1 Korinto 10 - Bibilia Buk na Ŋun nagon koti luŋu a

Paulo a kukuju ŋuto i kulya ti nyömuejin logon a punyen

¹ Luŋasirik, nan ’de ’dekan ta deden adi, merenyejin kaŋ liŋ ti ’beron a mukö ko luru, a lepeŋat liŋ iŋge lapaddu i Tör Nator,

² a lepeŋat liŋ iŋge batisa i luru ko i tör lukata a kakepok ti Mose.

³ A se liŋ iŋge nyesu kinyo lo geleŋ logon po ki,

⁴ a lepeŋat liŋ iŋge möju pioŋ na geleŋ nagon po ki, kogwon lepeŋat möju i lurutat logon Ŋun lo tiŋdu, logon köju a moraddu ko se lu. Ŋilo lurutat a Kristo.

⁵ Ma ’di sona, Ŋun a ko lyöŋön ko lojore kase, a jore kase iŋge twatwa, a öpuö kase parasake i yöbu na sese.

⁶ Nyenagon kine kulya liŋ a pokin kayaŋ a kweyesi i tokujöŋdu na yi, an yi be ’ya po narok, gwoso na ’beyi se nu.

⁷ An ta ko kwakwaddu ta nyömuejin gwoso kulye kase, gwoso na wurörikin nu adi, Ŋutu a si ’daki kak i nyesu ko i möju, a ŋine ki i gwoja.

⁸ Ti yi gwe ti towutön gwoso na koŋdi kulye kase köju nu, a ŋuto aliŋan merya murek wot musala iŋge twatwa i lor geleŋ.

⁹ Ti yi gwe ti möŋu Kristo, gwoso na koŋdi kulye kase nu, a munuö iŋge tatatu lepeŋat.

¹⁰ An ta ko wiwinya ta gwoso na wiwinyari kulye kase nu, a malaikatat Katatuanit iŋge tatu se.

¹¹ Kine kulya liŋ a konaki lepeŋat a kweyesi, a iŋge wuröki kak i tokujöŋdu na yi, kogwon yi gwolor i diŋit nagon ’dutet gwe nyona ko po.

¹² Ŋuto logon yeyeju adi nye gwogwo ’dan go lo, ti nye meddi ’bura an nye ’doro.

¹³ Nene mörit ’bayin na pokin kasu lwölwöŋ na pokin i ŋuto liŋ. Ŋun yiyiniki i po liŋ, a lepeŋ mo tine kölökin ta i tema lwölwöŋ riŋit nasu, ama lepeŋ mo kwekwekin ta kiko logon ta rwöddi kaŋo i ŋina mörit kata, anyen ta bubulö poŋga.

¹⁴ Nyenagon ta julin kwe lo nyanyara kulo, paji ta kwakwaddu na nyömuejin logon a punyen kilo.

¹⁵ Nan ŋilo jambu ko ta gwoso ŋuto lotolokok, nyena lilije ta ko ’börik kulya na jam nan kune.

¹⁶ Kopo nagon yi mömöji na i diŋit nagon yi tiŋdu Ŋun tinate i mukök na nyesu na rorwe nu, yi ŋona ’bayin paruŋdya rima ti Kristo le? A na pipiŋdye yi ambata nu, yi ŋona ’bayin paruŋdya mugun na Kristo le?

¹⁷ Kogwon ambata geleŋ kata, kweja adi a yi logon jore kilo gwe a mugun geleŋ, kogwon yi liŋ paŋu ambata geleŋ.

¹⁸ Yeyeji ta po na kon ŋuto ti Yisaraele. Se lo nyesu rubaŋgajin kilo paruŋdya po nagon wuki Ŋun i pirit ’yuret na rubaŋgajin, ti gwon sona le?

¹⁹ a kirut nan jambu kulya nagon a ti nyo? Adi kinyo lo wuki nyömuejin a nene po le? Kode adi nyömue ŋona a nene po?

²⁰ ’Bayin, nan a ko jambu sona. Nan kulya adi, Rubaŋgajin logon paganojin wuwukin kilo a ti mulökö lorok, ’bayin a ti Ŋun. Nan ti ’bön ta paŋu nene po ko mulökö lorok.

²¹ Ta ti bulö matuŋdya i kopo na Matat ko köti i kopo na mulökö lorok. Ta ti bulö nyesu i misa na Matat ko köti i misa na mulökö lorok.

²² yi ŋona ’de ’dekan tiŋdu Matat i yulön? Yi ŋona kata ko riŋit a duma lwölwöŋ nanyit le?

²³ Ta kulya adi, Yi a lui i koŋdya na po liŋ. Iŋkoi, yi ’diri a lui, ama po liŋ ti parakiŋdya. Yi ’diri a lui, ama po liŋ ti gweyuŋdya ŋuto ki.

²⁴ Ti lele ŋuro gwe ti ga ’yu kulya kanyit, ama ti nye ga ’yi kulya ti marate lonyit.

²⁵ Ta bubulö gwöruŋdyö po liŋ abur i pirit gwörit na lokore a nyesi se ’bak pipija kode a po na toron.

²⁶ Kogwon kak na a na Matat se ko po liŋ na gwon i lukata nanyit kune.

²⁷ Ko lele ŋuro logon ’bayin a kayupönit a luŋgu ta i kinyo, ko ta ’de ’dekan tu, nyesi ta po nagon a tiki kasu i komor kune ’bak pipija kode a po na toron.

²⁸ Ama ko lele ŋuro a takiŋdya ta adi, Ŋilo a kinyo logon a wuki nyömuejin, an ta ko nyö ta ŋilo kinyö, kogwon kulya ti ŋuro lo takiŋdya ta sona lo, se ko i kulya ti töili denet lo toron—

²⁹ kweja adi, ti gwon a töili ilot denet lo toron, ama a lo ŋilo ŋuro lo tukökiŋdyö do ŋilo. Kode do pija adi, Nyo nagon töili lo lele ŋuro denet lo toron teŋgu nan i gwon a luitöt i nyesu abur?

³⁰ Ko nan a paruŋdya ŋilo kinyo ko lyöŋesi, a nyo nagon lele ŋuro yuyuggö nan kogwon kinyo logon nan aje tiŋdu Ŋun tinate kogwon nye lo?

³¹ Waset lio gwon sona adi, Kode ta nyenyesu, kode mömoju, kode koŋdya nyo, koŋdi ta po liŋ i bu ’ya na Ŋun.

³² An ta ko koŋdya ta nene po nagon tuköpuggö Yudayaki, kode ŋuto ti kulye jurön, kode kanisa na Ŋun.

³³ Gwoso na möŋi nan i tulyöŋgu na ŋuto liŋ i po liŋ nagon nan kökon kune. Nan ti yeyeju kulya kwe, ama nan yeyeju kulya ti ŋuto liŋ anyen se böpö lwölwökö.