Shakubelenga 26 - Baibo Busansulushi Bwa Libuku Ili

Kubelengwa kwabili

¹ Mwaalu ndiwakamana, Mwaami Lesa wakaambila Mose alimwi aEliyasa mwanaakwe Aloni ayi,

² “Amubelenge bene Isilaeli basankwa bacite myaaka ili makumi obilo nabi bacite myaaka isotokaawo abo beenga bacikonsha kusebensa mulimo wa bushilumamba kwiinda mumikowa yabo.”

³ Aboobo mumawesa a Moabu kwitala lya Mulonga wa Joodani na kamuli muJeliko, Mose aEliyasa mupailishi bakaamba ambabo akubalwiita ayi,

⁴ “Amubelenge basankwa boonse bacite myaaka ili makumi obilo nabi bacite myaaka isotokaawo kweelana aMwaami Lesa mbwaakaambila Mose.” Anu bene Isilaeli bakaswa mucishi ca Ijipiti mbaaba.

⁵ Bamumukowa wakwe Lubeni uyo wakalinga mwanaakwe Jakobo wakwiiya mbaaba. Bamucipani cakwe Anoki, Palu,

⁶ Esiloni alimwi acakwe Kami.

⁷ Shipani ishi shakalinga kucite basankwa bali 43,730.

⁸ Bamulunyungu lwakwe Palu nguEliyabu

⁹ abana bakwe basankwa, nkokwaamba ayi Nemuwelo, Datani alimwi aAbilamu. Datani aAbilamu mbobakeemikanina bene Isilaeli ndibakabukila Mose aAloni mukwinjila mulikoto lya baabo bakalinga kukonkela Kola ciindi ico ncebakabukila Mwaami Lesa.

¹⁰ Inshi yakalakama akubamina, aboobo bakafwita pantu pomwi aKola alimwi abaabo bakalinga kumukonkela, mulilo ndiwakanyonyoola basankwa bali 250. Mpeeke bakaba citondesho kubantu.

¹¹ Sombi bana bakwe Kola basankwa tabakwe kucaikwa.

¹² Mumukowa wakwe Simyoni, ncipani cakwe Nemuwelo, Jamini, Jakini

¹³ Sela alimwi acakwe Shaulo.

¹⁴ Shipani ishi shakalinga kucite basankwa bali 22,200.

¹⁵ Mumukowa wakwe Gadi, ncipani cakwe Sefoni, Agi, Shuni,

¹⁶ Osini, Eli

¹⁷ Alodi alimwi acakwe Aleli.

¹⁸ Shipani ishi shakalinga kucite basankwa bali 40,500.

¹⁹ Eli alimwi aOnani bakalinga bana bakwe Juda, sombi bakafwita mucishi ca Kenani.

²⁰ Mumukowa wakwe Juda, ncipani cakwe Shela, Pelisi, Sela,

²¹ Esiloni alimwi acakwe Amuli.

²² Shipani ishi shakalinga kucite basankwa bali 76,500.

²³ Mumukowa wakwe Isaka, ncipani cakwe Tola, Puwa

²⁴ Jashubu alimwi acakwe Shimuloni,

²⁵ Shipani ishi shakalinga kucite basankwa bali 64,300.

²⁶ Mumukowa wakwe Sebuluni, ncipani cakwe Seledi, Eloni alimwi acakwe Jalilu.

²⁷ Shipani ishi shakalinga kucite basankwa bali 60,500.

²⁸ Bamumukowa wakwe Josefu uyo wakalinga kucite baana basankwa bobilo Manase alimwi aEfuleemu mbaaba.

²⁹ Mumukowa wakwe Manase, Makiya mwanaakwe Manase wakashala Gilyadi. Ono shipani shoonse ishi nshamulunyungu lwakwe Gilyadi,

³⁰ nkokwaamba ayi cipani cakwe Iyesa, Eleki,

³¹ Asilyelo, Shekemu,

³² Shemida alimwi acakwe Efeli.

³³ Selofeyadi mwanaakwe Efeli taakalinga kuciteewo baana basankwa, sombibo banakashi. Meenaabo ngaaya. Maala, Nowa, Ogila, Miluka alimwi aTesa.

³⁴ Shipani ishi shakalinga kucite basankwa bali 52,700.

³⁵ Mumukowa wakwe Efuleemu, ncipani cakwe Shutela, Beka alimwi acakwe Taani.

