Shakubelenga 23 - Baibo Busansulushi Bwa Libuku Ili

¹ Mpeeke Balaamu wakaambila Balaki ayi, “Amunjakile shipaililo shosanwe ashobilo pano, akundetela bacende bosanwe abobilo alimwi ambelele shisankwa shosanwe ashobilo.”

² Alakwe Balaki wakacita kweelana ambwaakalwiitwa, anu lakwe alimwi aBalaamu bakabenga mucende womwi ambelele isankwa yomwi pacipaililo comwi acomwi.

³ Lyalo Balaamu wakaambila Balaki ayi, “Imikana waano pali mulambu wako wakutenta nebo ndyenciya mukubona na Mwaami Lesa utoonkumanya nabi taau. Ntookulwiita cili coonse nceshi anjubulwita.” Aboobo wakaya eenka peculu pakalundu,

⁴ alakwe Mwaami Lesa wakamukumanya. Mpeeke Balaamu wakamwaambila ayi, “Ndayaaka shipaililo shosanwe ashobilo akubengelawo mucende womwi ambelele isankwa yomwi pacipaililo comwi acomwi.”

⁵ Mpomunyaawo Mwaami Lesa wakalwiita Balaamu shakwaamba akumwaambila ayi, “Boolela kuli Balaki ukamwaambile mbondakulwiita.”

⁶ Aboobo wakaboolela akucana Balaki uciimfwibo pamulambu wakwe wakutenta pantu pomwi abamatanjilili ba bene Moabu boonse.

⁷ Kuswawaawo Balaamu wakalaluka ayi, “Balaki wankusha kuSilya, mwaami wa kuMoabu wankusha kuswa kutulundu twa kwicwe. Wakaamba ayi, ‘Kosa unshinganineko Jakobo. Kosa unambilileko malwesa bene Isilaeli.’

⁸ Ino nebo inga ndashingana buyani abo Lesa mbwaatakwe kushingana? Ino nebo inga ndalamba buyani malwesa abo Mwaami Lesa mbwaatakwe kulamba?

⁹ Ndababona kuswa peculu lya tulundu twa mabwe. Ndababona kuswa peculu lya tulundu tulaamfu. Ngumushobo wikalabo weenka, balishi ayi balicite coolwe kwiinda mishobo imwi yoonse.

¹⁰ Ngani weenga wabelenga bamulunyungu lwakwe Jakobo? Ncakwiila mbaanji anga ngumuseese. Inshiku shangu anshimanishe anga ngumuntu wakwe Lesa. Amfwite muluumuno anga mbantu baluleme.”

¹¹ Lyalo Balaki wakaambila Balaamu ayi, “Wancitilanshi bobulya? Ndakakwiitila kushingana balwani bangu, sombi webo ncewacita nkubapa coolwe.”

¹² Lakwe wakakumbula ayi, “Nebo ndaambabo Mwaami Lesa nceenga wandwiita ayi ŋambe.”

Kulaluka kwabili kwakwe Balaamu

¹³ Mpomunyaawo Balaki wakaambila Balaamu ayi, “Katiya soonse kumusena umwi uko nkweenga wabonabo bene Isilaeli bamwi. Unshinganishileeko nkomunya uko.”

¹⁴ Lyalo wakamutola kumuunda wa Sofimu peculu lyaKalundu ka Pisiga. Apalo apo wakayakawo shipaililo shosanwe ashobilo akubengelawo mucende womwi alimwi ambelele isankwa yomwi pacipaililo comwi acomwi.

¹⁵ Mpeeke Balaamu wakaambila Balaki ayi, “Imikana waano pali mulambu wako wakutenta, nebo ndaya mukukumana aLesa kulya.”

¹⁶ Aboobo Mwaami Lesa wakakumana aBalaamu akumulwiita shakwaamba akumwaambila ayi, “Boolela kuli Balaki ukamwaambile mbondakulwiita.”

¹⁷ Aboobo wakaboolela akucana Balaki uciimfwibo pamulambu wakwe wakutenta pantu pomwi abamatanjilili ba bene Moabu. Balaki wakamwiipusha ayi, “Ino Mwaami Lesa waamba ayinshi?”

¹⁸ Mpomunyaawo Balaamu wakalaluka ayi, “Amunyamuke baBalaki munkutike, amunyumfwe nobana babo baSipo.

¹⁹ Lesa taabete anga mbantu abo babeshi. Taabete anga ngumuntu upilula miyeeyo yakwe. Coonse nceenga walasha, ulacicita alimwi na waamba, ncaamba cilacitwa.

²⁰ Nebo ndalwiitwa ayi mpe coolwe. Ono na Lesa wapa coolwe, nebo inga nshicisanduliiwo.

²¹ Taaku mapensho kubamulunyungu lwakwe Jakobo, taaku makatasho kubene Isilaeli. Mwaami Lesa, Lesa wabo uli ambabo, abalo beene baloolobesha ayi nguMwaami wabo.

²² Lesa wakabakusha mucishi ca Ijipiti, ulabalwaninaako anga ninyati.

²³ Taaku buloshi kubamulunyungu lwakwe Jakobo, taaku buŋanga bweenga bwasebensa kubene Isilaeli. Ono bantu balaakwaamba pabene Isilaeli ayi, ‘Amubone Lesa nshaacita!’

²⁴ Bene Isilaeli balanyamuka anga ninkalamu yanakashi, balalibusha anga ninkalamu isankwa. Tayookeshi kushikila yacaya akulya, akunwa bulowa bwa ceeco nceyacaya.”

²⁵ Lyalo Balaki wakaambila Balaamu ayi, “Wakaaka kushingana bene Isilaeli, sombi acoolwe coonse utabapi!”

²⁶ Lakwe Balaamu wakakumbula ayi, “Sa nshikwe kumulwiita ayi ndyeelete kucitabo Mwaami Lesa nsheenga wandwiita?”

Kulaluka kwatatu kwakwe Balaamu

²⁷ Mpomunyaawo Balaki wakaambila Balaamu ayi, “Katiya soonse, ono ntookutola kumusena umwi. Mpashi Lesa kwalo inga wasuminisha ayi uye unshinganineko bene Isilaeli.”

²⁸ Aboobo wakatola Balaamu peculu paKalundu ka Peyo, kalangene aluyanga.

²⁹ Mpeeke Balaamu wakamwaambila ayi, “Anu njakile shipaililo shosanwe ashobilo pano akundetela bacende bosanwe abobilo alimwi ambelele shisankwa shosanwe ashobilo.”

³⁰ Balaki wakacita kweelana ambwaakalwiitwa, akubenga mucende womwi alimwi ambelele isankwa yomwi pacipaililo comwi acomwi.