Tushimpi 12 - Baibo Busansulushi Bwa Libuku Ili

¹ Muntu usuni kululikwa, ingayi ulisuni lushibo, sombi uyo utasuni kululikwa, ingayi ngumuluya.

² Mwaami Lesa ulanyumfwila nkumbu muntu kabotu, sombi ulashingana baabo bapanga miyeeyo ya bubi.

³ Muntu taakoonshi kwiimikana cakushimpa mububi, sombi muntu ululeme ncakwiila uleemikana cakushimpa.

⁴ Mwanakashi ucite mibo ibotu uli anga ngumushini kuli ibaye, sombi mwanakashi ulensha nsoni ibaye uli anga mbulwashi bwa mumafuwa kuli nguwe.

⁵ Miyeeyo ya baluleme ili kabotu, sombi kupanda maano kwa bamucita shibi nkwabubeshi.

⁶ Maswi a bamucita shibi ngabucayi, sombi shaamba baluleme shilafuna bantu.

⁷ Bamucita shibi balanyonyoolwa cakubula kushiya bamulunyungu lwabo, sombi bamuŋanda ya muntu ululeme balaba abuumi.

⁸ Na muntu ulicite busongo, bantu balamulumbaisha, sombi na muntu taacite maano, bantu balamusebaanya.

⁹ Ncibotu kuba muntubo ulicanina cakulya kwiinda mukulisebensela kwiinda kulibika peculu akufwa nsala.

¹⁰ Muntu ululeme ulalama kabotu shifubwa shakwe, sombi mucita shibi ulashisebensesha calunkutwe.

¹¹ Mulimi ulima cankusu ulatebula shiinji, sombi abo basowa ciindi cabo kushintu shitacite ncito, mbaluya.

¹² Bamucita shibi balisuni sheesho nshebacana mumicito yabo, sombi baluleme balaakushimpa anga ncisamu catola miyanda panshi peene.

¹³ Mucita shibi ulalicatisha mukoose ka maswi akwe abiibi, sombi muntu ushomeka ulalikusha mumakatasho.

¹⁴ Shiswa pamulomo wa muntu nsheshimuletela shintu shibotu bweenka mbuli milimo yakwe mboimulambula.

¹⁵ Muluya ulayeeya ayi nshaacita shililuleme, sombi musongo ulanyumfwila nshaafundwa.

¹⁶ Na muluya wakalala ulafwambaana kutondesha bukali bwakwe, sombi ucenjete uloongulushabo na watukanwa.

¹⁷ Kamboni ushomeka ulaamba shalushinisho, sombi kamboni mubeshi ulaambabo shakubeca.

¹⁸ Maswi abiibi alayasa kumoyo anga ngumupeeni, sombi maswi aamba musongo alashilika.

¹⁹ Lushinisho lulakalilila lyoonse alyoonse, sombi bubeshi bulafwambaana kwishibwa.

²⁰ Mumyoyo ya bantu bayeeya kucita shibiibi muli bubeshi, sombi abo bacita shintu shileta luumuno balaakusekelela.

²¹ Taakuuwo makatasho apolela muntu ululeme, sombi bamucita shibi balatambula mapensho lyoonsebo.

²² Mwaami Lesa ulipatite milomo ibeca, sombi ulasangalalila mubantu baamba shalushinisho.

²³ Muntu ucenjete ulashisa lushibo ndwaacite, sombi baluya balaambabo caambaambe.

²⁴ Maansa a muntu usebensa cankusu alalela, sombi butolo bulapa muntu kufubwa.

²⁵ Kulisukama kulalengesha muntu kuungumana, sombi maswi a nkumbu alalengesha kusangalala.

²⁶ Muntu ululeme ulatondesha babye nshila ibotu, sombi mucita shibi ulabalubya.

²⁷ Muntu mutolo teshi akacane nshaasuni, sombi muntu usebensa cankusu ulacana buboni buunji.

²⁸ Bululami ninshila itola kubuumi, sombi bubi ninshila itola kulufu.