Shakubelenga 7 - Baibo Busansulushi Bwa Libuku Ili

Shipo shakabenga bamatanjilili bene Isilaeli

¹ Pabushiku Mose mbwaakamanisha kuyaka Tente ya Cipangano, wakeenanika mafuta akwiibenga kuMwaami Lesa pantu pomwi ashintu sha njiyo shoonse, kubikaawo acipaililo ashintu sha ncico shoonse.

² Kuswawaawo bamatanjilili ba bene Isilaeli nkokwaamba ayi bamatanjilili ba shipani sha mumikowa yabo abo bakeendelesha shakubelenga bantu,

³ bakaleta shipo shabo kuMwaami Lesa. Bakaleta shikoci shicite shiluli shosanwe acomwi alimwi abasune likumi abobilo, nkokwaamba ayi cikoci kuswa kubamatanjilili boonse bobilo bobilo alimwi amusune kuswa kumutanjilili womwi awomwi. Mpeeke bakashitola kuTente ya Cipangano.

⁴ Mpomunyaawo Mwaami Lesa wakaambila Mose ayi,

⁵ “Tambula shipo ishi ayi nshakusebensesha mumilimo yeshi ikanoocitika muTente ya Cipangano. Ushipe bene Lefi kweelana amilimo njebeelete kucita.”

⁶ Mpeeke Mose wakapa bene Lefi shikoci isho alimwi abasune.

⁷ Wakapa bene Geshoni shikoci shobilo alimwi abasune bone.

⁸ Bene Melali abalo wakabapa shikoci shone alimwi abasune bosanwe abotatwe kweelana ashiyandika mumilimo yabo. Milimo yabo yoonse yakalinga kweelete kunoocitika kwiinda mukutanjililwa aItama mwanaakwe Aloni mupailishi.

⁹ Sombi Mose taakwe kupawo bene Koati shikoci nabi basune mukwiinga shintu shisalalite nshebakalinga kulama nshakunyamwita pashifushi.

¹⁰ Bamatanjilili bakaleta ashipo shakusebensesha pakusekelela kubengwa kwa cipaililo akushipa kunembo lya cipaililo,

¹¹ mukwiinga Mwaami Lesa wakaambila Mose ayi, “Bushiku bomwi bomwi bamatanjilili boonse bananooya womwi womwi mukupa shipo shabo shakusebensesha pakubengwa kwa cipaililo.”

^12-83 Ono pakupa shipo shabo bakakonkana bobulya. Bushiku Mukowa Mutanjilili Bwakutaanguna Juda Nashoni mwanaakwe Aminadabu Bwabili Isaka Netanelo mwanaakwe Suwa Bwatatu Sebuluni Elyabu mwanaakwe Eloni Bwane Lubeni Elisa mwanaakwe Sheduwa Bwasanu Simyoni Shelumyelo mwanaakwe Sulishadayi Bwasanu abomwi Gadi Eliyasafu mwanaakwe Dewelo Bwasanu ashobilo Efuleemu Elishama mwanaakwe Amiyudi Bwasanu ashotatwe Manase Gamalyelo mwanaakwe Pedasa Bwasanu ashone Benjameni Abidani mwanaakwe Gidyoni Bwalikumi Dani Ayiyesa mwanaakwe Amishadayi Bwalikumi abomwi Asha Pagiyelo mwanaakwe Okulani Bwalikumi ashobilo Nafutali Ayila mwanaakwe Enani Anu shipo shakaleta muntu womwi awomwi shakalinga kukoshenye. Womwi awomwi wakaleta mbale ifongomene ya silifa yomwi ilema magilamu ali 1,500, alimwi ambale ya silifa yakusambilaamo ilema magilamu ali 800, kweelana acipimo cakasuminishikwa. Shoonse shobilo shakalinga kuswite fulaulo usenkene amafuta ayi ncipo ca fulaulo. Bakapa ambale ifongomene ya golodi yomwi yakalinga kulema magilamu ali 110 aswite tununkila kabotu. Bakaleta amucende mwaana womwi, mbelele isankwa yomwi, mwanaambelele womwi ucite mwaaka ayi ngumulambu wakutenta, mpongo yomwi ayi ngumulambu wakulekelelwa shibiibi, alimwi abacende bobilo, mbelele shisankwa shosanwe, mpongo shosanwe, abana ba mbelele bosanwe bacite mwaaka ayi ngumulambu wa bwanabwankashi.

^84-88 Nkokwaamba ayi shipo shoonse shakaleta bamatanjilili bali likumi abobilo ayi nshakusebensesha pakubengwa kwa cipaililo shakakumana bobulya. —Mbale shifongomene sha silifa shili likumi ashobilo alimwi ambale shakusambilaamo sha silifa shili likumi ashobilo, pantu pomwi shoonse shakalinga kulema magilamu ali 27,600. —Mbale shifongomene sha golodi isho shakalinga kulema magilamu ali 1,320, isho shakalinga kuswite tununkila kabotu. —Bacende bali likumi abobilo, mbelele shisankwa likumi ashobilo, alimwi ambelele shili likumi ashobilo shicite mwaaka womwi ayi njimilambu yakutenta. —Mpongo shili likumi ashobilo ayi njimilambu yakulekelelwa shibiibi. —Bacende bali makumi obilo abone, mbelele shisankwa shili makumi osanwe alyomwi, mpongo shili makumi osanwe alyomwi, alimwi ambelele shicite mwaaka shili makumi osanwe alyomwi ayi njimilambu ya bwanabwankashi.

⁸⁹ Ono Mose ndyaakenjila muTente ya Cipangano mukwaamba aMwaami Lesa, wakanyumfwa lakwe kaamwaambila kuswa pakati ka shintu shobilo shicite mapapaminwa shiitwa ayi bakelebu peculu lya cifwekesho ca nkumbu paLibokoshi lya Cipangano.