Tushimpi 26 - Baibo Busansulushi Bwa Libuku Ili

¹ Bweenka caandwa mbocisaya mainsa, nabi mfula ciindi cakutebula, mbweeke ubo bulemu mbobusaya kumuluya.

² Mashingo taakoonshi kukucisa na taakweelete. Ee, alaba anga mbayuni balelembabo, sombi cakutekalaawo.

³ Bweenka maaki ambongolo mbosheelete kucailwa mbweeke ubo alakwe muluya mbwaaelete kucitwa.

⁴ Utakumbuli muluya kweelana abuluya bwakwe ceebo awebo inga wabetamo muluya.

⁵ Kumbula muluya kweelana abuluya bwakwe ceebo inga walibona ayi ngumusongo mumeenso akwe mwiine.

⁶ Kutuma muluya makani cilibo anga nkulitimbula mweendo, nabi kuliletela mapensho.

⁷ Bweenka myeendo ya mulema mboitacite ncito, mbweeke ubo kashimpi mumulomo wa muluya mbokabete.

⁸ Kulemeka muluya kulibo anga nkubika libwe mumalekeni.

⁹ Bweenka cakolwa mbwaatakataka kulibangula myuumfwa mulyaansa lyakwe, mbweeke ubo myaambo ya busongo mbweebete mumulomo wa muluya.

¹⁰ Unjisha ncito muluya nabi shikwiinda, uli anga ngumuntu ucita ciyaseyase amifwi yakwe.

¹¹ Bweenka kabwa mbwaaboolela mukulya shakulya nshaaluka, mbweeke ubo muluya mbwaabooshaawo kucita shabuluya.

¹² Muntu ulibeca kuba musongo kaateshi musongo ngumuluya kwiinda muluya wiinda pabaluya boonse.

¹³ Mutolo ncaataswiti muŋanda ulaamba ayi, “Muli nkalamu mumukwakwa. Nkalamu ikali ifwite nsala itokwiindaana munshila.”

¹⁴ Bweenka cisasa mboceenshekwa cakutaswa nkocicata mbweeke ubo mutolo mbwaasalooka pabulo bwakwe cakutaswaawo.

¹⁵ Bamwi bantu mbatolo cakufwa, cakwaamba ayi balaalilwa akulilisha.

¹⁶ Mutolo ulayeeya ayi lakwe ulicite maano kwiinda basongo bosanwe abobilo beenga baamba miyeeyo yabo akupa busansulushi bubotu.

¹⁷ Shikwiindabo uyo unjila mumakani ngaacanabo, ulibo anga ngumuntu ucata kabwa kumatwi.

¹⁸ Bweenka mushilu mbwaawaala shishiki sha mulilo nabi mifwi iyoosha

¹⁹ mbweeke ubo muntu wiinda kumaano mubye akwaamba ayi, “Ndalinga kusekanabo,” mbwaacita.

²⁰ Na kwabula nkuni, mulilo ulashimika. Mbweeke ubo na taaku bufuyishi, kwaambana kulamana.

²¹ Bweenka makalangasha mbwaamota, nabi nkuni kuciiko mboshinyaka, mbweeke ubo amuntu shiluta mbwaasongaanya nkondo.

²² Maswi akufuya alibo anga ncakulya cibotu alimwi alenjila mukati lya mubili mwiine.

²³ Bweenka nongo yakaboteshekwa asilifa uteshi wa makwebo, mbweeke ubo muntu waamba shibotu mumoyo kooyeeya bubi mbwaabete.

²⁴ Muntu waamba nshaataciti ulashisa lupato lwakwe mukwaamba makani abotu, sombi mumoyo kaacite muyeeyo ubiibi.

²⁵ Nakubi kwaamba ayi mubandi wakwe ngubotu sombi mutamunyumfwili ceebo moyo wakwe uliswitebo miyeeyo ibiibi.

²⁶ Muntu uyo inga washisa lupato lwakwe kwiinda mububeshi, sombi bubi bwakwe bulaakuba patuba pakati ka bantu.

²⁷ Na muntu ukaba cilindi, ulaakuwitaamo mwiine. Alyalo libwe lilaboolela wooyo utolikunkulusha.

²⁸ Muntu ubeca ulapata baabo mbwaabekesha. Mulomo waamba shabubeshi ulalengesha kunyonyoolwa.