1 Moran 1 - Bibilia Buk na Ŋun nagon koti luŋu a

Abisaga Ŋarakiŋdya mor Dawidi

¹ A mor Dawidi gwe a modoŋ ko kiŋajin jore; a ma ’di se a muk lepeŋ ko boŋgwat ama a mugun nanyit tine yuk.

² Nyenagon a kölipö-nök kanyit kulyani ko lepeŋ adi, Ti nene ŋuro nagon a ’diet galakine do mor duma likaŋ, ko ti lepeŋ gwe a kölipönit inot pon mor anyen gwon a kametanit inot; ti nye dotoni konut i kido, anyen mugun inot boŋo yuyuk, pon mor duma likaŋ.

³ A kirut se ga ’yi nuro nake i koresi liri ti Yisaraele, a se ryeŋdi Abisaga ŋuro na po Sunem, a joŋdi lepeŋ ko mor ni.

⁴ A ŋinu ŋuro gwe a nake parik, a nye gwe a kametanit na mor, a parakiŋdye lepeŋ; ama mor a ko dotori lepeŋ.

Adoniya morga tumatyan

⁵ A Adoniya ŋuro lo Kagita bu ’ye mugun, a kulyani adi, Nan de lo poki a mor; a nye tetenakiŋdye mugun arabia-jin lo jijiko ko ŋutu kajoŋak ti kusanjin, ko ŋutu merya mukanat logon wokon kanyit ŋerot.

⁶ A monye lonyit gwe a ko towoŋa lepeŋ i nene diŋit i kulya adi, Ko kwe na nyo do a koŋdya sona? Adoniya koti a ŋuto lokwelwelen parik; lepeŋ a loponi lo Abisaloma.

⁷ A nye tomoruŋdye kine kulya kase Yöaba ŋuro lo Seruya ko koane Abyatar; a se kepoddi Adoniya a parakiŋdye lepeŋ.

⁸ Ama a koane Sadok, ko Benaya ŋuro lo Yoyada, ko nebi Natana, ko Simei, ko Rei, ko ŋutu walan ti Dawidi gwe a ko morakiŋdya ko Adoniya.

⁹ A Adoniya ’duŋge köbilu ko öwönin ko kolojik lopir a rubaŋga nyona ko ŋurupit lo munu lu, lo gwon nyona ko Ene-rŋgele lu, a nye luŋgi luŋasirik kanyit liŋ logon a ŋwajik ti mor, ko ŋutu lokukwon liŋ ti Yuda logon a köliponök ti mor,

¹⁰ ama nye a ko luŋ nebi Natana, kode Benaya, kode ŋutu walan kulo, kode luŋaser lonyit Solo-mona.

¹¹ A kirut Natana pipije Bateseba ŋote Solomona adi, Do a ko yiŋ le adi Adoniya ŋuro lo Kagita gwe a mor a Dawidi duma likaŋ gwe a ko den na?

¹² Nyenagon po, boŋo ti nan jamaki do nene yeyeet i lwökuŋdyö na ru inot ko na ŋuro ilot Solomona.

¹³ Iŋgo luponi soŋinana ko mor Dawidi yu, kulyani ko lepeŋ adi, Pon mor duma lio, do köju ’bayin lo milyekiŋdyo ’dupiet inot adi, Solomona ŋuro ilot mo lo gwon a kasaranit konut i mukök, a nye mo lo si ’dakine i si ’daet inot na mor le? A kirut kwe a nyo nagon Adoniya lo gwe a mor?

¹⁴ Mete, nagon do nyuŋ jajambu ko mor nu, a nan koti de lo luponi konut i mukök anyen nyonyobba i kilo kulyaesi kulok.

¹⁵ Nyena a Bateseba luponi ko mor yu kanyit kadi dotoet (mor a modoŋ parik, a Abisaga ŋuro na po Sunem gwe i kitakiŋdya na lepeŋ).

¹⁶ Bateseba dulakine kak a twoji mor. A mor pipije adi, Gwon ada, do ko kulya?

¹⁷ A lepeŋ waddi nye adi, Pon duma lio, do a milyekiŋdyo ’dupiet inot i ’diŋdya na MATAT ŋunilot adi, ŋuro ilot Solomona mo lo gwe a kasaranit konut i mukök, a nye mo lo si ’dakine i si ’daet inot na mor.

