Shakubelenga 31 - Baibo Busansulushi Bwa Libuku Ili

Bene Isilaeli mbobakalwana abene Midyani

¹ Mpeeke Mwaami Lesa wakaambila Mose ayi,

² “Upe mulandu bene Midyani paceeco ncebakacita kubene Isilaeli. Ono waakumana kucita boobo, ulaakufwa.”

³ Aboobo Mose wakaambila bene Isilaeli ayi, “Amulibambile shakuya kunkondo kwaamba ayi mukalwaane abene Midyani akubapa mulandu paceeco ncebakacita kuMwaami Lesa.

⁴ Kumukowa wa bene Isilaeli woonse mulyeelete kukushako basankwa bali cuulu ayi baye kunkondo.”

⁵ Mpeeke basankwa bali cuulu bakasalwa kuswa kumukowa womwi awomwi, bakalibambila kuya kunkondo. Boonse pantu pomwi bakakumana shuulu shili likumi ashobilo.

⁶ Anu Mose wakabatuma kunkondo kwiinda mubutanjilili bwakwe Fineyasi mwanaakwe Eliyasa mupailishi, uyo wakalinga kulanga pashintu sha kumusena usalalite alimwi amapeenga akubacenjesheshaako.

⁷ Bakalwana abene Midyani kweelana aMwaami Lesa mbwaakaambila Mose, akucaya basankwa boonse,

⁸ kubikaawo abamaami ba bene Midyani bali bosanwe. Meenaabo ngaaya. Efi, Lekemu, Suli, Uli alimwi aLeba. Bakacaila kumwi aBalaamu mwanaakwe Beyo.

⁹ Kuswawaawo bene Isilaeli bakacata banakashi abaana bene Midyani alimwi akutola ŋombe shabo, matanga ambelele alimwi ampongo, akubwesa abuboni bwabo boonse.

¹⁰ Bakatenta mandabalaabo oonse alimwi amisumba.

¹¹ Bakabwesa ashintu shoonse nshebakasaala, kubikaawo abantu mbobakacata alimwi ashifubwa,

¹² akutola kuli Mose aEliyasa mupailishi alimwi abene Isilaeli boonse abo bakalinga kumisumba, mucinyika ca Moabu kwitala lya Joodani na kamuli muJeliko.

Kuboola kwa likoto lya bashilumamba

¹³ Mpomunyaawo Mose, Eliyasa mupailishi alimwi abamatanjilili ba bene Isilaeli bakaswa mumisumba akuya mukukumana alikoto lya bashilumamba.

¹⁴ Mpeeke Mose wakakalalila bamatanjilili ba bashilumamba nkokwaamba ayi bamatanjilili ba bali shuulu aba bali mwaanda, abo bakaswa kunkondo.

¹⁵ Wakabeepusha ayi, “Ceebonshi mwaleka banakashi boonse ayi banoocili boomi?

¹⁶ Amwiibaluke ayi mbanakashi bakakonkela milawo yakwe Balaamu, akulengesha ayi bantu baashukile Mwaami Lesa kuPeyo. Ico ncecakaleta mwaalu pabantu ba Mwaami Lesa.

¹⁷ Bulya ono amucaye mwaana musankwa woonse, alimwi mucaye mwanakashi woonse uyo wakakumanawo kale amusankwa,

¹⁸ Sombi mulishiilewo bamyooye abo batana kukumanawo kale amusankwa.

¹⁹ Ono mwebo noonse nomwacayawo muntu nabi kukumya mutuntu, mulyeelete kwikala pansengwe lya misumba kwanshiku shosanwe ashobilo. Pabushiku bwatatu abwasanu ashobilo mulyeelete kulisalasha pantu pomwi abanakashi abo mbomwacata.

²⁰ Mulyeelete kusalasha acakufwala cili coonse alimwi acintu cili coonse cakapangwa kucipaya, booya bwa mpongo nabi cisamu.”

²¹ Alakwe Eliyasa mupailishi wakaambila basankwa bakaswa kunkondo ayi, “Milawo iyi njeyeeyo Mwaami Lesa njaapa Mose.

²² Golodi, silifa, bulonse, nshimbi, ceela, muntomfwe

²³ alimwi acintu cimwi cili coonse ceenga cabula kupya, cilyeelete kusalashikwa kwiinda mumulilo. Lyalo ndyeenga caba cisalalite. Sombi shoonse ishi shilyeelete kusalashikwa amaanshi akusalashisha pantu pomwi ashintu shoonse shitakonshi kubikwa mumulilo.

²⁴ Anu pabushiku bwasanu ashobilo, mulyeelete kucapa shakufwala shanu. Lyalo mulaakunoosalalite kweelana aMilawo alimwi mulaakusuminishikwa kwinjila mumisumba.”

