Shakubelenga 19 - Baibo Busansulushi Bwa Libuku Ili

Milota ya ŋombe mpwishi isalala

¹ Mpomunyaawo Mwaami Lesa wakaambila Mose aAloni ayi,

² “Lwiita bene Isilaeli milawo iyi ayi bakamuletele ŋombe mpwishi isalala itacite kampenda alimwi itana kusebensaawo.

³ Balo balaakwiipa Eliyasa mupailishi. Mpwishi iyi ilyeelete kutolwa pansengwe lya misumba, akucaikwa pameenso akwe.

⁴ Lyalo Eliyasa ulaakubwesa bulowa bwa njiyo bumwi akusumpamo munwe alimwi akubusanseela cakulansha kunembo lya Tente ya Cipangano mankanda osanwe aobilo.

⁵ Sombi ŋombe yoonsebo, kubikaawo acipaya, nyama, bulowa alimwi asha mukati shilyeelete kutentwa pameenso akwe.

⁶ Mpeeke ulyeelete kubwesa kasamu ka sida, fuute alimwi akasani kasalala akushiwaala mumulilo mutoopya ŋombe iyo.

⁷ Kuswawaawo akacape shakufwala shakwe akusamba pamubili, lyalo ndyeenga wenjila mumisumba. Nakubi boobo teshi akanoosalalite kweelana aMilawo kushikila macolesha.

⁸ Muntu uyo watenta mpwishi iyo alakwe ulyeelete kucapa shakufwala shakwe akusamba pamubili. Nakubi boobo alakwe teshi akanoosalalite kushikila macolesha.

⁹ Lyalo muntu usalalite kweelana aMilawo ulyeelete kuyola milota ya mpwishi iyo akwiibika pamusena usalalite kweelana aMilawo pansengwe lya misumba. Uko nkobeelete kwiilama bene Isilaeli ayi njakusebensesha pakubamba maanshi akusalasha kuswa kushibiibi.

¹⁰ Muntu uyo weenga wayola milota ulyeelete kucapa shakufwala shakwe. Nakubi boobo teshi akanoosalalite kushikila macolesha. Bene Isilaeli alimwi abaswamashi mbobashiitaabo balyeelete kunookonkela mulawo uyu lyoonsebo.

Kukumya kumutuntu

¹¹ “Uyo woonse weenga wakumya mutuntu teshi akanoosalalite kweelana aMilawo kwanshiku shosanwe ashobilo.

¹² Ulyeelete kulisalasha amaanshi akusalasha pabushiku bwatatu alimwi abwasanu ashobilo, lyalo ndyeenga waba muntu usalalite. Sombi na wabula kulisalasha pabushiku bwatatu abwasanu ashobilo, teshi akanoosalalite.

¹³ Uyo woonse weenga wakumya kumutuntu akubula kulisalasha, ulaba kaatasalalite mukwiinga maanshi akusalasha taakwe kusanseelwa pali nguwe. Muntu uyo ulabisha Tente ya Cipangano yangu neMwaami Lesa, aboobo teshi akanoociyeeyelwa kuba mulikoto lya bene Isilaeli.

¹⁴ “Ono na muntu umwi wafwita mumusumba, uyo woonse weenga kaali mumo paciindi calufu nabi wooyo weenga wenjilaamo, teshi akanoosalalite kwanshiku shosanwe ashobilo.

¹⁵ Shakubikamo maanshi shoonse isho shitacite shakufwekaawo shiliimo ashalo teshi shikanoosalalite.

¹⁶ Na umwi pansengwe lya misumba, wakumya muntu wakacaikwa amupeeni, wakafwabo, cifuwa ca muntu nabi cuumbwe, alakwe teshi akanoosalalite kwanshiku shosanwe ashobilo.

¹⁷ “Ono kwaamba ayi kutasalala uku kumane, milota ya ŋombe isalala iyo yakatentwa ayi njakukushisha shibi ilyeelete kubikwa mumupika akubikamo maanshi abotu.

¹⁸ Cakutaanguna muntu usalalite kweelana aMilawo ulyeelete kubwesa fuute akuusumpa mumaanshi ayo akusanseela kumusumba akushintu shiliimo shoonse alimwi akubantu bakalingaamo. Kuboolaawo umwi usalalite kweelana aMilawo ulyeelete kusanseela maanshi ayo pamuntu uyo wakakumya cifuwa ca muntu, mutuntu nabi cuumbwe.

¹⁹ Ono pabushiku bwatatu apabwasanu ashobilo, muntu usalalite kweelana aMilawo ulyeelete kusanseela maanshi pamuntu uyo utasalalite. Lyalo pabushiku bwasanu ashobilo ulyeelete kumusalasha. Alakwe na wamana kusalashikwa ulyeelete kucapa shakufwala shakwe akusamba pamubili, lyalo ulaba usalalite kweelana aMilawo pakwipila lisuba.

²⁰ “Uyo woonse utasalalite kweelana aMilawo na wabula kulisalasha, teshi akanoosalalite ceebo maanshi akusalasha taakwe kusanseelwa pali nguwe. Muntu uyo ingayi wabisha Tente ya Cipangano cangu neMwaami Lesa alimwi teshi akanoociyeeyelwa kuba mulikoto lya bantu bangu.

²¹ Mulyeelete kunookonkela mulawo uyu lyoonsebo. Muntu uyo usanseela maanshi akusalasha, alakwe ulyeelete kucapa shakufwala shakwe. Uyo woonse weenga wakumya maanshi akusalasha teshi akanoosalalite kushikila macolesha.

²² Anu ico coonse muntu utasalalite kweelana aMilawo nceenga wakumya, ingayi acalo tacisalalite, alakwe uyo weenga wacikumya teshi akanoosalalite kushikila macolesha.”