Shakubelenga 21 - Baibo Busansulushi Bwa Libuku Ili

Kukomwa kwa bene Kenani bamwi

¹ Ono mwaami mwine Kenani wa kuAladi kulubasu lwa kumalenge ndyaakanyumfwa ayi bene Isilaeli batoosita kuAtalimu, wakabalwana akucatawo bantu bamwi.

² Lyalo bene Isilaeli bakashomesha cakulumbila kuMwaami Lesa ayi, “Na mutusuminishe kukoma bantu aba, tulaakubabenga kuli ndimwe pantu pomwi amandabala abo. Nkokwaamba ayi tulaakubanyonyoola alimwi amandabala abo.”

³ Mwaami Lesa wakabanyumfwa akubacafwa ayi bakome bene Kenani. Aboobo bene Isilaeli bakabanyonywetabo limwi pantu pomwi amandabala abo. Mpeeke musena uyo wakatumbwa ayi Oma.

Insoka ya bulonse

⁴ Mpeeke bene Isilaeli bakaswa paKalundu ka Ole akwiinda nshila iya kuLweenge Lusalala kwaamba ayi bashinguluke cishi ca Edomu. Sombi pakunooya bantu bakatyongola

⁵ akutalika kutongookela Lesa alimwi aMose. Bakaamba ayi, “Nciinshi ncemwakatukushisha mucishi ca Ijipiti ayi twise tufwite momuno muluyanga mutaamu shakulya nabi maanshi? Twalema kulya cakulya ici cibiibi!”

⁶ Lyalo Mwaami Lesa wakabatumina nsoka shikali, alimwi bene Isilaeli baanji bakalumwa akufwa.

⁷ Ndibakabona boobo, bakesa kuli Mose akwaamba ayi, “Twakabisha nditwakatongookela Mwaami Lesa alimwi amwebo. Ono amupaile kuMwaami Lesa.” Aboobo Mose wakabapaililaako.

⁸ Mpomunyaawo Mwaami Lesa wakalwiita Mose ayi apange nsoka ya bulonse akuyaanjika pacisamu kwaamba ayi woonse weenga walumwa inga walanga kuli njiyo akuba kabotu.

⁹ Aboobo Mose wakapanga nsoka ya bulonse akuyaanjika pacisamu. Uyo woonse wakalumwa akulanga kunsoka iyo, wakaba kabotu.

Lweendo lwakuya kucishi ca Moabu

¹⁰ Kuswawaawo bene Isilaeli bakalonga akuya mukuyaka misumba kuOboti.

¹¹ Ndibakaswa pamusena uyo, bakayaka misumba pamatongo a Abalimu muluyanga, kwicwe lya cishi ca bene Moabu.

¹² Kuswa kooko bakalonga akuya mukuyaka misumba yabo mucinyika ca Seledi.

¹³ Lyalo bakalonga alimwi, akuya mukuyakila kumatwa lya Mulonga wa Anoni, muluyanga lushika mucishi ca bene Amoli. Mulonga wa Anoni wakalinga njenyinsa ya cishi ca Moabu alimwi aca Amoli.

¹⁴ Nceceeco Libuku lya Nkondo sha Mwaami Lesa ncelyaambilila ayi, “Pandabala ya Wayebu mumusena wa Sufa, alimwi ashinyika. Mulonga wa Anoni,

¹⁵ ankunamo ya shinyika shiya mukushika mundabala ya Ali alimwi akushika kunyinsa ya cishi ca Moabu.”

¹⁶ Kuswa kooko bakeenda akushika kumukalo wiitwa ayi Biya, uko Mwaami Lesa nkwaakaambila Mose ayi, “Bunganya bantu kwaamba ayi mbape maanshi.”

¹⁷ Paciindi ico bene Isilaeli bakeemba lwiimbo ulu, “Omukalo kusha maanshi ako! Atwiimbile mukalo uyo!

