1 Moran 15 - Bibilia Buk na Ŋun nagon koti luŋu a

Tumatyan na Abiyam

¹ A Abiyam suluje gwon a kasaranit lo Yuda i kiŋa topuök wot budök na gwoŋdi Yerobama ŋuro lo Nebat a mor nu.

² A nye saŋi Yerusalema yu ko kiŋajin musala. A karin ti ŋote nanyit gwe a Maka ŋuro na Abisaloma.

³ A nye wöröni i kiko lo toronjin liŋ nagon monye lonyit a kon a kokwe kunu; a töili lonyit tine gwon rigwo ko MATAT Ŋuro lonyit gwak, gwoso na gwoŋdi töili lo Dawidi merenye lonyit nu.

⁴ Nyenagon kogwon kulya ti Dawidi, MATAT Ŋun lonyit a tiŋdu kötumit nanyit gwon gwoso lombo Yerusalema yu, anyen ŋuro lonyit ’biliki ki kanyit i mukök i togwi ’dikiŋdya na Yerusalema go;

⁵ kogwon Dawidi a koŋdya ŋo na rigwo ko MATAT i metet, a gwe a ko giran i nene ŋo nagon nye a sarakin lepeŋ i perok liŋ ti gwiliŋit nanyit, ama tuŋ a giran i kulya ti Uriya ŋuto lo Kiti.

⁶ A i nu diŋit na gwoŋdi Rabama nu, a mörö gwe kata i kiden nase ko Yerobama perok liŋ.

⁷ A pitönö ti konesi ti Abiyam, ko ŋo liŋ nagon nye a kon, kine ’bayin a se nagon a wuröki i Buk na Dekat ti moran ti Yuda le? A mörö gwe kata i kiden na Abiyam ko Yerobama.

⁸ A Abiyam dotoni ko merenyejin kanyit; a se nuŋge lepeŋ i köji na Dawidi. A Asa ŋuro lonyit lo ruddye tumatyan nanyit.

Tumatyan na Asa

⁹ A Asa suluje gwon a kasaranit lo Yuda i kiŋa tomerya murek na gwoŋdi Yerobama a mor lo Yisaraele,

¹⁰ a nye saŋi Yerusalema yu ko kiŋajin merya iŋwan wot geleŋ. A karin ti yakanye nanyit gwe a Maka ŋuro na Abisaloma.

¹¹ A Asa koŋdi ŋo na rigwo ko MATAT i metet, gwoso na koŋdi Dawidi merenye lonyit nu.

¹² A nye riköddi kaŋo i ŋilu jur ŋutu lyan logon totoluŋ ko ’börik gwoso keri kwakwaset lose lo nyömue, a nye joŋgi kaŋo nyömuejin liŋ nagon merenyejin kanyit a teten kune.

¹³ A nye köti ’dumaddi Maka yakanye nanyit kaŋo i pirit nanyit anyen gwon ti bula a yakanye mor, kogwon nye a tetenakiŋdya kaden ti mian logon a Asera nyömue nagon a nagoŋ; a Asa tukukiŋdye ŋinu nyömue kak, a ’yuŋe lepeŋ i loro Kidirona.

¹⁴ Ama piritön kwakwasesi na gwon i ko ’dulan ti merya kune a ko turö kak. Ma ’di sona a töili lo Asa gwe rigwo ko MATAT gwak i perok liŋ ti gwiliŋit nanyit.

¹⁵ A nye joŋdi i kadi na MATAT pödö, ko dakaŋ, ko toro ’bo liŋ nagon nye ko monye lonyit a gelakin MATAT kune.

Asa a töjulin ko Ben-adada

¹⁶ A mörö gwe kata i kiden na Asa ko Basa mor lo Yisaraele! perok kase liŋ.

¹⁷ A Basa mor lo Yisaraele iti i mörö ko Yuda, a nye ’duŋge Rama anyen nye teŋgu ŋutu i ŋo kaŋo kode i luŋö ko Asa mor lo Yuda yu.

¹⁸ A kirut Asa joŋgi pödö ko dakaŋ liŋ nagon a pitwe i tukwörien na ’dela a ti kadi na MATAT ko i tukwörien na ’dela a ti kadi na mor, a tiŋdi se i könisi ti köliŋönök kanyit; a mor Asa sonyoddi se ko mor lo Suria yu logon a Ben-adada ŋuro lo Tabirimon ŋuro lo Kejiyon, logon si ’da Damaseke, takiŋdya na lepeŋ,

¹⁹ adi, Ti yi koŋö tomoret ko do gwoso nagon köju kata kiden na baba ko munyi nu. Soŋinana nan sunyukiŋdyö do pödö ko dakaŋ; nyenagon ti do iti i ’beleŋgu na tomoret inot ko Basa mor lo Yisaraele anyen nye böŋö mijörö kaŋo köyö.

