Shakubelenga 8 - Baibo Busansulushi Bwa Libuku Ili

Kubika malampi

¹ Mpeeke Mwaami Lesa wakaambila Mose ayi,

² “Lwiita Aloni ayi pakubika malampi ali osanwe aobilo pacakubikaawo, ulyeelete kwaabika cakwaamba ayi mumuni ukanooba kunembo.”

³ Aloni wakacita mbomunya ubo, wakabika malampi pacakubikaawo akwaalansha kunembo kweelana aMwaami Lesa mbwaakaambila Mose.

⁴ Kuswa peculu apanshi, cakubikawo malampi cakapangwa kugolodi wakufula kweelana aMwaami Lesa mbwaakabonesha Mose.

Kusalashikwa akubengwa kwa bene Lefi

⁵ Mpeeke Mwaami Lesa wakaambila Mose ayi,

⁶ “Patula bene Lefi kubene Isilaeli boonse alimwi akubasalasha.

⁷ Mukucita boobo, ubasanseele maanshi asalasha akubalwiita ayi bakulule pamibili yabo yoonse alimwi bacape shakufwala shabo. Lyalo ndyeshi banoosalalite kweelana aMilawo.

⁸ Kuswawaawo balyeelete kubwesa mucende mwaana acipo ca fulaulo ciyandika nkokwaamba ayi fulaulo uyo usenkene amafuta a olifi. Awebo ulyeelete kubwesa amucende umwi wa mulambu wakulekelelwa shibiibi.

⁹ Kuboolaawo ukabunganye bene Isilaeli boonse akwiimika bene Lefi kunembo lya Tente ya Cipangano.

¹⁰ Anu mukalete bene Lefi pameenso angu neMwaami Lesa, lyalo bene Isilaeli balyeelete kubika maansaabo pamitwi yabo.

¹¹ Ono Aloni ulyeelete kubabenga kuli ndime ayi ncipo cipuseneeko kuswa kubene Isilaeli kwaamba ayi basebense ncito yangu.

¹² “Bene Lefi balo balyeelete kubika maansaabo pamitwi ya bacende bobilo. Mucende umwi akabengwe kuli ndime neMwaami Lesa ayi ngumulambu wakulekelelwa shibiibi, alakwe umwi ayi ngumulambu wakutenta mukusalasha bene Lefi kweelana amulawo.

¹³ “Lyalo ukabenge bene Lefi ayi ncipo cakutambeeka kuli ndime, akubabika ayi bakanokweendeleshekwa aAloni abana bakwe basankwa.

¹⁴ Munshila iyi ukapatule bene Lefi kubene Isilaeli bamwi boonse kwaamba ayi bakabe baangu.

¹⁵ “Waakumana kusalasha akubenga bene Lefi ayi ncipo cakutambeeka, lyalo ndyeshi bakabe bantu beelete kusebensa muTente ya Cipangano.

¹⁶ Ndabasala ayi babe baangu mumusena wa baana basankwa bakwiiya ba bene Isilaeli boonse, alimwi mbaangu nebo neenka.

¹⁷ Ndindakacaya baana basankwa bakwiiya boonse muIjipiti, ndakalibikila palubasu mwaana musankwa wakwiiya woonse wa mwine Isilaeli alimwi amwaana musankwa wakwiiya wa munyama.

¹⁸ Ono bulya ntoolibikila palubasu bene Lefi mumusena wa baana basankwa bakwiiya boonse ba bene Isilaeli,

¹⁹ alimwi ndabika bene Lefi mumaansaakwe Aloni abana bakwe basankwa ayi ncipo kuswa kubene Isilaeli, kwaamba ayi banoosebensa muTente ya Cipangano mumusena wa bene Isilaeli bamwi alimwi akubalama kumapensho eenga abacitikila na basena pafwaafwi aMusena Usalalite.”

²⁰ Lyalo Mose, Aloni alimwi abene Isilaeli bamwi boonse bakabenga bene Lefi kweelana aMwaami Lesa mbwaakaambila Mose.

²¹ Bene Lefi bakalisalasha akucapa shakufwala shabo, alakwe Aloni wakababenga kuMwaami Lesa ayi ncipo cakutambeeka. Alimwi wakabacitila ashoonse shiyandika kweelana amulawo wakusalasha.

²² Mpeeke bene Lefi bakesa mukucita mulimo wabo muTente ya Cipangano kwiinda mukutanjililwa aAloni abana bakwe basankwa. Bakabacitila shoonse Mwaami Lesa nshaakaambila Mose.

²³ Mpomunyaawo Mwaami Lesa wakaambila Mose ayi,

²⁴ “Ono mwine Lefi musankwa womwi awomwi ucite myaaka ili makumi obilo ayosanwe ayiindaawo ulyeelete kusebensa mulimo muTente ya Cipangano.

²⁵ Sombi pamyaaka ili makumi osanwe, ulyeelete kucileka kucita mulimo uyo.

²⁶ Kuswawaawo inga kaacafwa bene Lefinyina mumilimo yabo muTente, sombi palwaakwe mwiine taacite mulimo wakusebensa nabi womwi. Anu ubo mbomweelete kupa bene Lefi milimo.”