¹⁸ Uyo mukalo wakakaba bamaami. Ncakwiila bamatanjilili ba bantu mbobakaukaba. Bakaukaba akasako ka bwaami kabo ankooli shabo.” Mpomunyaawo bakaswa muluyanga akuya kuMatana,

¹⁹ alimwi kuswa kooko bakaya kunembo akushika kuNaaliyelo. Ono ndibakaswaako uko bakaya kuBamoti,

²⁰ alimwi ndibakaswa kuBamoti bakaya kucinyika cili mucishi ca bene Moabu, kamutana kushika peculu lya Kalundu ka Pisiga, aluyanga kalubwenekete.

Kukomwa kwa mwaami Sioni amwaami Ogi

²¹ Lyalo bene Isilaeli bakatuma bantu kumwaami Sioni wa bene Amoli mukumwaambila ayi,

²² “Mutusuminishe kwiinda mucishi canu. Swebo alimwi aŋombe shesu teshi twiinde mumyuunda imwibo nabi ya minyansa alimwi teshi tunwe maanshi mumikalo yanu. Tunanoolibo mumukwakwa unene kushikila tuswe mucishi canu.”

²³ Sombi Sioni wakakasha bene Isilaeli kwiinda mucishi cakwe. Lakwe wakabunganya likoto lyakwe lya bashilumamba akuya kuJaasi muluyanga akulwana bene Isilaeli.

²⁴ Nacibi boobo, bene Isilaeli bakacaya balwani babo baanji alimwi akwikala mucishi cabo, kuswa kuMulonga wa Anoni tibili akuMulonga wa Jaboku, kweela cishi ca bene Amoni mukwiinga nyinsa yabo yakalinga kulamitwe kabotu abuumbi.

²⁵ Munshila iyi bene Isilaeli bakabwesa mandabala anene oonse a bene Amoli akwikalaamo, kubikaawo aEshiboni alimwi amandabala amwi oonse akalinga kushingulukite.

²⁶ Anu Eshiboni yakalinga njendabala inene ya mwaami Sioni wa bene Amoli, uyo wakalwana mwaami wa bene Moabu wakalingaawo kalekale akumunyaya cishi coonse kuya mukweela kuMulonga wa Anoni.

²⁷ Nceceeco bantu beshitushimpi ncebakaambila ayi, “Amwise kuEshiboni, ndabala inene iyakwe alimwi, ndabala inene ya mwaami Sioni ibe mboyakalinga!

²⁸ Kalekale kuswa mundabala iyo ya Eshiboni, bashilumamba bakwe Sioni bakalinga kuya anga ngumulilo. Bakanyonyoola ndabala inene ya Ali muMoabu, alimwi atulundu twa kumatalikilo a Mulonga wa Anoni.

²⁹ Mapensho kuli ndimwe nobene Moabu! Mwebo nomulambila Kemoshi mwanyonyoolwa! Lesa wanu ulalengesha basankwa banu kulobokela kushishi shimwi, abalo banakashi Sioni mwaami wa bene Amoli wakabacata.

³⁰ Sombi bulya bamulunyungu lwabo bakakomwa, kutalikila kuEshiboni kushikila akuDiboni. Twakabanyonyoola kushikila akuNofa, ndabala ili pafwaafwi aMedeba.”

³¹ Mpeeke bene Isilaeli bakatalika kwikala mucishi ca bene Amoli,

³² Lyalo Mose wakatuma beshikusensa kundabala inene ya Jasa. Anu bene Isilaeli bakeebwesa alimwi amandabala amwi akalinga kwiishingulukite, akutandamo bene Amoli bakalinga kwikalaamo.

³³ Kuswawaawo bene Isilaeli bakapetuka akwiinda nshila ya kuBashani. Mpeeke mwaami Ogi wa bene Bashani, wakanyamuka alikoto lyakwe lya bashilumamba mukulwana ambabo kuEdileyi.

³⁴ Mpomunyaawo Mwaami Lesa wakaambila Mose ayi, “Utamuloondi. Nebo ntoolengesha ayi mumukoome, bantu bakwe alimwi acishi cakwe. Umuciite bweenka mbowakacita Sioni mwaami wa bene Amoli, uyo wakalinga kweendelesha kuEshiboni.”

³⁵ Aboobo bene Isilaeli bakacaya Ogi pantu pomwi abana bakwe basankwa, bantu bakwe boonse cakutashiyaawo nabi womwi. Kuswawaawo bakekala mucishi cakwe.