Tobiti 3 - Baibo Busansulushi Bwa Libuku Ili

Mupailo wakwe Tobiti

¹ Ndakanyumfwa nsoni mumoyo wangu. Peenke ndakalila akupaila, kulilishaanya kaŋamba ayi,

² “NoBaami Lesa mwebo muliluleme, milimo yanu yoonse ililuleme. Nshila shanu shoonse shankumbu ncakwiila shalushinisho ndimwe mweenka nomoombolosha bantu boonse bamucishi ca paanshi.

³ Paceebo ceeco mwebo Nkambo, munjiibaluke akunanjiilisha. Mutampi mulandu muceebo cakubisha kwaangu. Mpashi mushibiibi shangu shimwi maawe shakutashiba nebo nemwiine, nabi pashibiibi shabamashali bangu bakulukulu.

⁴ Ncancinencine swebo twakamubishisha, twakapwaya milawo yanu. Sombi mwebo mwakatutola kubantu bakesa mukusaala, kututola mubusha amukufwa. Ono twaba bantu basekwa beshikushibulukwa akusebaanishikwa. Mwakabonesha pakati kamishobo yoonse uko nkomwakatutandaanishila.

⁵ “Ono ndasumina koomboloshekwa kwanu kwancinencine, kwakaamba ayi mumpe mulandu washiibi shangu, akubisha kwa bashali bangu, Pakucana ayi tatunyumfwi milawo yanu, tatubi alushomo pameenso anu.

⁶ “Ono amucite shoonse shemusuni kucita, amuncaaye nebo nshiye cishi capaanshi kwaamba ayi mboolele kubulongo. Ncancinencine, ncibotu kufwa. kwiinda kuba abuumi, mukwiinga ndanyumfwa shiinji shakuntukana shiteelete, alimwi ndicite nsoni shiinji. “Nobaami amundekelele kumapesho angu, akushisha kucishi canu camuyayaya. NoBaami mutafutatili ncibotu kwaamba ayi mfwebo, kwiinda kuba abuumi mumapesho abobulya, ndanyumfwa shakunsebaanya shoonse.”

Mapesho akwe Saala

⁷ Pabushiku bweenka ubo Saala, mwanaakwe Laguwelo, uswa kuEkibatana mu cishi ca Mediya, wakatukanwa kasuwa wabeeshi.

⁸ Saala uyo wakalinga weebwaawo kale abasankwa bali bosanwe aobilo. Sombi Asimodeyusi, shikaswa mubiibi uyo, wakabacaya basankwa abo kabatana kukumanaakwe mwanakashi. Kasuwa uyo wakaambila Saala ayi, “Ncakwiila, ulabacaya omwine basankwa bako abo! Bona, wakeebwa kale kubasankwa bali bosanwe abobilo, sombi taaku nabawomwi ngowakacanamo baana.

⁹ Ino utotupesheshanshi swebo ayi mukwiinga bameebayo bakafwa? Bakonkele basankwa bako abo. Ncancinencine teshi ukaboneewo mwaana musankwa nabi mwanakashi wakushala webo omwine!”

¹⁰ Pabushiku weenka ubo Saala wakanyumfwa moyo kucisa akutalika kulila cakulosha aminsonshi. Wakaya mucipinda peculu lya ŋanda ya beeshi, kwaamba ayi alyangilile. Sombi wakayeeya bwangu akwaamba ayi, “Tau ndacileka! Bantu balakusebaanya bata kabaamba ayi, ‘Banene mwebo mwakalinga kucite mwaana womwi eenkabo, uyo ngomwakalinga kusuni abuumbi, sombi wakalicaya paceebo camapesho akwe.’ Ono bata abucembele bwabo ubu, mapesho amushobo uyu balakufwaawo. Sobwe teshi ndicaye. Sombi toosenga kuli Nkambo Lesa kwaamba ayi lakwe ngweshi ansuminishe ayi mfwe, kuteshi kwaamba ayi noncili mumi akunyumfwa maswi aya akunsebaanya!”

Mupailo wakwe Saala

¹¹ Ndyakacita boobo Saala wakeemikana pafwaafwi ambwelyo akutandabika maansa, kutalika kupaila ayi, Mwebo Mwaami Lesa wankumbu, lemekwa! Alilemekwe liina lyako kushikila ciindi camuyayaya Shintu nshewakalenga shikulumbaishe nshiku shoonse.

¹² “Ono ndalanga kwiculu kuli ndiwe.

¹³ Nkushe mucishi cino capaanshi, kwaamba ayi ntanyumfwi alimwi maswi akunsebaanya.

¹⁴ “Webo Mwaami Lesa, ulishi kwaamba ayi shishiiwo musankwa uli woonse.

¹⁵ “Nshinaakusebanyaawo liina lyako nabi liina lya bata muno mucishi ca busha cino. “Ndimo neenka muŋanda ya bata, taaku mwaana umwi bata ngweenga bashiila buboni bwabo. Bata tabacite mukwababo, alimwi nshicite mupyala wangu weenga wanjeba. “Ndakafwitwa basankwa baangu bali bosanwe abobilo, ono ncenshi kalile abuumi ncinshi. Sombi natosuni ayi mfwe, umbete nkumbu kwaamba ayi bantu batanoonsebaanya.”

Lesa wakanyumfwa mipailo yakwe Tobiti a Saala

¹⁶ Ciindi ico Tobiti a Saala ndibakalinga kupaila boobo Lesa wakanyumfwa kusenga kwabo mubulemu bwakwe.

¹⁷ Lyalo Lesa wakatuma Anjelo Lafayelo kwaamba ayi ese ashilike bantu aba bobilo, akashilike Tobiti boofu, kwaamba ayo abone kubala kwakwe Lesa ameenso akwe, alimwi akwisa mukucafwa Saala mwanaakwe Laguwelo ayi eebye kuli Tobyasi mwanaakwe Tobiti, akumutandilako shikaswa mubiibi uya liina lyakwe nguAsimodeyusi. Muceebo ceeco wakalinga kweelete kumweeba ngu Tobyasi eenkabo. Ciindi Tobiti ndyaakaboolela kuswa mulubansa lwa ŋanda yakwe nceciindi alakwe Saala mwanaakwe Laguwelo ndyaakalinga kuseluka kuswa muŋanda yamwiculu.