Tobiti 6 - Baibo Busansulushi Bwa Libuku Ili

Tobyasi wacata nswi

¹ Mpomunyaawo Tobyasi wakanyamuka pantu pomwi amunjelo alakwe kabwa wakwe wakamutolelela. Bakaya boonse bobilo, lyalo ndipakashiyabo bakoona pafwaafwi a mulonga wa Tigilisi.

² Ndibakashikabo Tobiti uyo wakeendililabo kuya kumulonga ayi asambe kumyeendo. Ciswi cakooluka kuswa mumaanshi, kacisuni kumina cimpanta cakwe. Musankwa uyo wakalila cakoolobesha.

³ Munjelo uyo wakamulwiita ayi, “Cicate ciswi ico, cicatishe!” Musankwa uyo wakacata ciswi ico, wacikwelela kwitala.

⁴ Lyalo munjelo uyo wakaamba ayi, “Citulule ciswi ico, ukushemo ndulwe, moyo alini, akushibika kabotu. Sombi maala ancico wasoowe. Ndulwe, moyo alini, ishi shilacafwa abuumbi.”

⁵ Lyalo musankwa uyo wakapasula ciswi ico. Wakakushaamo ndulwe, moyo alini, kwaamba ayi ashibiike. Kuswaawo bakatenta ciswi ico, balya, shakacaala bakashibika mumwiinyo.

⁶ Pesule bakaya boonse bobilo kuya mukushika pafwaafwi aMediya.

⁷ Lyalo musankwa uyo wakeepusha munjelo ayi, “Webo Asaliya, mukwesu, ino ndulwe, moyo alini shanswi muli musamu nshi?”

⁸ Lakwe wakakumbula ayi, “Nawatenta moyo alini pameenso amuntu musankwa nabi mwanakashi uyo utoopeshekwa ashikaswa nabi mushimu umwi ubiibi, bwiishi bwanshisho bulatandaanya mushimu uyo, alimwi inga tashimupenshiiwo lyobilo muntu uyo.

⁹ Sombi ndulwe nawabika mumeenso amuntu moofu inga tutube twaswaawo.”

Munjelo wakaambila Tobyasi kweeba Saala

¹⁰ Ndibakashika kuMediya pafwaafwi a ndabala inene yaEkibatana,

¹¹ Lafayelo wakaamba yi, “Webo Tobyasi omukwesu,” lyalo lakwe wakakumbula ayi, “Ntoonyumfwa.” Alakwe munjelo wakaamba ayi, “Bushiku bwasunu, tuye tukoone muŋanda yakwe Laguwelo.

¹² Muntu uyo awebo muli bamukowa, alimwi ulicite mwaana mwanakashi, liina lyakwe ngu Saala. Taaciteewo mwaana umwi musankwa nabi mwanakashi, sombi Saala eenkabo. Mooye uyo ngumupyala wako, alimwi ndiwebo noweelete kumweeba ayi abe mukaako. Ulyeelete kutambula buboni bwakwe ubo beeshi mbweshi bakamushiile. Mooye uyo ngumusongo, wamoyo mubotu alimwi ngumubotu abuumbi. Beeshi mbantu babotu.

¹³ Ulyeelete kumweeba mooye uyo. Nyumfwa omukwesu, mashiku sunu ntokwaambaabo beeshi kwaamba ayi webo weebe mwanaabo uyo. Natukaboolele kuLagesi tukacite bwiinga. Ndishi kwaamba ayi Laguwelo inga takoonshi kukukasha nabi kweebesha mwanaakwe kuumwi. Nacaba boobo inga wacana mulandu wakucaikwa, bweenka mbokulembetwe mulibuku lyakwe Mose. Lakwe uyo ulishi ayi weelete kweeba mwanaakwe ndiwe, kuteeshi umwi tau. Ono bulya nyumfwa omukwesu, sunu mashiku tuye tubandike sha mooye uyo akwaamba shakumweeba. Lyalo pakuboolela kuLagesi tukayaakwe kuŋanda yako.”

¹⁴ Lyalo Tobyasi wakakumbula Lafayelo ayi, “Webo Asiliya omukwesu, ndakanyumfwa ayi mwanakashi uyu wakeebwaawo kale kubasankwa bosanwe abobilo, sombi boonse bakafwa mashiku eenka kabatana kukumanaakwe. Wakalinga kucita ayi akale anguwe, wafwa. Ndakanyumfwa kwaamba ayi ngu shikaswa ubacaya.

¹⁵ Shikaswa uyo taakwe mbwaamucita Saala uyo, sombi ulacaya beenkabo basuni kumweeba. Sombi nebo ntooloonda kufwa, ono apa bata bakashalabo ndime neenka, ntooloonda kwaamba ayi bama inga bafwa kucikonko. Ono apa taaku mwaana nabi womwi ukonsha kubabika.”

¹⁶ Lafayelo wakaamba ayi, “Sa totoyeeya shibakakulwiita beeso? Te bakakwaambila ayi ukeebe mwanakashi wamumukowa wabo? Nyumfwa ono mukwesu utapengi asho shashikaswa mubiibi, mweebebo mooye uyo. Nebo ndishi kwaamba ayi sunu mashiku batookupa ayi abe mukaako.

¹⁷ Pakwinjila muŋanda mweeshi woone ubwese lini lyaciswi cilya pantu pomwi amoyo wancico ushibike pamulilo wa Insensi tununkila kabotu uto. Kununkila uko kutookwana koonse koonse. Lyalo shikaswa anyumfwa kununkila utoocica. Ncakwiila shikaswa teshi akayeeko lyobilo kumooye uyo.

¹⁸ Ono mutooni bulo bomwi. Noonse nobilo mutaangune mupaile. Musenge ku Mwaami Lesa Wakwiculu kwaamba ayi akondwe kuli ndimwe akumutabilila. Utaloondi, Lesa wakamulela kwaamba ayi abe wako, awebo ulaakukufuna. Ulaakuyaakwe, alimwi ntookulwiita ayi ulakukushalila baana abo beshi bakabe anga mbakwaanu. Ncakwiila utatonshi, sobwe.”

¹⁹ Lyalo Tobyasi ndyaakanyumfwa Lafayelo kaamba sheeshi, wakashiba ayi Saala wakalinga mukwabo, wakalinga mukwabo kumukowa wa beeshi, wakamusuna abuumbi, kwaamba ayi moyo wakwe wakaala kucata.