Tobiti 5 - Baibo Busansulushi Bwa Libuku Ili

Tobyasi walibambila lweendo

¹ Ono Tobyasi wakakumbula beeshi baTobiti ayi, “Shoonse nshemwaamba ndaakucita, Taa.

² Ino ndaakushibwesa buyani ndalama kumuntu uyo? Lakwe teeshi. Anebo shimushi. Ino ndaakumupa citondesho nshi cakwaamba ayi anshiibe akunshoma, kwaamba ayi amboosheshe ndalama isho? Acimwi, nshila yakuya kuMediya nshishiiwo.”

³ Tobiti wakakumbula Tobyasi mwanaakwe ayi, “Lakwe uyo wakampa nkalata yacipangano cesu, alimwi anebo ndakamupa nkalata iyo njendabika pantu pomwi andalama isho. Ono bulya peenda myaaka makumi obilo kuswa bushiku ndyendakamupa ndalama isho. Ono omwanaangu, uyandoole muntu ushomeka uyo ngweenga wayaakwe kushikila akaboole, lyalo ndyetukamulipile. Ono webo ukapekwe ndalama isho kuswa mumaansa akwe Gabayelo.”

⁴ Tobyasi wakaya mukuyandoola muntu ushi nshila yaku Mediya, ayi ayaakwe. Ndyaakaswabo wakacana anjelo Lafayelo, sombi taakwe kwishiba ayi ngumunjelo wakwe Lesa.

⁵ Wakamwiipusha ayi, “Ino webo omweesuma, kumishaanu nkuli?” Lakwe wakakumbula ayi, “Ndiwomwi wabamakwanu bene Isilaeli, ndesa kokuno mukuyanda ncito.”

⁶ Tobyasi wakamwiipusha alimwi ayi, “Sa nshila ya kuMediya uliishi?” Lakwe wakakumbula ayi, “Ndiishi kabotu. Ndakayaako mankanda maanji, nshila shoonse ndishishi kabotu. Ndakalinga kuya kuMediya lyoonsebo, alimwi ndakalinga kwikala kuli Gabayelo, mukwabesu wakuLagesi, kuMediya uko. Ngumushinso wanshiku shobilo kuswa kuEkibatana ndabala inene kuya mukushika kuLagesi, pakwiinga Lagesi iyo ili pakati kamalundu.”

⁷ Apo Tobyasi wakaamba ayi, “Imikana pano, ndoo. Njee nkalwiite bata, pakwiinga ndisuni kwaamba ayi unshindikile ndaakukulipila.”

⁸ Lakwe Lafayelo wakaamba ayi, “Ncibotu ntookulindila peenka pano, sombi utacelwi.”

⁹ Tobyasi wakeenjila muŋanda, walwiita beeshi ayi, Ndacaana womwi wamulunyungu lwesu lwa Isilaeli uyo wasumina kunshindikila.” Beeshi bakaamba ayi, “Mwiite muntu uyo kwaamba ayi mwishibe mushobo wakwe amukowa wakwe, mbone na ngwalushomo ayi akushindikile webo omwanaangu.”

¹⁰ Tobyasi wakaswa muŋanda akwaamba ayi, “Webo, batookwiita bata.” Mpeeke, Tobyasi wakeenjilaakwe Lafayelo akumwaasha Tobiti ayi, “Mube akusangalala kunene.” Alakwe Tobiti wakaamba ayi, “Ma! Inga ndasangalala buyani? Nebo nemoofu, shiboni cili coonse. Ndekalabo mumunshinshe anga mbafu abo bataboni mumuni. Ndimuumi pabantu bafwite, ndanyumfwa maswi abantu, sombi, bantu abo nshibabooniwo.” Lafayelo wakakumbula ayi, “Mutapengi! Lesa ulaakumushilika onoonobo. Mutatongooki!” Lyalo Tobiti wakaamba ayi, “Mwanaangu Tobyasi ulisuni kuya kuMediya. Sa inga wayaakwe akumulwiita nshila? Ndaakukulipila mukwaabo.” Munjelo wakaamba ayi, “Ee, inga ndayaakwe. Ndiishi nshila shoonse, kuMediya ndayaako lyoonse. Ndakeenda munyika shoonse, amumalundu oonse, ndishishi nshila shoonse.”

¹¹ Tobiti wakamwiipusha ayi, “Mukwaabo, uli wamulunyungu lwa baani ino ulaswa kumukowa uli? Ndwiite mukwaabo.”

¹² Lakwe Lafayelo wakakumbula ayi, “Ino nceebonshi cemutooyandweeta kwishiba mukowa wangu?” Alakwe Tobiti wakakumbula ayi, “Ndayanda kwishiba kabotu na uli mwanaabo baani.”

¹³ Lafayelo wakakumbula ayi, “Ndime Asaliya mwanaakwe Ananiya munene ulya womwi wamumukowa wanu.”

¹⁴ Tobiti wakaamba ayi, “Waboneka, twakutambula amaansa obilo kuno kumisheesu. Utapengi mumoyo ndeepushabo ayi nshibe kabotu sombi ndabona ayi uli shikamukowa wangu wamulunyungu lubotu, wabulemu. Ndishi Ananiya aNatani, baana basankwa bakwe Shemaiya munene. Lakwe twakalinga kuyaakwe kuJelusalemu akupailaakwe pantu pomwi, sombi taakwe kucileka kweenda munshila iluleme. Bakwanu boonse mbantu babotu, balemekwa. Twakutambula kumisheesu kuno.”

¹⁵ Lyalo wakatolelela kwaamba ayi, “Ndaakukulipila ndalama sheelete mwelo wanshiku shoonse pantu pomwi andalama shimwi shiyandika palweendo lwanu, kweelana asheesho nsheshi mpe mwanaangu.”

¹⁶ Shindikisha kabotu mwanaangu uyu, mpeeke ndaakukubikilaawo maali apeculu.

¹⁷ Munjelo uyo wakakumbula yi, “Ntooyaakwe, mutaloondi. Shoonse shitokweendabo kabotu pakuya uko, alimwi tulaakwisabo kabotu pakwiinga nshila iyo tailoondeshi.” Lyalo Tobiti wakaamba ayi, “Coolwe cakwe Lesa cibe pali ndimwe mukwaabo.” Ono wakeeta mwanaakwe, akumulwiita ayi, “Omwanaangu, libambile shalweendo utooya amukwanu uyu. Lesa Wakwiculu amulaame uko akumuboosha kamuli boomi. Munjelo wakwe endaanu akumutabilila.” Pakunyamuka Tobyasi bakamufyofyonta beeshi abanyina. Mpeeke Tobiti wakaamba ayi, “Koya kabotu omwanaangu.”

¹⁸ Banyina bakatalika kulila akulwiita Tobiti ayi, “Ino utokwiitanshi mwanaangu? Te uyu ngomusako wamumaansa esu? Te ngotufunaako uyu?

¹⁹ Ncakwiila, sa te ngamaali ngotubikiteewo moyo. Mali teshi ncintu cinene kwiinda mwaneesu.

²⁰ Buumi mbwaakatupa Lesa mbuunji.”

²¹ Tobiti wakaamba ayi, “Naciyumi naciyumi mwanaangu utooya ulaakwisa alimwi kaalibo kabotu. Ulaakubona webo weenka kwaamba ayi mwanaako ulaakuboolabo kabotu.

²² Webo koumwitebo utatongooki paceeco umukwesu. Munjelo mubotu utooyaabo, lweendo lwabo lulaakubabo kabotu alimwi balaakuboolabo kabotu.” Lyalo banyina bakacileka kutongooka.