¹⁸ Nyena mete, soŋinana Adoniya aje tiŋdu mugun a mor, a do gwe a ko den pon mor duma lio.

¹⁹ Lepeŋ kolum aje ’duŋgo dwönin ko kolojik lopir, ko köbilu jore a rubaŋga, a nye aje luŋgu ŋwajik liŋ ti mor, ko koane Abyatar, ko Yöaba duma lo kamorok; ama lepeŋ a ko luŋ köliponit ilot Solomona.

²⁰ Nyena pon mor duma lio, konyen ti ŋutu ti Yisaraele liŋ diŋa do i takiŋdya na se ko ŋa de lo ruddya si ’daki konut i si ’daet pon mor duma lio.

²¹ Kode luŋa a mo gwe sona, adi i diŋit nagon do mor duma lio gwe i nuka ko mere-nyejin kulök yu nu, a nan ko ŋuro lio Solomona yi mo lo kenani a katoronyak.

²² Nyena mete, nagon nye nyuŋ jajambu ko mor nu, a nebi Natana lo lupöni lukata.

²³ A se takiŋdye mor adi, Nebi Natana malo. A nagon nye aje lupe lukata ko mor i komor nu, a nye dulakine kak ko komor nanyit ko mor i komor.

²⁴ A Natana pipije adi, Pon mor duma lio, do a kulya le adi, Adoniya mo lo gwe a kasaranit konut i mukök, a nye mo lo si ’dakine i si ’daet inot na tumatyan?

²⁵ Kogwon lepeŋ aje dudula-ra kak i lo lor, ko aje ’duŋgö dwönin, ko kolojik lopir, ko köbilu jore a rubaŋga, ko aje lupuŋdya ŋwajik liŋ ti mor, ko dumalak ti kamorok, ko koane Abyatar; ko mete, lepeŋat soŋinana gwe i nyesu ko i möju kanyit i komor kulya adi, Ti mor Adoniya si ’dani ŋupi!

²⁶ Ama nye a ko luŋ nan kölipönit ilot, ko koane Sadok, ko Benaya ŋuro lo Yoyada, ko kölipönit ilot Solomona.

²⁷ Do mor duma lio ŋona lo yiyiuŋdyö kine kulya le? Do ti jamakin koliponök kulök ko ŋa mo lo ruddya si ’daki konut i si ’daet?

Solomona a ’boroki a mor

²⁸ A kirut mor Dawidi nyobbi adi, Luŋuki ta nan Bateseba. A nye poŋdi kanyit i komor, a gwo ’de ko mor i komor.

²⁹ A mor milyeji milyeju kulya adi, ’Diri gwak gwoso na gwoŋdi MATAT na, logon aje lwökuŋdyö ru nio kaŋo i delyaesi liŋ lo,

³⁰ ’diri a nan de koŋdi sona i lo lor, gwoso nagon nan a milyekin do i ’diŋdya na MATAT ŋun lo Yisaraele na adi, ŋuro lio Solomona mo lo gwe a kasaranit köyö i mukök, a lepeŋ mo lo ruddye si ’daki köyö i si ’daet na tumatyan.

³¹ A kirut Bateseba dulakine kak ko komor nanyit, a twoji mor kulya adi, Ti mor Dawidi duma lio si ’dani ŋupi!

³² A mor Dawidi kulyani adi, Luŋuki ta nan koane Sadok, ko nebi Natana, ko Benaya ŋuro lo Yoyada. A se kirut poŋdi ko mor i komor.

³³ A mor kulyani ko se adi, Joŋgi ta kölipönök kwe nan duma losu, ko tiŋdi ta ŋuro lio Solomona i wörö köyö i kaine loki, ko nyömöddi ta lepeŋ kak tojo Gikon;

³⁴ ko ti koane Sadok ko nebi Natana welakiŋdye lepeŋ nyu a mor lo Yisaraele; a kirut ta kuddye tore, a kulyani adi, Ti mor Solomona si ’dani ŋupi!

³⁵ A kirut ta mo kipuŋdye lepeŋ, a nye mo poŋdi a si ’dakine köyö i si ’daet na tumatyan; kogwon nye mo lo ruddya nan i gwon a mor; nan aje wulokiŋdyo lepeŋ i gwon a kasaranit lo Yisaraele ko lo Yuda.

³⁶ A Benaya ŋuro lo Yoyada nyobbi mor adi, Ti gwe sona. Ti MATAT ŋun ilot pon mor duma lio, ti jambi sona!

