1 Moran 12 - Bibilia Buk na Ŋun nagon koti luŋu a

Kötumitön ti Yisaraele a renya sara

¹ A Rabama iti Sekeme, kogwon Yisaraele liŋ a momoraddu nyu i tiŋdu na lepeŋ a mor.

² A gwe sona, na yiŋge Yerobama ŋuro lo Nebat kine kulya nu (kogwon lepeŋ nyuŋ gwon Ejipeto, i nu pirit na wöggiri nye kaŋo ko mor Solomona i komor nu), a kirut Yerobama yitweni bot Ejipeto ’yu.

³ A lepeŋat sonyoddi ŋuto i luŋgu na lepeŋ; a Yerobama ko momoret liŋ na Yisaraele iti ko Rabama yu, a kulyani ko lepeŋ adi,

⁴ Munyi köju a sobba yi ko ŋo na pömöni, nyenagon sopinana kone pa ’de ’de na sopet na pömöni nanyit kayaŋ loki na kita nago na tin munyi yi köju nu, a kirut yi de kitaki-ŋdye do.

⁵ A nye kulyani ko lepeŋat adi, Iti ta, ko ŋoŋdi ta koyö ni i mukök na perok musala. A kirut ŋutu kulu iti tu.

⁶ A mor Rabama iti i denuŋdya na jujuwet na ’but ko ŋutu muduŋin logon köju a kitakiŋdya Solomona monye lonyit nagon nye nyuŋ gwon kata nu, a nye pipije se adi, Ta ŋona bubulö jujuja nan ada anyen nan waddu kilo ŋutu?

⁷ A se kulyani ko lepeŋ adi, Ko do de gwon a köliŋönit lo kilo ŋutu i lo lor i kitakiŋdya na se, a jamakiŋdye se kulyaesi lo ’but na waddi do se nu, a se de kirut gwe a köliŋönök kulök ŋupi.

⁸ Ama lepeŋ ti yeye jujuwesi nagon ŋutu muduŋin a toyiyikin lepeŋ kunu, a iti i denuŋdya na nene jujuwet ko ŋwajik teton, logon a ber kanyit ko a kitakiŋdya lepeŋ kulo.

⁹ A nye pipije se adi, Nan jujuwet nagon ta yiyikin yi anyen yi waddi kilo ŋutu logon a pija nan, adi ti nan kone pa ’de ’de sopet nagon monye lio köju a sopakin se nu?

¹⁰ A kilo teton logon a ber kanyit kulo waddi lepeŋ adi, Do de jambu sona ko kulu ŋutu lo kulya ko do adi, Munyi aje sobba yi pömöni nagon ti do kone pa ’de ’de sopet nikaŋ, a do de waddi se adi, Morinet lio lo ’dit a lobot lwölwöŋ temet na mukök na baba.

¹¹ Nyenagon ma ’di baba aje sobba sopet nasu pömöni, nan de kolum ’ya ’ya sopet nasu. Baba aje ’biddyö ta ko kurubasi, ama nan de ’biddyö ta ko putalan logon tomöŋ gwoso koja na kito.

¹² A Yerobama se ko ŋutu liŋ iti ko Rabama yu i mukök na perok musala, gwoso na kulyari mor nu adi ti se yitöni ko lepeŋ yu i mukök na perok musala.

¹³ A mor waddi kulu ŋutu ko tukaŋan, a gwe a ko yeye jujuwesi nagon ŋutu muduŋin a toyiyikin lepeŋ kunu,

¹⁴ ama a nye kölumbö jambi ko lepeŋat gwoso jujuwesi ti ŋwajik teton adi, Baba aje sobba ta pömöni, ama nan de kölum ’ya ’ya sopet nasu; baba aje ’biddyö ta ko kurubasi, ama nan de ’biddyö ta ko putalan logon tomöŋ gwoso koja na kito.

¹⁵ A mor tine yiŋ kilu ŋutu; kogwon ŋinu gwe a löpuket na kulya nagon aje ŋo ko MATAT anyen nye böŋö koŋdya kulyaet lonyit, logon nye a jamakin Yerobama ŋuro lo Nebat ko Akiya Silotyo i kutuk.

¹⁶ A ŋutu liŋ ti Yisaraele ko meddi adi mor ti yiŋ se, a se nyökökiŋdye mor ruket adi, Kulya kaŋ a nyo ko Dawidi ŋuro lo Yisai? Yi ’bak nene lomore ko lepeŋ. Ta ŋutu ti Yisaraele, yitöni ta kasu i midijik! Ta ŋutu ti Dawidi, sopinana meddi ta kötumit nasu. A ŋutu liŋ ti Yisaraele reara kase i midijik.

