Shakubelenga 29 - Baibo Busansulushi Bwa Libuku Ili

Milambu ya paKusekelela kwa Mwaaka Upya

¹ “Ono pabushiku butaanshi mumweenshi wasanu ayobilo, balyeelete kubungana ayi balambile alimwi tabeelete kucita mulimo umwi uli woonse. Bushiku ubu mbwakulisha mapeenga.

² Mulyeelete kubenga mucende mwaana, mbelele isankwa, alimwi abana ba mbelele basankwa bali bosanwe abobilo, bacite mwaaka womwi. Shoonse ishi tasheelete kuba akampenda. Uyu ngumulambu wakutenta, bweema bunsangalasha neMwaami Lesa.

³ Lyalo bakabenge ashipo sha fulaulo sheelete pacifubwa comwi acomwi, nkokwaamba ayi pamucende womwi awomwi makilogilamu otatwe, makilogilamu obilo pambelele isankwa

⁴ alimwi akilogilamu yomwi pamwanaambelele womwi awomwi.

⁵ Kuswawaawo bakeelikeewo ampongo isankwa ayi ngumulambu wakulekelelwa shibiibi mukusalasha bantu kweelana aMilawo.

⁶ Anu ishi shoonse nshakwiilikabo pamulambu wakutenta ubengwa pabushiku butaanshi bwa mweenshi, pantu pomwi acipo ca shili anga ngamaila ca nguwo. Shilyeelete kwiilika apamulambu wakutenta wa pabushiku abushiku pantu pomwi acipo ca fulaulo aca cakunwa ca nguwo, bweema bunsangalasha neMwaami Lesa.

Milambu ya pabushiku bwaKusalashikwa kuswa kushibiibi

⁷ “Ono pabushiku bwalikumi mumweenshi wasanu ayobilo, bakabungane ayi balambile. Tabeelete kulya cintu nabi comwi nabi kucita mulimo umwi uli woonse.

⁸ Bakabenge mucende mwaana, mbelele isankwa alimwi abana ba mbelele basankwa bali bosanwe abobilo bacite mwaaka womwi. Shoonse ishi tasheelete kuba akampenda. Uyu ngumulambu wakutenta, bweema bunsangalasha neMwaami Lesa.

⁹ Lyalo bakabenge ashipo sha fulaulo sheelete pacifubwa comwi acomwi, nkokwaamba ayi pamucende womwi awomwi makilogilamu otatwe, makilogilamu obilo pambelele isankwa

¹⁰ alimwi akilogilamu yomwi pamwanaambelele womwi awomwi.

¹¹ Kuswawaawo bakeelikeewo ampongo isankwa ayi ngumulambu wakulekelelwa shibiibi. Ishi shoonse nshakwiilika pamulambu wakulekelelwa shibiibi mukusalasha bantu kweelana aMilawo, milambu yakutenta ya pabushiku abushiku pantu pomwi acipo ca shili anga ngamaila aca cakunwa ca nguwo.

Milambu ya pakusekelela kwa Shimpaka

¹² “Ingayi pabushiku bwalikumi ashosanwe mumweenshi wasanu ayobilo, bakabungane ayi balambile. Pakusekelela uku kwakundemeka neMwaami Lesa kwanshiku shosanwe ashobilo, tabeelete kucita mulimo umwi uli woonse.

¹³ Bakabenge bacende baana bali likumi abotatwe, mbelele shisankwa shobilo alimwi abana ba mbelele basankwa bali likumi abone bacite mwaaka womwi. Shoonse ishi tasheelete kuba akampenda. Uyu ngumulambu wa cakulya, bweema bunsangalasha neMwaami Lesa.

¹⁴ Lyalo bakabenge ashipo sha fulaulo sheelete pacifubwa comwi acomwi, nkokwaamba ayi pamucende womwi awomwi makilogilamu otatwe, makilogilamu obilo pambelele isankwa

¹⁵ alimwi akilogilamu yomwi pamwanaambelele womwi awomwi.

