1 Korinto 8 - Bibilia Buk na Ŋun nagon koti luŋu a

Kulya ti kinyojin lo wuki nyomuejin logon a ŋunyen

¹ Nan ŋilo waddu i kulya ti kinyojin logon wuki nyomuejin logon a ŋunyen kilo. Ta kulya adi, Yi lio gwon ico denesi. ’Diri a gwak. Deŋdya na kulya tiŋdu ŋuto i bu ’ya na mugun, ama nyaŋu gweyuŋdya ŋuto ki.

² Ko lele ŋuto yeyeju adi nye deden kulya, lepeŋ nyuŋ ti den kulya gwoso ŋuto logon ’diri a lokoŋ.

³ Ama ŋuto logon nyanyar ŋun lo, ŋun deden lepeŋ.

⁴ Nyena i kulya ti nyesu na kinyojin lo wuki nyömuejin, yi deden adi nyomue ’diri ti gwon jorun, tuŋ yi deŋdya adi kulye ŋunyen ’bayin, ama ŋun kata geleŋ.

⁵ Ma ’di ködyö kulye ŋo kata ki yu ko kak ni logon ŋutu luŋ adi se a ŋunyen, ma ’di kilo ŋunyen se ko kimak kata jore,

⁶ ama kayaŋ i swot yi a yup adi Ŋun geleŋ kata, logon ŋo liŋ pipiluŋdya ko lepeŋ, logon yi gwon jörun anyen gwon a kanyit lo. Köti yi a yup adi Matat geleŋ kata logon a Yesu Kristo, logon ŋo lio a gweya i tomirian nanyit, ayi gwe jorun kanyit i mugun lo.

⁷ Ama ’bayin a ŋutu liŋ logon deden kine kulya, ama kulye kayupök kata ma ’di tojo ko lo lor logon nyuŋ yeyeju nyömuejin adi a ŋo gwak. Nyena ko se nyesu kinyo, a se yeyeji adi ŋilo kinyo a wuki nyömue, a iŋge tolut se, kogwon töilyet kase denesi a lomunyak.

⁸ Kinyo ti joŋ yi ko Ŋun yu; koyi a ko nyesu yi ti gwon a lorok ko lepeŋ i komor, a koyi a nyesu a yi tine gwon a lo ’but.

⁹ Ama kunyar ta an ’buruki nasu kopuŋgo ŋutu lomunyak i yupet kilo.

¹⁰ Ama do logon a ŋuto lo deden kulya lo, ko lele ŋuto logon toili lonyit denet alomunyan lo a met do i nyesu i kadi na nyomue, a ŋina ŋona ti parakin lepeŋ i nyesu na kinyo logon a wuki nyomuejin ’bak kujönö le?

¹¹ Nyena deŋdya inot na kulya kökör ŋuto lomunyan i yupet, ŋilo a luŋaser ilot logon Kristo a twan kogwon kulya kanyit lo.

¹² Nyena na toroŋdi ta luŋösurök lo yubbö, a böŋöddi töilyet kase denesi logon a lomunyak kulo nu, a ta toroŋdi Kristo.

¹³ Nyenagon ko kinyo tiŋdu luŋaser lio lo yubbö lo i ’doro, a nan mo köti tine nyesu lokore kwöŋ, an nan to ’doro ’yu luŋaser lio.