Kwaabanya shintu nshebakasaala

²⁵ Mpomunyaawo mwaami Lesa wakaambila Mose ayi,

²⁶ “Webo alimwi aEliyasa mupailishi, pantu pomwi abamatanjilili bamwi ba bene Isilaeli, mulyeelete kubelenga shintu shakasaalwa, kubikaawo abantu alimwi ashifubwa.

²⁷ Mushipansaanye mushipansha sheelene shobilo, cipansha cimwi nca bashilumamba acalo cimwi nca bene Isilaeli bamwi boonse.

²⁸ Ono kuswa kucipansha ca shintu sha bashilumamba, mukusheko muntu womwi pabaabo bakacatwa boonse bali myaanda yosanwe ayi ngumusonko kuMwaami Lesa, apaŋombe shoonse, mbongolo, mbelele alimwi ampongo shili myaanda yosanwe, mukushewo yomwi yomwi.

²⁹ Kuswawaawo ukashipe Eliyasa mupailishi ayi ncipo kuMwaami Lesa.

³⁰ Kuswa kucipansha ceshi cikapekwe bantu boonse, pabantu bakacatwa boonse bali makumi osanwe, mukushewo womwi. Apalo paŋombe, mbongolo, mbelele alimwi ampongo shoonse shili makumi osanwe, mukushewo yomwi yomwi. Lyalo mupe bene Lefi abo bacite mulimo wakulama Tente ya Mwaami Lesa.”

³¹ Mpeeke Mose alimwi aEliyasa mupailishi bakacita bweenka bwakaamba Mwaami Lesa.

³² Ono shintu shakacaalaawo bashilumamba ndyebakakushaawo shaabo nsheeshi. Mbelele shili 675,000,

³³ ŋombe shili 72,000,

³⁴ mbongolo shili 61,000,

³⁵ alimwi abanakashi batana kukumanawo kale amusankwa bali 32,000.

³⁶ Cipansha bashilumamba bakalinga kunkondo ncebakabaanishikwa nimbelele shili 337,500,

³⁷ umo mwakaswa mbelele shili 675 ayi ngumusonko wa Mwaami Lesa.

³⁸ Bakapekwa ŋombe shili 36,000, umo mwakaswa shili 72 ayi ngumusonko wa mwaami Lesa.

³⁹ Mbongolo nshebakapekwa shakalinga 30,500, umo mwakaswa shili 61 ayi ngumusonko wa Mwaami Lesa.

⁴⁰ Bakapekwa banakashi batana kukumanawo kale abasankwa bali 16,000, umo mwakaswa bali 32 ayi ngumusonko wa Mwaami Lesa.

⁴¹ Aboobo Mose wakapa Eliyasa mupailishi musonko ayi ncipo kuMwaami Lesa, kweelana ambwaakaambila Mose.

⁴² Mpeeke cipansha ca bene Isilaeli ico ncebakabaanishikwa, ico Mose ncaakapatula kuswa kuca bashilumamba bakalinga kunkondo,

⁴³ akwalo nimbelele shili 337,500,

⁴⁴ ŋombe shili 36,000,

⁴⁵ mbongolo shili 30,500

⁴⁶ alimwi abanakashi batana kukumanawo kale abasankwa bali 16,000.

⁴⁷ Kuswa kucipansha ca bene Isilaeli ici, pabantu bali makumi osanwe alimwi ashifubwa shili makumi osanwe, Mose wakakushawo womwi womwi. Ono kweelana abwakaamba Mwaami Lesa, wakapa bene Lefi abo bakalinga kulama Tente ya Mwaami Lesa.

⁴⁸ Lyalo bamatanjilili ba bashilumamba, nkokwaamba ayi bamatanjilili ba bali shuulu aba bali mwaanda, bakaya kuli Mose

⁴⁹ akwaamba ayi, “Nkambo, twabelenga bashilumamba abo mbotwakalinga kutanjilila alimwi taaku nabi womwi utapo.

⁵⁰ Paceebo ceeci, twaleta shintu shakulibotesha sha golodi nkokwaamba ayi shakufwala kumaansa, makosa, ninga, masikiyo alimwi ashakufwala munshingo, isho womwi awomwi pakati kesu nshaakabwesa. Ono tutooshipa Mwaami Lesa ayi tulisalashe kweelana aMilawo pameenso akwe.”

⁵¹ Mpeeke Mose aEliyasa mupailishi bakatambula golodi iyo. Anu yoonse yakalinga nshintu shakulibotesha.

⁵² Golodi yoonse yakaleta bamatanjilili ba bashilumamba, nkokwaamba ayi bamatanjilili ba bali shuulu aba bali mwaanda, yakashini kukumana makilogilamu myaanda yobilo.

⁵³ Sombi abo batakalinga bamatanjilili ba bashilumamba bakalibikila shoonse nshebakabwesa.

⁵⁴ Lyalo Mose alimwi aEliyasa mupailishi bakatambula golodi iyo njebakaleta bamatanjilili ba bali shuulu aba bali mwaanda, akwiitola kuTente ya Cipangano kwaamba ayi Mwaami Lesa anoolama bene Isilaeli.