²⁰ A Ben-adada iŋge yiŋ kulyaesi ti mor Asa, a nye soŋdi dumalak ti teŋon ti kamörök kanyit anyen mörö ko köjinö ti Yisaraele, a se te ’yi Iwon, ko Dan, ko Ebele-bete-maka, ko Kinerot liŋ, se ko jur liŋ lo Napatali.

²¹ A gwe sona a Basa ko yiŋge kine kulya, a nye kö ’yi ’duggo Rama, a si ’dani Tiresa.

²² A mor Asa toreaddi lore i ŋutu liŋ ti Yuda, a lele gwe ’bayin logon bubulö renya, a se yekaddi ŋurupö ko kaden logon Basa a ’duŋge Rama kulu; a mor Asa ’duŋge Geba na Benyamina ko Misepa ko kilo ŋurupö ko kaden.

²³ a pitönö liŋ ti konesi ti Asa, ko riŋit nanyit liŋ, ko ŋo liŋ nagon nye a kon, ko köjinö nagon nye a ’duk kunu, kine ’bayin a se nagon a wuröki i Buk na Dekat ti moran ti Yuda le? Ama a nye gwe ko mokosi lorok i tomodoŋan nanyit.

²⁴ A Asa dotoni ko merenyejin kanyit, a se nuŋge lepeŋ i pirit nuket na merenyejin kanyit i köji na Dawidi merenye lonyit; a Yosapata ŋuro lonyit lo ruddye tumatyan nanyit.

Tumatyan na Nadaba

²⁵ A Nadaba ŋuro lo Yerobama suluje gwon a kasaranit lo Yisaraele i kiŋa tomurek na gwoŋdi Asa a mor lo Yuda nu; a nye saŋi Yisaraele ko kiŋajin murek.

²⁶ A nye koŋdi ŋo nagon a naron ko MATAT i metet, a nye wöröni i kiko lo monye lonyit, ko i toron nanyit nagon nye a tiŋdi Yisaraele i toroŋdya na.

²⁷ A Basa ŋuro lo Akiya, lo kötumit na Yisakar momori a Iwon i mwön ko lepeŋ; a Basa tatuje lepeŋ Gibeton yu nagon a na ŋutu ti Pelesete; kogwon Nadaba ko Yisaraele liŋ gwon i gombu na Gibeton.

²⁸ A Basa tatuje lepeŋ i kiŋa tomusala na gwoŋdi Asa a mor lo Yuda nu, a nye ruddye tumatyan nanyit.

²⁹ A gwe sona nagon nye gwe a mor nu, a nye tatuje kötumit liŋ na Yerobama; a nye gwe a ko pitun lele jörun lo kötumit na Yerobama, tojo ko nye a togirökin ŋutu ti ŋinu kötumit adi sit, gwoso kulyaet lo MATAT logon nye a jam ko köliŋönit lonyit Akiya Silotyo i kutuk lu.

³⁰ Kine kulya a ŋokin kogwon toronjin ti Yerobama nagon nye a toroŋdi ko köti a tiŋdu Yisaraele i toroŋdya kune, köti kogwon nye a towoŋa MATAT Ŋun lo Yisaraele.

³¹ A pitönö ti konesi ti Nadaba, ko ŋo liŋ nagon nye a kon, kine ’bayin a se nagon a wuröki i Buk na Dekat ti moran ti Yisaraele le?

³² A mörö gwe kata i kiden na Asa ko Basa mor lo Yisaraele i perok kase liŋ.

Tumatyan na Basa

³³ A i kiŋa tomusala na gwoŋdi Asa a mor lo Yuda nu, a Basa ŋuro lo Akiya suluje gwon a kasaranit lo Yisaraele liŋ Tiresa yu, a nye saŋi ko kiŋajin merya murek wot iŋwan.

³⁴ A nye koŋdi ŋo nagon a naron ko MATAT i metet, a nye wöröni i kiko lo Yerobama, ko i toron nanyit nagon nye a tiŋdi Yisaraele i toroŋdya na.