Tobiti 4 - Baibo Busansulushi Bwa Libuku Ili

Tobiti mbwaakabula mwanaakwe Tobyasi

¹ Bushiku bweenka ubo Tobiti wakeebaluka maali ngakabikisha kuli Gabayelo uyo wakalinga kwikala kuLagesi, kucishi ca Mediya.

² Mumoyo wakwe wakaamba ayi, “Nebo ndasenga kuli Lesa ayi mfwe, ono ncibotu anjite mwanaangu Tobyasi akumulwiita sha maali ayo kantana kufwa.”

³ Ncakwiila wakeeta mwanaakwe Tobyasi, alakwe Tobyasi wakesa. Tobiti wakamwaambila ayi, “Nankamfwe omwanaangu ukambike mubulemu. Unoolemeka banyoko, alimwi utakabashiiyi nabi bushiku bomwi paciindi cabuumi bwabo. Unoocita shintu shibasangalasha, akutabapeensha mumoyo wabo, sobwe.

⁴ Mwanaangu, unobebaluka banyoko, mukwiinga bakabona mapesho aanji ceebo ca ndiwe paciindi koocili mumala mwabo. Bakufwa akababike pafwaafwi anebo.

⁵ “Tobyasi omwanaangu, koyeeya Mwaami Lesa wesu, uloonde shibiibi shoonse alimwi unoobamba Milawo yakwe. Unoocita milimo ibotu nshiku shoonse amoyo wako woonse, utanookweenda munshila shitaluleme.

⁶ Ulyeelete kwishiba ayi nakoocita shintu shiluleme, ulaakucikonsha pamilimo yako. Lyalo cilaakuba bweenkoobo kuli boonse bakonkela shiluleme.

⁷ “Bantu bapengete unoobapako buboni bwako, pakubapa utakanoofunga lyaansa. Mubiyo woonse upengete utamufutatili, alakwe Lesa teshi akakufutatile.

⁸ Kopa shintu kweelana abuboni ubo mboocite. Nakocite shintu shiinji kopa shiinji, naanshiniini utaloondi kubapaawo natuceyi.

⁹ Bantu balaamba ayi, ‘Kupa nkwaanjika,’ kubika buboni nkubikila bushiku bwamapesho.

¹⁰ Kupa uko kulafuna muumfwa, alimwi kulafuna muntu kwaamba ayi atenjili mumunshinshe.

¹¹ Kupa kwaamushobo uyu kulasangalasha Lesa Shinkusu Shoonse.

¹² “Omwanaangu, koocenjela abanakashi bafuule. Ulyeelete kusala mwanakashi wamumukowa wako. Kuteleesha kweeba mwanakashi mweensu uyo uteeshi shikamukowa wabeeso, mukwiinga swebo tuli baana babalaluki bakulukulu. Ibaluka Nowa, Abulaamu, Isaaki, Jakobo aba boonse abo bakeesa banakashi bamulunyungu lwabo, alimwi Lesa wakabapa coolwe pakubapa baana, nkokwaamba ayi bamashikulubabo mbeshi bakabe beene cishi capaanshi.

¹³ Awebo omwanaangu, kosuna bamakwanu. Utanyanshi bamakwanu, baana basankwa abanakashi beshikamukowa wako, alimwi ukasaale mwanakashi pakati pabo wakeeba. Kulitola peculu ncibiibi abuumbi kulaletela shibiibi amapesho maanji. Butolo bulaletela nsoni abukandu, butolo ubo mbobanyina nsala.

¹⁴ “Unoofolesha muntu uliwoonse weenga wakusebensela mulimo, unoomufolesha bushiku bweenka ubo. Naakosebensela Lesa awebo ulakupekwa cilambu. Omwanaangu, unoosebensa camaano milimo yako yoonse, alimwi abwikaalo bwako boonse bube kabotu mubuumi bwako boonse.

¹⁵ Utakaciti mubyo isho webo nshopatite. Utakanwi waini cakukolwa. Bucakolwa butabi buumi bwako.

¹⁶ “Bansala ubape shakulya, alimwi bafuukilwa ubape shakufwala, naakocite shintu shiinji upeko bakandu, alimwi pakubacafwa koofungulula lyaansa lyako.

¹⁷ “Kopa shakulya shiinji pamalilo abantu basalalite, sombi naangamalila abantu bamucita shiibi atabapiiwo.

¹⁸ “Bwesa busongo kubantu basongo alimwi utasampuli miyeeyo ibotu yeelete kukucafwa. Pashintu shoonse ishi koolumba Mwaami Lesa.

¹⁹ “Kolumbaisha Mwaami Lesa ciindi coonse alimwi kosenga kwaamba ayi akutangilile munshila shako shoonse. Shintu shoonse nshosuni shilakukweendela kabotu. Busongo buli bobulya tabucaniki kubantu bamishobo imwi yoonse. Sombi Mwaami Lesa ngoopa shibotu shoonse, alimwi ulakonsha kutola muntu kucuumbwe mbuli mbwaasuni. Ono omwanaangu koibaluka milasho yeenka iyi, utailuubi mumaano ako.

²⁰ “Ono bulya ndisuni kukulwiita ayi kuli Gabayelo mwanaakwe Gabiliyasi, waku Lagesi mucishi ca Mediya, ndakabikisha ndalama sha silifa shiinda makilogilamu myaanda yotatwe amakumi one.

²¹ Utaloondi omwanaangu pakubona ayi twaba bakandu. Shiba ayi ulicitekale buboni buunji nakoloonda Lesa akuloonda shibiibi, alimwi nakoocita shintu shibotu pameenso a Mwaami Lesa wako.”