Shakubelenga 33 - Baibo Busansulushi Bwa Libuku Ili

Lweendo lwakuswa kuIjipiti kuya kuMoabu

¹ Meena a misena iyo bene Isilaeli mobakalinga kuyakila misumba, paciindi ico ndyebakaswa mucishi ca Ijipiti mumikowa yabo, kwiinda mubutanjilili bwakwe Mose aAloni, ngaaya.

² Mose wakalinga kulemba liina lya musena uli woonse mpweenga bayakila misumba kweelana abwakaamba Mwaami Lesa.

³ Anu bene Isilaeli bakaswa mucishi ca Ijipiti pabushiku bwalikumi ashosanwe mumweenshi wakutaanguna mumwaaka, bushiku bwa Pasika bwakwiibaluka kusotokela ndibwakeenda. Bakanyamuka kundabala inene ya Lamusesi cakubula boowa mumeenso a bene Ijipiti,

⁴ abo bakalinga kufukila bana babo bakwiiya abo Mwaami Lesa mbwaakacaya. Mukucita ceeci, Mwaami Lesa wakabonesha ayi uleendaawo nkusu pabalesa ba bene Ijipiti.

⁵ Bene Isilaeli ndibakaswa kuLamusesi bakayakila misumba kuSukoti.

⁶ Kuswa kuSukoti bakaya mukuyakila kuEtamu mweela luyanga.

⁷ Kuswa kooko, bakaboola kwisule kuPi Ayiloti kwicwe lya Baali Sefoni akuyakila pafwaafwi aMigidolu.

⁸ Lyalo kuPi Ailoti bakaswaako akwiinda muLweenge Lusalala kuya muluyanga lwa Shuli. Ndibakeenda kwanshiku shotatwe bakayakila misumba kuMala.

⁹ Ndibakaswa kooko, bakaya kuElimu uko nkobakayakila misumba mukwiinga kwakalinga tuntupu twa maanshi tuli likumi atobilo alimwi atupukupuku tuli makumi osanwe aobilo.

¹⁰ Akwalo kuElimu bakaswaako akuya mukuyakila pafwaafwi aLweenge Lusalala.

¹¹ Ono ndibakaswa kooko bakaya mukuyakila muluyanga lwa Sini.

¹² Lyalo bakalonga akuya mukuyakila kuDofuka,

¹³ Pesule bakalongela KuAlushi.

¹⁴ Kuswa kooko, bakaya kuLefidimu uko kwatakalinga maanshi akunwa.

¹⁵ Ndibakaswa kuLefidimu, bakaya mukuyakila muluyanga lwa Sinayi.

¹⁶ Kuswa muluyanga lwa Sinayi bakayakila kuKibuloti Ataafa.

¹⁷ Akwalo uko bakaswaako akuya mukuyakila kuAseloti.

¹⁸ Mpeeke kuAseloti bakalongaako akuya kuLitima.

¹⁹ Ndibakaswa kuLitima, bakalongela kuLimoni Pelisi.

²⁰ Akwalo kuLimoni Pelisi bakaswaako akuya mukuyakila kuLibina.

²¹ Ndibakaswa kuLibina, bakalongela kuLisa.

²² KuLisa akwalo bakalongaako akuya kuKeelata.

²³ Kuswa kuKeelata, bakalongela kuKalundu ka Shefa.

²⁴ Ingayi baswe kuKalundu ka Shefa, bakaya mukuyakila kuAlada.

²⁵ Ndibakaswa kuAlada, bakalongela kuMakeloti.

²⁶ KuMakeloti ndibakaswaako, bakaya kuTaati.

²⁷ Kuswa kooko, bakalongela kuTela.

²⁸ Ingayi baswe kuTela, bakalongela kuMitika.

²⁹ Akwalo kuMitika bakalongaako akuya kuAshimona.

³⁰ Ndibakalonga kuAshimona, bakaya mukuyakila kuMoseloti.

