Shakubelenga 28 - Baibo Busansulushi Bwa Libuku Ili

Milambu ibengwa pabushiku abushiku

¹ Mpeeke Mwaami Lesa wakaambila Mose ayi,

² “Lwiita bene Isilaeli ayi balyeelete kubenga milambu ya cakulya kuli ndime neLesa mushiindi sheelete ayi ibe bweema bunsangalasha nebo neMwaami Lesa.

³ Mulambu wa cakulya weelete kubengwa kuli ndime neMwaami Lesa ngooyu. Bana ba mbelele bobilo basankwa bacite mwaaka womwi alimwi batacite kampenda ayi ngumulambu wakutenta pabushiku abushiku.

⁴ Womwi balyeelete kumubenga macuunsa aumwi macolesha

⁵ pantu pomwi acipo ca fulaulo akilogilamu yomwi ya fulaulo upelekete usenkene alita yomwi ya mafuta a olifi eene eene.

⁶ Uyu ngumulambu wakutenta weelete kubengwa bushiku abushiku uyo wakatalikila paKalundu ka Sinayi ayi ngumulambu wa cakulya. Bweema bwa mulambu uyu bulansangalasha nebo neMwaami Lesa.

⁷ Balyeelete kutila lita yomwi ya waini pacipaililo pantu pomwi amwanaambelele womwi awomwi ayi ncipo ca cakunwa.

⁸ Macolesha balyeelete kubenga mwanaambelele umwi ulya bweenka mbuli wamacuunsa pantu pomwi acipo ca cakulya alimwi aca cakunwa. Bweema bwa mulambu uyu bulansangalasha nebo neMwaami Lesa.

Mulambu wa bushiku bwakookesha bwa Cibelu

⁹ “Ono pabushiku bwakookesha bwa Cibelu balyeelete kubenga bana ba mbelele bobilo basankwa bacite mwaaka womwi alimwi batacite kampenda, makilogilamu obilo a fulaulo upelekete usenkene amafuta a olifi ayi ncipo ca fulaulo pantu pomwi acipo ca cakunwa.

¹⁰ Mulambu wakutenta uyu ulyeelete kubengwa pabushiku bwakookesha bwa Cibelu bomwi abomwi kwiilika pamulambu wakutenta wa bushiku abushiku acipo ca nguwo ca cakunwa.

Mulambu weelete kubengwa mweenshi amweenshi

¹¹ “Pabushiku butaanshi bwa mweenshi uli woonse balyeelete kubenga mulambu wakutenta kuli ndime neMwaami Lesa, nkokwaamba ayi bacende baana bobilo, mbelele isankwa, bana ba mbelele basankwa bosanwe abobilo bacite mwaaka womwi, shoonse kashitacite kampenda.

¹² Mucende womwi awomwi ulyeelete kubengwa pantu pomwi amakilogilamu otatwe a fulaulo upelekete usenkene amafuta a olifi ayi ncipo ca fulaulo. Yalo mbelele isankwa yomwi ayomwi ilyeelete kubengwa pantu pomwi amakilogilamu obilo a fulaulo upelekete usenkene a mafuta a olifi.

¹³ Abalo bana ba mbelele womwi awomwi ulyeelete kubengwa pantu pomwi akilogilamu yomwi ya fulaulo upelekete usenkene amafuta a olifi. Bweema bwa milambu iyi yakutenta ya cakulya bulansangalasha nebo neMwaami Lesa.

¹⁴ Balyeelete kupa shipo sha cakunwa pantu pomwi acifubwa comwi acomwi. Nkokwaamba ayi pamucende womwi awomwi malita a waini obilo, pambelele isankwa yomwi ayomwi lita yomwi amusa, apalo pamwanaambelele womwi awomwi nilita yomwi. Uyu ngumulasho pamulambu wakutenta wa pabushiku butaanshi bwa mweenshi mumwaaka woonse.

¹⁵ Ono kwiilika pamulambu wakutenta wa bushiku abushiku acipo ca cakunwa ca nguwo, balyeelete kubenga mpongo isankwa ayi ngumulambu wakulekelelwa shibiibi.

Milambu ya paKusekelela kwakulya Cimaande

¹⁶ “Ono kusekelela kwa bushiku bwa Pasika bwakwiibaluka kusotokela mukundemeka neMwaami Lesa kulyeelete kucitwa pabushiku bwalikumi ashone bwa mweenshi wakutaanguna.

¹⁷ Lyalo pabushiku bwalikumi ashosanwe balyeelete kuba akusekelela kumwi kwanshiku shosanwe ashobilo. Munshiku isho balyeelete kulya cimaande.

¹⁸ Ono pabushiku butaanshi balyeelete kubungana ayi balambile alimwi tabeelete kucita mulimo umwi uli woonse.

¹⁹ Balyeelete kubenga mulambu wakutenta ayi ngumulambu wa cakulya kuli ndime neMwaami Lesa. Nkokwaamba ayi balyeelete kubenga bacende baana bobilo, mbelele isankwa alimwi abana ba mbelele basankwa bacite mwaaka womwi. Shoonse ishi tasheelete kuba akampenda.

²⁰ Lyalo bakabenge ashipo sha fulaulo sheelete pacifubwa comwi acomwi, nkokwaamba ayi pamucende womwi awomwi makilogilamu otatwe, makilogilamu obilo pambelele isankwa

²¹ alimwi akilogilamu yomwi pamwanaambelele womwi awomwi.

²² Kuswawaawo bakeelikeewo ampongo isankwa ayi ngumulambu wakulekelelwa shibiibi mukusalasha bantu kweelana aMilawo.

²³ Balyeelete kubenga shintu ishi mukwiilika pamilambu yakutenta ya pabushiku abushiku.

²⁴ Munshila yeenka iyo balyeelete kubenga mulambu wa cakulya lyoonse kwanshiku shosanwe ashobilo, bweema bunsangalasha neMwaami Lesa. Bacite boobo mukwiilika pamulambu wakutenta wa bushiku abushiku acipo ca nguwo ca cakunwa.

²⁵ Lyalo bakabungane pabushiku bwasanu ashobilo ayi balambile alimwi tabeelete kucita mulimo umwi uli woonse.

Milambu yaKusekelela kwaKutebula

²⁶ “Ono pabushiku butaanshi bwakusekelela kwakutebula ndibapa cipo ca fulaulo kuli ndime neMwaami Lesa, balyeelete kubungana ayi balambile alimwi tabeelete kucita mulimo umwi uli woonse.

²⁷ Bakabenge mulambu wakutenta ayi mbweema bunsangalasha neMwaami Lesa nkokwaamba ayi bacende baana bobilo, mbelele isankwa alimwi abana ba mbelele bosanwe abobilo bacite mwaaka womwi.

²⁸ Lyalo bakabenge ashipo sha fulaulo sheelete pacifubwa comwi acomwi, nkokwaamba ayi pamucende womwi awomwi makilogilamu otatwe, makilogilamu obilo pambelele isankwa

²⁹ alimwi akilogilamu yomwi pamwanaambelele womwi awomwi.

³⁰ Kuswawaawo bakeelikeewo ampongo isankwa ayi ngumulambu wakulekelelwa shibiibi mukusalasha bantu kweelana aMilawo.

³¹ Balyeelete kubenga shintu ishi pantu pomwi acipo ca cakunwa mukwiilika pamulambu wakutenta wa pabushiku abushiku alimwi acipo ca fulaulo. Shifubwa shoonse ishi tasheelete kuba akampenda kali koonse.