³⁷ Ti MATAT gwe ko Solomona, gwoso na gwoŋdi nye ko do pon mor lio na, ko ti nye töduma ’yi si ’daet nanyit lwölwöŋ si ’daet inot pon mor Dawidi duma lio.

³⁸ Nyena a koane Sadok, ko nebi Natana, ko Benaya ŋuro lo Yoyada, ko kamörök logon a Kereti ko Peleti kulo iti kak, a tiŋdi Solomona i wörö ko kaine na mor Dawidi, a nyömöddi lepeŋ Gikon.

³⁹ A koane Sadok ’dumuŋdye uŋguri lo welet i kemia lukata, a welakiŋdye Solomona. A kirut se kuddye tore; a ŋutu liŋ kulyani adi, Ti mor Solomona si ’dani ŋupi!

⁴⁰ A ŋutu liŋ kepoddi lepeŋ kukutaddu kili ’bajin, ko lyölyöŋön ko nyola a duma, nyena a kak iŋge gwogwoŋga ko woŋon nase.

⁴¹ A Adoniya ko kömu kanyit liŋ kulu yiŋge ŋina woŋon nagon se tutuŋge nyesu nu. A nagon Yöaba ko yiŋge woŋon na tore lu a lepeŋ pipije adi, ŋinu woŋon duma köji kata yu kweja nyo?

⁴² A nagon nye nyuŋ jajambu nu, mete, a Yonatana ŋuro lo koane Abyatar lo ’dure; a Adoniya kulyani adi, Lupuŋdye lukata, kogwon do a ŋuto lokoŋ, do joŋdya lore lo ’but.

⁴³ A Yonatana waddi Adoniya adi, Kölu-mbö mor Dawidi duma likaŋ aje tiŋdu Solomona a mor.

⁴⁴ A mor aje soŋdu ko lepeŋ i pirit na geleŋ koane Sadok, ko nebi Natana, ko Benaya ŋuro lo Yoyada, ko kamorok logon a Kereti ko Peleti; a se aje tiŋdu lepeŋ i wörö i kaine na mor loki;

⁴⁵ a koane Sadok ko nebi Natana aje welakiŋdya lepeŋ a mor Gikon yu; a lepeŋat iŋge poŋdya nyu ko lyöŋön, a ŋutu ti köji woŋoro ki. Nye ŋina woŋon duma nagon ta a yio na.

⁴⁶ Ko köti Solomona lu si ’da ko mor i si ’daet.

⁴⁷ Köti kölipönök ti mor aje po i ’boroja na mor Dawidi duma likaŋ adi, Ti ŋun ilot tiŋdi karin ti Solomona i kuörö parik lwölwöŋ kunok, ko ti kone tumatyan nanyit a duma lwölwöŋ inot. A mor duladdi mugun i dotoet loki.

⁴⁸ A mor köti kulyani adi, Ti MATAT ŋun lo Yisaraele purani pura, logon a tiŋdu lele ŋuro lio i ruddya na tumatyan nio i lo lor lo, a nan nyuŋ memet ko konyen kwe na.

⁴⁹ A kirut kömu lio ti Adoniya boböŋdi böböŋdu, a ŋine ŋien, a ŋutu lio geleŋ geleŋ ŋadi iti kanyit i kiko.

⁵⁰ A Adoniya gwe ko kujönö i kulya ti Solomona, a nye ŋine ŋien, a iti tu, a morgi go pogwora ti pirit ’yuret na rubaŋgajin.

⁵¹ A kine kulya iŋge nyö-nyököki Solomona adi, Mete, Adoniya kukujönö do mor Solomona; kogwon meddi, lepeŋ aje morga go oŋgwora ti pirit ’yuret na rubaŋgajin kulya adi, Ti mor Solomona milyeki nan a kokwe adi nye mo ti rembu nan kölipönit lonyit.

⁵² A Solomona kulyani adi, Ko lepeŋ koŋdya mugun a ŋuto lo yiyiniki a lele kupiret lo kwe nanyit gwe ti ’dukin kak asut; ama ko toron a rye kanyit a nye mo tatatua.

⁵³ Nyena a mor Solomona sonyoddi ŋutu, a se joŋdi Adoniya kak i pirit ’yuret na rubaŋgajin. A nye poŋdi a twoji mor Solomona; a Solomona kulyani ko lepeŋ adi, Iŋgo, iti konut mede.