Shakubelenga 5 - Baibo Busansulushi Bwa Libuku Ili

Bantu batasalalite kweelana aMilawo

¹ Lyalo Mwaami Lesa wakaambila Mose ayi,

² “Lwiita bene Isilaeli ayi bakushe mumisumba muntu uli woonse ucite bulwashi bwa manata, utooswa mashina amushobo uli woonse mumubili alimwi awooyo woonse utasalalite kweelana aMilawo ceebo cakukumya mutuntu.

³ Bantu abo boonse, basankwa abanakashi, ubatandeemo kwaamba ayi batabishi misumba yanu umo moonkala pakati ka bantu bangu.”

⁴ Bene Isilaeli bakacita mbomunya ubo akubakusha mumisumba yabo kweelana aMwaami Lesa mbwaakaambila Mose.

Malipilo a pakubisha

⁵ Lyalo Mwaami Lesa wakaambila Mose ayi,

⁶ “Lwiita bene Isilaeli ayi na musankwa nabi mwanakashi taatooshomeka kuli ndime neMwaami Lesa kwiinda mukubishisha mubye umwi, ulicite mulandu.

⁷ Aboobo ulyeelete kulyaambilila cibiibi cakwe. Ulyeelete akulipila shoonse sheelete kwiilikawo acomwi ca shosanwe ca mweelo uyo kumuntu ngwaakabishisha.

⁸ Sombi na muntu uyo wafwa, ono taacite mukwabo umwi nkweenga kwalipilwa, malipilo ayo alaakupekwa kuli ndime neMwaami Lesa ayi nga mupailishi. Malipilo ayo ngakwiilika pambelele isankwa isebenseshekwa pakusalasha muntu kweelana amulawo.

⁹ Ashipo shimwi shoonse shipuseneeko isho bene Isilaeli nshebapa ndime neMwaami Lesa, nsha mupailishi uyo utooshitambula.

¹⁰ Nkokwaamba ayi shipo isho mupailishi womwi awomwi nshaatambula shilaakuba shaakwe.”

Mwanakashi utooyeeyelwa kutashomeka

¹¹ Mpomunyaawo Mwaami Lesa wakaambila Mose ayi,

¹² “Lwiita bene Isilaeli ayi na mwanakashi weebetwe wabisha mukutashomeka kuli ibaye

¹³ kwiinda mukukumana amusankwa umwi, ono cikani ici cashishikwa cakubula kwishiba ibaye ceebo taaku kamboni weenga wamushinina, alimwi taaku wakamucata,

¹⁴ ono na musankwa watalika kunyumfwa busuba akuyeeya mukaakwe ayi taatooshomeka alimwi taasalalite, nabi kunyumfwa busuba akutalika kuyeeyela mukaakwe nacibi kwaamba ayi ulisalalite,

¹⁵ anu ulyeelete kutola mukaakwe kumupailishi. Ulyeelete kutola akilogilamu yomwi ya fulaulo wa bale, sombi teelete kutilawo mafuta a olifi naaceyi, nabi kusenkanyako tununkila kabotu mukwiinga ncipo ca fulaulo ca busuba capekwa kwaamba ayi lushinisho luyubuluke.

¹⁶ “Lyalo mupailishi ulaakuleta mwanakashi kunembo akumwiimika pameenso a Mwaami Lesa.

¹⁷ Ulaakubika maanshi asalalite amwi munongo akubwesa bulongo panshi lya Tente ya Cipangano akububika mumaanshi ayo.

¹⁸ Kuswawaawo ulaakwaangulula misusu ya mwanakashi akubika cipo ca fulaulo ca busuba capekwa kwaamba ayi lushinisho luyubuluke mumaansaakwe. Mupailishi lakwe kaacite nongo ya maanshi alula ayo aleta lishingo.

¹⁹ Lyalo mupailishi ulaakulwiita mwanakashi uyu ayi aambe maswi akulumbila ayi, ‘Na tookwe kucitawo bulale, teshi ube mumapensho ceebo ca lishingo liswa mumaanshi aya.

²⁰ Sombi na wakacitawo bulale,

²¹ Mwaami Lesa akushingane pakati ka bene mishaanu. Aalengeshe ayi bwanakashi bwako bunyane alifumo lyako kushimba.

²² Maanshi aya pakwinjila mulifumo lyako aalishimbishe akulengesha bwanakashi bwako kunyana.’ Alakwe mwanakashi ulaakukumbula ayi, ‘Ndasumina. Mwaami Lesa aacite mbomunya ubo.’

²³ “Kuswawaawo mupailishi ulaakulemba lishingo ilyo akulisanshila munongo ya maanshi alula.

²⁴ Mpomunyaawo mupailishi ulaakunwisha mwanakashi maanshi ayo aleta lishingo. Maanshi aya alaakwinjila muli nguwe akulengesha mapensho anene.

²⁵ Sombi kaatana kumunwisha, mupailishi uyo ulaakubwesa cipo ca fulaulo ca busuba kuswa mumaansaakwe, kucitambeeka kunembo lyangu neMwaami Lesa akucipa pacipaililo.

²⁶ Mpeeke ulaakutapulawo lupaka lomwi ayi ncishibilo cakwaamba ayi cipo coonse capekwa kuMwaami Lesa, akucitentela pacipaililo. Kuswawaawo ulaakunwisha mwanakashi maanshi ayo.

²⁷ Na wakacita bulale, maanshi alaakumuletela mapensho. Lifumo lyakwe lilaakushimba alimwi abwanakashi bwakwe bulaakunyana. Ono lakwe ulaakushinganwa pakati ka bene mishaabo.

²⁸ Sombi na taaku ncaakacita, taaku mapensho eshi akamupolele alimwi ulaakunookonsha kushala.

²⁹ “Anu uyu ngomulawo wa pabusuba na mwanakashi wabisha mukukumana amusankwa umwi kaaebetwe,

³⁰ Nabi na musankwa wanyumfwa busuba ceebo cakuyeeyela mukaakwe. Mupailishi ulyeelete kwiimika mwanakashi pameenso angu neMwaami Lesa akumucita kweelana amulawo uyu.

³¹ Ono musankwa teshi akanoocitewo mulandu, sombi mwanakashi uyo ulyeelete kupenshekwa pacibiibi ncaakacita kweelana amulawo.”