Shakubelenga 2 - Baibo Busansulushi Bwa Libuku Ili

Kubambwa kwa mikowa mumisumba

¹ Mpomunyaawo Mwaami Lesa wakaambila Mose aAloni ayi,

² “Na bene Isilaeli bayaka misumba, musankwa womwi awomwi ulyeelete kuyakila pafwaafwi ambembela ya likoto lyakwe, aya mukowa wakwe. Misumba ilyeelete kuyakwa kantalamukila kuswa kuTente akwiishinguluka.”

³ Kulubasu lwa kwicwe, makoto a mumukowa wakwe Juda alyeelete kuyaka misumba yabo pafwaafwi ambembela yabo. Mutanjilili wa bamumukowa uyu nguNashoni mwanaakwe Aminadabu.

⁴ Mweelo wa basankwa bacikonsha kusebensa mulimo wa bushilumamba mulikoto ili ngu 74,600.

⁵ Mukowa wakwe Isaka ngweshi ukonkane awakwe Juda. Mutanjilili wa mukowa uyu nguNetanelo mwanaakwe Suwa.

⁶ Mweelo wa basankwa bacikonsha kusebensa mulimo wa bushilumamba mulikoto ili ngu 54,400.

⁷ Kuswawaawo palaakwisa mukowa wakwe Sebuluni. Mutanjilili wabo ngu Elyabu mwanaakwe Eloni.

⁸ Mweelo wa basankwa bacikonsha kusebensa mulimo wa bushilumamba mulikoto ili ngu 57,400.

⁹ Nkokwaamba ayi basankwa boonse bakapekwa kuyakila kumukowa wakwe Juda, kweelana amakoto abo, bakakumana 186,400. Likoto ili ndyeshi likanooli kunembo pakunooya.

¹⁰ Kulubasu lwa kumalenge kulaakuyakila makoto a mumukowa wakwe Lubeni, pafwaafwi ambembela yabo. Mutanjilili wa mukowa uyu nguElisuli mwanaakwe Sheduwa.

¹¹ Mweelo wa basankwa bacikonsha kusebensa mulimo wa bushilumamba mulikoto ili ngu 46,500.

¹² Balo balaakubambana amukowa wakwe Simyoni. Mutanjilili wa mukowa wakwe Simyoni uyu nguShelumyelo mwanaakwe Sulishadayi.

¹³ Mweelo wa basankwa bacikonsha kusebensa mulimo wa bushilumamba mulikoto ili ngu 59,300.

¹⁴ Kuswawaawo palaakwisa mukowa wakwe Gadi. Mutanjilili wabo nguEliyasafu mwanaakwe Dewelo.

¹⁵ Mweelo wa basankwa bacikonsha kusebensa mulimo wa bushilumamba mulikoto ili ngu 45,650.

¹⁶ Nkokwaamba ayi basankwa boonse bakapekwa kuyakila kumukowa wakwe Lubeni, kweelana amakoto abo, bakakumana 151,450. Likoto ili ndyeshi likanooli lyabili pakunooya.

¹⁷ Ono pakati ka makoto obilo ataanshi alimwi amakoto obilo akweelaako, palyeelete kweenda bene Lefi kabanyamwite aTente. Likoto lili lyoonse linanooya ceenda kweelana ambweshi bakayake misumba alimwi lilyeelete kuba pafwaafwi ambembela ya ndilyo.

¹⁸ Kulubasu lwa kumbo kulaakuyakila makoto a mumukowa wakwe Efuleemu, pafwaafwi ambembela yabo. Mutanjilili wa mukowa uyu nguElishama mwanaakwe Amiyudi.

¹⁹ Mweelo wa basankwa bacikonsha kusebensa mulimo wa bushilumamba mulikoto ili ngu 40,500.

²⁰ Kuswawaawo palaakwisa mukowa wakwe Manase. Mutanjilili wa mukowa uyu nguGamalyelo mwanaakwe Pedasa.

²¹ Mweelo wa basankwa bacikonsha kusebensa mulimo wa bushilumamba mulikoto ili ngu 32,200.

²² Kuswawaawo palaakwisa mukowa wakwe Benjameni. Mutanjilili wa mukowa uyu nguaAbidani mwanaakwe Gidyoni.

²³ Mweelo wa basankwa bacikonsha kusebensa mulimo wa bushilumamba mulikoto ili ngu 35,400.

²⁴ Nkokwaamba ayi basankwa boonse bakapekwa kuyakila kumukowa wakwe Efuleemu, kweelana amakoto abo, bakakumana 108,100. Likoto ili ndyeshi likanooli lyatatu pakunooya.

²⁵ Ingayi kulubasu lwa kumatwa kulaakuyakila makoto a mumukowa wakwe Dani, pafwaafwi ambembela yabo. Mutanjilili wa mukowa uyu nguAyiyesa mwanaakwe Amishadayi.

²⁶ Mweelo wa basankwa bacikonsha kusebensa mulimo wa bushilumamba mulikoto ili ngu 62,700.

²⁷ Mukowa wakwe Asha ulaakubambana awakwe Dani. Mutanjilili wa mukowa uyu nguPagiyelo mwanaakwe Okulani.

²⁸ Mweelo wa basankwa bacikonsha kusebensa mulimo wa bushilumamba mulikoto ili ngu 41,500.

²⁹ Kuswawaawo palaakwisa mukowa wakwe Nafutali. Mutanjilili wa mukowa uyu nguAyila mwanaakwe Enani.

³⁰ Mweelo wa basankwa bacikonsha kusebensa mulimo wa bushilumamba mulikoto ili ngu 53,400.

³¹ Nkokwaamba ayi basankwa boonse bakapekwa kuyakila kumukowa wakwe Dani, kweelana amakoto abo, bakakumana 157,600. Likoto ili ndyeshi likanooli kwisule pakunooya pafwaafwi ambembela yabo.

³² Bene Isilaeli boonse abo bakalembwa, kweelana amikowa alimwi amakoto ngobakalingaamo, pantu pomwi bakakumana 603,550.

³³ Ono kweelana aMwaami Lesa mbwaakaambila Mose, bene Lefi tabakwe kulembwa pantu pomwi amikowa imwi ya bene Isilaeli.

³⁴ Munshila iyo bene Isilaeli bakacita shoonse isho Mwaami Lesa nshaakaambila Mose. Bakayaka misumba womwi awomwi pafwaafwi ambembela yabo, alimwi akweenda womwi awomwi mucipani ca mumukowa wakwe.