¹⁶ Kuswawaawo bakeelikeewo ampongo isankwa ayi ngumulambu wakulekelelwa shibiibi. Ishi nshakwiilika pamulambu wakutenta wa pabushiku abushiku pantu pomwi acipo ca fulaulo aca cakunwa ca nguwo.

¹⁷ “Pabushiku bwabili, bakabenge bacende baana bali likumi abobilo, mbelele shisankwa shobilo alimwi abana ba mbelele basankwa bali likumi abone bacite mwaaka womwi. Shoonse ishi tasheelete kuba akampenda.

^18-19 Kwiilika pasheeshi balyeelete kupa shipo shoonse shiyandika pabushiku butaanshi.

²⁰ Ono pabushiku bwatatu, bakabenge bacende bali likumi awomwi, mbelele shisankwa shobilo alimwi abana ba mbelele basankwa bali likumi abone bacite mwaaka womwi. Shoonse ishi tasheelete kuba akampenda.

^21-22 Kwiilika pasheeshi balyeelete kupa shipo shoonse shiyandika pabushiku butaanshi.

²³ “Pabushiku bwane, bakabenge bacende likumi, mbelele shisankwa shobilo alimwi abana ba mbelele basankwa bali likumi abone bacite mwaaka womwi. Shoonse ishi tasheelete kuba akampenda.

^24-25 Kwiilika pasheeshi balyeelete kupa shipo shoonse shiyandika pabushiku butaanshi.

²⁶ “Pabushiku bwasanu, bakabenge bacende bosanwe abone, mbelele shisankwa shobilo alimwi abana ba mbelele basankwa bali likumi abone bacite mwaaka womwi. Shoonse ishi tasheelete kuba akampenda.

^27-28 Kwiilika pasheeshi balyeelete kupa shipo shoonse shiyandika pabushiku butaanshi.

²⁹ “Pabushiku bwasanu abomwi, bakabenge bacende bosanwe abotatwe, mbelele shisankwa shobilo alimwi abana ba mbelele basankwa bali likumi abone bacite mwaaka womwi. Shoonse ishi tasheelete kuba akampenda.

^30-31 Kwiilika pasheeshi balyeelete kupa shipo shoonse shiyandika pabushiku butaanshi.

³² “Pabushiku bwasanu ashobilo, bakabenge bacende bosanwe abobilo, mbelele shisankwa shobilo alimwi abana ba mbelele basankwa bobilo alimwi abana ba mbelele basankwa bali likumi abone bacite mwaaka womwi. Shoonse ishi tasheelete kuba akampenda.

^33-34 Kwiilika pasheeshi balyeelete kupa shipo shoonse shiyandika pabushiku butaanshi.

³⁵ “Pabushiku bwasanu ashotatwe, bakabungane ayi balambile alimwi tabeelete kucita mulimo umwi uli woonse.

³⁶ Bakabenge mucende womwi, mbelele isankwa yomwi alimwi abana ba mbelele basankwa bali bosanwe abobilo bacite mwaaka womwi. Shoonse ishi tasheelete kuba akampenda. Uyu ngumulambu wakutenta, bweema bunsangalasha neMwaami Lesa.

^37-38 Kwiilika pasheeshi balyeelete kupa shipo shoonse shiyandika pabushiku butaanshi.

³⁹ “Anu iyi njemilasho ikumite kumilambu yakutenta, shipo sha fulaulo, shipo sha cakunwa alimwi ashipo shabwanabwankashi isho nshemweelete kumpa neMwaami Lesa pashiindi sheelete shakusekelela. Ishi nshakwiilika pacipo ncebampa mukucita kweelana ambobakashomesha cakulumbila nabi cipo cakulyaaba.”

⁴⁰ Mpeeke Mose wakalwiita bene Isilaeli shintu shoonse isho Mwaami Lesa nshaakamwaambila.