Shakubelenga 30 - Baibo Busansulushi Bwa Libuku Ili

Milasho ya pakushomesha cakulumbila

¹ Mpomunyaawo Mose wakaambila bamatanjilili ba mikowa ya bene Isilaeli ayi, “Mwaami Lesa waamba ayi tunookonkela milasho iyi.

² Na muntu washomesha cakulumbila ayi ulaakupa cintu cimwi kuMwaami Lesa nabi kutacita cimwi cintu, teelete kwaambabo pamulomo, sombi acite shoonse nshaakashomesha.

³ “Na mwanakashi ucikala muŋanda ya baishi washomesha cakulumbila kuMwaami Lesa ayi ulaakucita nabi kutacita cimwi cintu,

⁴ mpeeke baishi banyumfwaako akuumunabo, ingayi ulyeelete kucita kweelana akushomesha kwakwe.

⁵ Sombi na baishi bamukasha pakunyumfwa kushomesha kwakwe, teelete kucita kweelana akushomesha kwakwe. Mwaami Lesa ulaakumwaangulula ceebo baishi bamukasha.

⁶ “Ono na mwanakashi weebwa kaali wakashomesha kale cakulumbila kucita cimwi cintu nabi kutacita cintu cimwi mukutekalika mulaka kwakwe mwiine,

⁷ ono ibaye wanyumfwaako akuumunabo, ulyeelete kucita kweelana akushomesha kwakwe.

⁸ Sombi na ibaye wamukasha pakunyumfwa kushomesha kwakwe, ingayi teelete kucita kweelana akushomesha kwakwe. Mwaami Lesa alakwe ulaakumwaangulula.

⁹ “Na mukalubinje mwanakashi nabi mwanakashi wakalekwa washomesha cakulumbila kucita nabi kutacita cintu cimwi, ulyeelete kucicitabo kweelana akushomesha kwakwe

¹⁰ “Na mwanakashi weebetwe washomesha cakulumbila kucita nabi kutacita cintu cimwi,

¹¹ ono ibaye wanyumfwaako akuumunabo, ulyeelete kucita kweelana akushomesha kwakwe.

¹² Sombi na ibaye wamukasha pakunyumfwa kushomesha kwakwe, ingayi teelete kucita kweelana akushomesha uko. Mwaami Lesa alakwe ulaakumwaangulula ceebo ibaye wakamukasha.

¹³ Ibaye ulicite nkusu shakusumina nabi kukasha kushomesha cakulumbila kwakwe kuli koonse,

¹⁴ sombi na ibaye kaaumwitebo kuswa pabushiku ubo mukaakwe ndyaakashomesha, nkokwaamba ayi alakwe wasumina ayi aciciite bweenka ubo mukwiinga taaku ncaakaamba pakushomesha uko kuswabo ndyaakanyumfwa.

¹⁵ Sombi na kunembo ibaye wakasha mukaakwe kucita kweelana ambwaakashomesha cakulumbila, ulyeelete kupekwa mulandu pacilubo ca mukaakwe.”

¹⁶ Anu iyi njemilasho ya pakushomesha cakulumbila Mwaami Lesa njaakapa Mose ikumite kumusankwa amukaakwe, nabi baishi amwanaabo mwanakashi ucikalaabo.