³⁶ Cipani cakwe Elani cakaswa muli Shutela.

³⁷ Shipani ishi shakalinga kucite basankwa bali 32,500.

³⁸ Mumukowa wakwe Benjameni, ncipani cakwe Bela, Ashibelo, Ayilamu,

³⁹ Shefufamu, acakwe Ufamu.

⁴⁰ Shipani shakwe Aadi aNaamani shakaswa muli Bela.

⁴¹ Shipani ishi shakalinga kucite basankwa bali 45,600.

⁴² Mumukowa wakwe Dani, ncipani cakwe Shuwamu.

⁴³ Cipani ici cakalinga kucite basankwa bali 64,400.

⁴⁴ Mumukowa wakwe Asha, ncipani cakwe Imuna, Ishifi alimwi acakwe Beliya.

⁴⁵ Cipani cakwe Eba aMalukili shakaswa muli Beliya.

⁴⁶ Asha wakalinga kucite amwaana mwanakashi wiitwa ayi Sela.

⁴⁷ Shipani ishi shakalinga kucite basankwa bali 53,400.

⁴⁸ Mumukowa wakwe Nafutali, ncipani cakwe Jasilu, Guni,

⁴⁹ Jesa alimwi acakwe Shilemu.

⁵⁰ Shipani ishi shakalinga kucite basankwa bali 45,400.

⁵¹ Nkokwaamba ayi basankwa bene Isilaeli boonse pantu pomwi bakalinga 601,730.

⁵² Mpomunyaawo Mwaami Lesa wakaambila Mose ayi,

⁵³ “Mikowa yoonse iyi uyaabanye cishi kweelana akufula kwa mukowa womwi awomwi.

⁵⁴ Mukowa ucite bantu baanji ulyeelete kupekwa cishi cinene, awalo ucite bantu baniini, ulyeelete kupekwa cishi ciniini. Mukowa uli woonse utambule kweelana abantu balembetwe.

⁵⁵ Ulyeelete kubona ayi waabanya kwiinda mukuuma cisolo. Cishi ca mukowa womwi awomwi cilaakupekwa liina lya mushali wa nguwo mukulukulu.

⁵⁶ Cishi cilyeelete kwaabanishikwa kwiinda mukuuma cisolo pakati ka mikowa icite bantu baanji ayeeyo icite baniini.”

⁵⁷ Mumukowa wakwe Lefi amwalo mwakalinga cipani cakwe Geshoni, Koati acakwe Melali.

⁵⁸ Shipani shimwi sha mumukowa wakwe Lefi nsheeshi. Bene Libini, Ebuloni, Maali, Mushi alimwi abene Kola. Koati ngowakashala Amulamu

⁵⁹ uyo wakalinga kweebete mwanaakwe Lefi wiitwa ayi Jokebedi, wakashalilwa mucishi ca Ijipiti. Wakashalila Amulamu baana basankwa bobilo, Aloni aMose, kubikaawo amwanakashi womwi, Milyamu.

⁶⁰ Aloni wakashala baana basankwa bone, Nadabu, Abiyu, Eliyasa alimwi aItama.

⁶¹ Sombi Nadabu alimwi aAbiyu bakafwa ndibakabenga mulambu pamulilo utasalalite kuMwaami Lesa.

⁶² Anu basankwa bene Lefi abo bakalinga kucite mweenshi akuya kunembo pantu pomwi boonse bakalinga 23,000. Pabene Isilaeli boonse, balo tabakwe kubelengelwa pantu pomwi abene Isilaelinyinaabo mukwiinga tabakwe kupekwawo cishi pakati kabo.

⁶³ Ono ishi nshipani shoonse sha bene Isilaeli Mose aEliyasa nshebakabelenga mumawesa a Moabu kwitala lya Mulonga wa Joodani na kamuli muJeliko.

⁶⁴ Taaku musankwa nabi womwi wakacaala pabaabo Mose aAloni mupailishi mbobakalemba mukubelengwa kutaanshi muluyanga lwa Sinayi,

⁶⁵ mukwiinga Mwaami Lesa wakaamba ayi boonse balaakufwita muluyanga. Aboobo boonse bakaloba, kukushakobo Kalebu mwanaakwe Jefune alimwi aJoshuwa mwanaakwe Nani.