³¹ Ndibakaswa kuMoseloti, bakalongela kuBene Jaakani.

³² KuBene Jaakani akwalo bakalongaako akuya kuOli Agidigadi.

³³ Ingayi baswe kuOli Agidigadi, bakalongela kuJotibata.

³⁴ Akwalo kuJotibata bakaswaako akulongela kuAbulona.

³⁵ Ndibakaswa kuAbulona, bakalongela kuEsiyoni Geba.

³⁶ KuEsiyoni Geba bakaswaako akuya mukuyakila kuKadeshi, muluyanga lwa Sini.

³⁷ Ndibakaswa kuKadeshi, bakaya mukuyakila kuKalundu ka Oli, kunyinsa a Edomu.

³⁸ Mpomunyaawo Mwaami Lesa wakaambila Aloni mupailishi ayi atante paKalundu ka Oli, apo mpwaakafwita pabushiku butaanshi mumweenshi wasanu, mumwaaka wa makumi one kuswa pabushiku bene Isilaeli ndibakaswa mucishi ca Ijipiti.

³⁹ Aloni ndyaakafwa paKalundu ka Oli, wakalinga kucite myaaka ili 123.

⁴⁰ Kuswawaawo mwaami wa Aladi uyo wakalinga kwikala kumalenge lya cishi ca Kenani wakanyumfwa ayi bene Isilaeli batoosa.

⁴¹ Ndibakaswa kuKalundu ka Oli, bakaya mukuyakila kuSalimona.

⁴² Ingayi baswe kuSalimona, bakalongela kuPunoni.

⁴³ Kuswa kooko, bakalongela kuOboti.

⁴⁴ Ono ndibakaswa kuOboti, bakalongela kuIye Abalimu, kunyinsa ya Moabu.

⁴⁵ Akwalo kuIye Abalimu bakalongaako akuya mukuyakila kuDiboni Gadi.

⁴⁶ Ingayi baswe kuDiboni Gadi, bakalongela kuAlumoni Dibulataimu.

⁴⁷ Akwalo bakaswaako akulongela kuAbalimu kufwaafwi aNebo.

⁴⁸ Ndibakaswa kutulundu twa kuAbalimu, bakaya mukuyakila muliwesa lya Moabu kwitala lya Mulonga wa Joodani na kamuli muJeliko.

⁴⁹ Momunya umo muliwesa lya Moabu, bakayakila mweela Joodani kuswa kuBeti Jeshimoti kweela kuAbelo Shitimu.

Milasho njibakapekwa kabatana kusubuka Joodani

⁵⁰ Mpeeke muliwesa lya Moabu mweenka umo, kwitala lya Joodani na kamuli muJeliko, Mwaami Lesa wakaambila Mose ayi,

⁵¹ “Lwiita bene Isilaeli ayi, ‘Na musubuke Mulonga wa Joodani akwinjila mucishi ca Kenani,

⁵² mulyeelete kutandaanyamo bantu boonse bekala mucishi ico. Munyonyoole shibumbwabumbwa shabo sha mabwe asha sheela alimwi amisena yabo njebalambililaamo.

⁵³ Mukabwese cishi ico akwikala mumo mukwiinga ntoocipa kuli ndimwe.

⁵⁴ Mukabaane cishi pakati ka mikowa yoonse alimwi ashipani kwiinda mukuuma cisolo, akupa cishi cinene kucipani cinene akwalo kucipani ciniini, nkupa cishi ciniini.

⁵⁵ Sombi na mukabule kutanda bantu bali mucishi ico, abo mbweshi bakacaale balaakumupensha anga ntupampaansha mumeenso nabi anga njimyuumfwa ili mumbafu shanu alimwi balaakumulwana.

⁵⁶ Ono na mukaalilwe kubatandaamo, ndaakumunyonyoola bweenka mbondakabamba kubacita.’ ”