¹⁷ Ama a Rabama gwe a kasaranit lo ŋutu ti Yisaraele logon si ’da i köjinö ti Yuda kulo.

¹⁸ A mor Rabama sonyoddi Adoram, logon a kametanit lo ŋutu lo ri ’diki i kita kulo kase yu, a ŋutu liŋ ti Yisaraele gugumbe lepeŋ ko ŋurupö, tojo ko nye a twan. A mor Rabama nyoŋgi kija i arabia lonyit lo jirikö, a wöki Yerusalema.

¹⁹ Nyena a ŋutu ti Yisaraele renyani kötumit na Dawidi tojo ko lo lor.

²⁰ A gwe sona a ŋutu liŋ ti Yisaraele ko yiŋge adi Yerobama aje yitwe, a se sonyoddi ŋuto i luŋgu na lepeŋ kase i momoret; a tiŋdi lepeŋ a mor lo Yisaraele liŋ. A lele ŋuto gwe ’bayin lo kebbu nyakwariat ti Dawidi, tuŋ ŋutu ti kötumit na Yuda ka ’de.

²¹ A Rabama ko ’dure Yerusalema, a nye momori ŋutu liŋ ti kötumit na Yuda, se ko kötumit na Benyamina, anyen mörö ko kötumit na Yisaraele, i nyökökiŋdyö na Rabama ŋuro lo Solomona a mor lose, a se kenani a kamörök lo wulwe aliŋan mia geleŋ ko merya budök.

²² A kulyaet lo Ŋun ŋoki ko Semaya ŋuto lo ŋun;

²³ adi, Kulyani ko Rabama ŋuro lo Solomona, mor lo Yuda, ko kötumit na Yuda ko na Benyamina liŋ ko pitönö ti ŋutu,

²⁴ adi, MATAT a kulya sona adi, Ta ti tu i mörö ko luŋösurök logon a ŋutu ti Yisaraele. Ti ŋutu liŋ iti kase i midijik, kogwon ŋina ŋo a ŋo köyö. A se iŋge yiŋ kulyaet lo MATAT a yitöni bot kase i midijik, gwoso na kulyari MATAT nu.

Yerobama a nyomöddu ŋutu ti Yisaraele i toron

²⁵ A Yerobama ’duŋge Sekeme i jur lo merya ti Epuraima, a si ’dani nyu; a nye yuörö kaŋo nyu a ’duŋge Penuele.

²⁶ A Yerobama yeyeji kanyit i töili adi, Tumatyan de yiyitwe bot i kötumit na Dawidi i na diŋit.

²⁷ Ko kodyö kilo ŋutu a tu i ’duŋgö na rubaŋgajin i kadi na MATAT Yerusalema yu, a töilyet kase mo löpuköddi ko matat lose logon a Rabama mor lo Yuda, a se mo tatuje nan a mo yitöni ko Rabama mor lo Yuda yu.

²⁸ A mor iŋge denuŋdya jujuwet ko ŋutu kanyit, a nye teteŋdi kaja murek logon a dakaŋ. A nye kulyani ko ŋutu ti Yisaraele adi, Ta ŋutu ti Yisaraele, ta aje wörö Yerusalema ko diŋit a najo. Ŋunyen kasu makulo, logon a joŋdya ta kaŋo i jur lo Ejipeto.

²⁹ A nye tiŋdi tagwok geleŋ Betele, a tiŋdi tomurek Dan.

³⁰ A ŋina ŋo ŋoŋdi a toron, kogwon ŋutu a tu i kwakwaddu na lu tagwok lo gwon Betele a köti iti tojo ko Dan i kwakwaddu na lele lo.

³¹ A nye köti ’duŋge kadijik kwakwasesi i ko ’dulan ti merya, a nye wuluŋdye koanejin i kiden na ŋutu liŋ abur logon ti gwon a kötumit na Lewi.

³² a Yerobama teteŋdi rorwe i perok puök wot mukanat ti yapa tobudök gwoso rorwe lo gwon Yuda, a nye ’duŋge rubaŋgajin i pirit ’yuret na rubaŋgajin. A nye koŋdi sona Betele, i ’duŋökiŋdyö na kaja rubaŋgajin, logon nye a teten kulo. A nye tiŋdi koanejin Betele a ti piritön ko ’dulan ti merya nagon nye a teten kune.

³³ a nye kije ki i pirit ’yuret na rubaŋgajin nagon nye a teten Betele nu, i perok puök wot mukanat ti yapa tobudök, i yapa logon nye a yeyeji kanyit i töili; a nye tetenakiŋdye ŋutu ti Yisaraele rorwe, a kije ki i nu pirit ’yuret na rubaŋgajin i ’yuŋa na bökur.