kepoddi Eliya, a kitakiŋdye lepeŋ.

Bari Bible © United Bible Societies, 1979.

Bible Society in South Sudan
ကြှနျုပျတို့နောကျလိုကျပါ:



ကြော်ငြာတွေ