Tushimpi 7 - Baibo Busansulushi Bwa Libuku Ili

¹ Omwanaangu koibaluka maswi angu akusunga milawo yangu mumoyo wako.

² Kokonkela nsheenkwaambila, ingaawo ukabe abuumi. Ulame kabotu nsheentookwiisha bweenka mboolama liinso lyako.

³ Unokweendaasho nshiku shoonse bweenka mboofwala ninga kulyaansa lyako. Ncakwiila ulyeelete kushilemba mumoyo wako.

⁴ Waambile busongo ayi, “Uli nankashi shangu” alimwi utumbe maano akunyumfwisha shintu ayi, “Mukwesu.”

⁵ Ingaawo shikakufune kuswa kumwanakashi shibulale akumwanakashi muka mwiine waamba maswi ayungoola basankwa.

Kucenjesha mwanakashi mufuule

⁶ Bumwi bushiku kaanyimfwi muŋanda yangu, ndakasondela pambwelyo ya njiyo.

⁷ Mpeeke ndakabona basankwa baanji bataaku ncebeshi, sombi ndakalabilila cikula bwangu womwi utacite maano.

⁸ Wakalinga kuya bweenda mumukwakwa akushika pafwaafwi aŋanda ya mwanakashi umwi.

⁹ Musankwa uyo wakalinga kuya bweenda mumuntu ngulya, lisuba ndilyakapilabo, ee, ndikwakashiyabo.

¹⁰ Mpeeke mwanakashi ulya wakaswa kuya mukumukumanya, wakalinga kufwete cabufuule kaacite muyeeyo womwibo.

¹¹ Wakalinga mwanakashi shikubweka, utacite nsoni alimwi utakali panshi, ushikwiingooka.

¹² Sunu inga wacanika mumukwakwa, ciilo kumusena ucanika bantu baanji, isona nkucanika pamampambaanwa a nshila kaalindilila basankwa.

¹³ Mpomunyaawo wakamucata, wamufyonta kaabongelabongela akumwaambila ayi,

¹⁴ “Ndapa mulambu wabwanabwankashi sunu akucita kweelana ambondakashomesha cakulumbila,

¹⁵ Aboobo ncendesita mukukukumanya. Ndalema kukuyandoola, ono ndakucana.

¹⁶ Abwalo bulo bwangu ndabuyala ansaalu shiteshimite shakaswa kucishi ca Ijipiti.

¹⁷ Ndabusanseela mafuta anunkila kabotu eetwa ayi mule, amwi ayi aloyi aamwi ayi sinamoni.

¹⁸ Tiya tuceshe katulya nkwela, tulisangalashe sobeene alusuno.

¹⁹ Beebaangu tabako kuŋanda. Baya pamushinso ulaamfu.

²⁰ Batolelela ampotomona iswite maali ncakwiila balaakwisa paakwiinda nsondo shobilo.”

²¹ Musankwa uyo wakakomwa kumaswi akwe ayungoola. Ee, wakayungoolwa ceebo ca mulaka wa mwanakashi uyu.

²² Peenkabo apo musankwa uyo wakamukonkela cakukulikwabo anga niŋombe itooya mukucaikwa. Ndushinisho cakubabo anga ngumunyama utooya mukucatwa mumwaando

²³ kushikila lisumo lya pulinkana mulini lyakwe. Wakalingabo anga nkayuni katooya mukakuka cakuteshiba ayi katooya mukuloba.

²⁴ Ono nobana bangu, amunkutike. Amuteye matwi kusheesho nsheentokwaamba.

²⁵ Mutasuminishi mwanakashi wamushobo uyo kumutolela myoyo yanu nabi kulubila munshila shakwe.

²⁶ Mwanakashi wa mushobo uyo wanyonyoola basankwa baanji, abalo mbwaacaisha tabakoonshi kubelengwa.

²⁷ Ŋanda yakwe ninshila itola kulufu. Njenshila isutula kuya kumusena wa bafu.