1 Korinto 12 - Bibilia Buk na Ŋun nagon koti luŋu a

’Dokesi nagon Mulokotyo Loke ’doggi ŋutu kase i töilyet

¹ Nyena luŋasirik kwe, nan ti ’bön ta dyadya ’yu i kulya ti ’dokesi ti Mulökötyo nagon ’dokarikin ŋutu kase i töilyet kune.

² Ta deden adi, na gwoŋdi ta köju a paganojin nu, a ta iŋge jiköji i kikolin ka ’de ka ’de i kwakwaddu na nyömuejin logon a mumutön.

³ Nyenagon nan ’de ’dekan ta kukurun adi, lele ŋuto ’bayin logon Mulökötyo lo Ŋun lo tujambu lepeŋ adi, Ti Yesu lömöni lömö. Köti lele ŋuto ’bayin logon bubulö kulya adi, Yesu a Matat, ake ko Mulökötyo Loke lo tujambu lepeŋ.

⁴ Mulökötyo Loke katinunit kata geleŋ logon ’dogga ŋutu kase i töilyet ko ’dokesi ka ’de ka ’de.

⁵ Matat geleŋ lo kitaki ama i kikolin ka ’de ka ’de.

⁶ Ŋun geleŋ lo tokitaju kitajin ka ’de ka ’de ko ŋutu liŋ geleŋ geleŋ i mugunya.

⁷ Mulökötyo Loke a kweki ŋutu liŋ geleŋ geleŋ anyen se böŋö ryeju ’bulit.

⁸ Mulökötyo Loke titiŋdu ŋuto i jambu a lokoŋ, köti nye geleŋ titiŋdu lele i jambu deden kulya.

⁹ Mulökötyo lo geleŋ lo titiŋdu ŋuto i yubbö, a köti nye lo geleŋ lo tiŋdi lele ŋuto riŋitön tolikesi ti ŋutu.

¹⁰ Mulökötyo lo geleŋ lo titiŋdu ŋuto riŋit konet na sörösi, a tiŋdi lele ŋuto riŋit i tuggö na kulya nagon Ŋun a jamakin lepeŋ, a tiŋdi lele riŋit i gwulu ’yu na mulökö ka ’de ka ’de, a tiŋdi lele riŋit i rurutuŋdya na kulya i kutuk na gwon ka ’de, a tiŋdi lele riŋit i nyönyöggu na kutusen na gwon ka ’de.

¹¹ Ŋilo a Mulökötyo lo geleŋ lo kikita i kine ŋo liŋ, a gwelakiŋdye i ŋutu liŋ geleŋ geleŋ gwoso na ’deggi nye na.

Mugun a ŋo geleŋ ama gwon ko swötön jore

¹² Kogwon gwoso na gwoŋdi mugun na ŋuto a ŋo geleŋ a köti gwe ko swötön jore na, ama kilo swötön liŋ ti mugun logon jore kilo a mugun geleŋ, nyena a Kristo köti gwe sona.

¹³ Kogwon yi liŋ kode Yudayaki, kode ŋutu ti kulye jurön, kode ’dupi, kode lui, yi a batisaki i ŋilo Mulökötyo lo geleŋ, a gwe a mugun geleŋ, a yi liŋ möji i ŋilo Mulökötyo lo geleŋ lo.

¹⁴ Mugun na ŋuto ti gwon ko swöt geleŋ ka ’de, ama gwon ko swötön jore.

¹⁵ Ko ködyö moköt a kulya adi, Nan ’bayin a könin, kweja adi nan ’bayin a lo mugun. A ko sona, lepeŋ ’diri ’bayin a lo mugun le?

¹⁶ A ko ködyö swöt kulya adi, Nan ’bayin a koŋe, kweja adi nan ’bayin a lo mugun. A ko sona, lepeŋ ’diri ’bayin a lo mugun le?

¹⁷ A ko ködyö mugun liŋ na ŋuto gwon a koŋe, a nye ködyö yiŋge ada? A ko mugun liŋ ködyö gwon a swöt, a nye ködyö moji ada?

¹⁸ Ama Ŋun a tiŋdu swötön liŋ ka ’de ka ’de i mugun gwoso nagon nye ’de ’deggi na.

¹⁹ A ko ködyö swötön liŋ gwon a swot geleŋ ka ’de, a nye ködyö gwe a mugun ada?

²⁰ Ama ’diri swötön jore kata, ama mugun a ŋo geleŋ.

²¹ Nyenagon a koŋe tine bulö kulya ko könin adi, Nan ti ’bön do, kode köti a kwe tine kulya ko mokosi adi, Nan ti ’bön ta.

²² ’Bayin sona, kölumbö kilo swötön logon meta a lomunyak kilo ’de ’dekarikin parik i mugun.

²³ Nyena swötön ti mugun logon yi yeye adi ti bula parik kilo yi kölumbö bubu se parik. A swötön ti mugun logon meta ti kwelen kilo kölumbö tokwelenyoni tokwelenyo bia parik,

²⁴ ama swötön logon kwekwelen kilo ti ’dekarikin tokwelenyo. Ama Ŋun a tetenakin mugun na ŋuto anyen swötön logon lalawe kulo böŋö bubula,

²⁵ anyen mugun ködyö gwon ti kökoroja, ama anyen swötön liŋ ka ’de ka ’de ködyö gwon i tuparakin ko ’börik.

²⁶ Ko lele swöt lo mugun mimien, a mugun liŋ mine mien, a ko lele swöt lo mugun a bula, a mugun liŋ lyöŋi lyöŋön.

²⁷ Nyena ta a mugun na Kristo, a ta liŋ geleŋ geleŋ gwe a swötön ti mugun nanyit.

²⁸ Nyena i kanisa, Ŋun a tiŋdu luyökie a togeleŋ, a tomurek gwe a nebijin katokuök, a tomusala gwe a katodinök ti Kulyaet lo Ŋun, a kirut gwe a kakonak ti sörösi, a gwe a ŋutu logon a tiki riŋitön tolikesi ti ŋutu, a gwe a se logon parakiŋdya kulye ŋutu, a gwe a ŋutu logon bubulö meddya kitajin, a gwe a ŋutu logon jambu ko kutuk na gwon ka ’de.

²⁹ Lepeŋat liŋ a luyökie le? ’Bayin. Lepeŋat liŋ a nebijin le? ’Bayin. Lepeŋat liŋ a katodinök le? ’Bayin. Lepeŋat liŋ kokoŋdya ŋo sörösi le? ’Bayin.

³⁰ Lepeŋat liŋ a ’doka ko riŋitön tolikesi le? ’Bayin. Lepeŋat liŋ jajambu ko kutusen na gwon ka ’de le? ’Bayin. Lepeŋat liŋ ŋona bubulö nyönyöggu kine kutusen le? ’Bayin.

³¹ Nyenagon be ’yi ta ’dokesi nagon a ti ŋerot kune. Ama nan ’dek kwekiŋdya ta kiko lo ’but bia parik.