Tushimpi 2 - Baibo Busansulushi Bwa Libuku Ili

Shilambu shicanwa mubusongo

¹ Omwanaangu, konyumfwila maswi angu akusunga milasho yangu mumoyo wako.

² Koteya matwi kushintu sha busongo akubika moyo wako mukushinyumfwisha.

³ Kolilila kuba alushibo akusenga kuba amaano akunyumfwisha shintu.

⁴ Koshiyandoola cankusu bweenka mbooyandoola silifa, ee, koshiyandoola bweenka mbooyandoola buboni bushisitwe.

⁵ Lyalo ulaakwishiba kuloonda Mwaami Lesa alimwi ulaakuba alushibo loonse lwa pali Lesa.

⁶ Ceebo nguMwaami Lesa upa busongo, kuli nguwe nkokuswa lushibo amaano akunyumfwisha shintu.

⁷ Lakwe ngoolengesha baluleme kukoma alimwi ndiyawo lya baabo batacite kampenda.

⁸ Ngootabilila nyendelo sha bantu bacita shiluleme. Ee, ngootabilila nshila sha baabo bashomeka.

⁹ Lyalo ulaakwishiba kucita shintu shiluleme, koombolosha cakululama alimwi cakubula kasalulushi. Nkokwaamba ayi ulaakwishiba shibotu shoonse nshooelete kucita.

¹⁰ Ceebo ulaakuba musongo alimwi lushibo lulaakukuletela kukondwa.

¹¹ Kucita shintu sheelete kulaakukutabilila, maano akunyumfwisha alaakunookufuna.

¹² Busongo bulaakukupulusha kunshila sha bamucita shibi. Ee, kukupulusha kubantu baamba shintu shileta mapensho.

¹³ Bulaakukupulusha kubantu bakaka kwikala munshila shiluleme, bantu basuni kweendela munshila sha munshinshe.

¹⁴ Bantu abo balasangalalila mukucita shilubo akukondwa mubuluya bwa bubi.

¹⁵ Baleenda munshila shisendeme bwikaalo bwabo mbwa nshila shabucenjeshi.

¹⁶ Busongo bulaakukupulusha kuswa kumwanakashi mufuule, ee, mwanakashi utabete kabotu uyo waamba makani akunyengelela.

¹⁷ Mwanakashi uyo wakashiya ibaye wa kubumoye bwakwe akuluba cipangano ncaakapanga pameenso akwe Lesa.

¹⁸ Ŋanda yakwe ilatola kulufu anshila shakwe shilatola kumusena wa bafu.

¹⁹ Taakuuwo nabi womwi uya kumwanakashi uyo uboola alimwi. Ndushinisho taabooliwo tubili kunshila ya buumi.

²⁰ Paceebo ceeci koendela munshila sha bantu bali kabotu akukonkela nshila sha baluleme.

²¹ Ceebo baluleme mbweshi bakekale mucishi. Ee, batacite tumpenda mbweshi bakanookalaamo.

²² Sombi balo bamucita shibi balaakukashikwa kwikala mucishi cabo, abo batashomeki balaakukushikwa mucishi ico.