Shakubelenga 18 - Baibo Busansulushi Bwa Libuku Ili

Milimo ya bapailishi alimwi abene Lefi

¹ Mpeeke Mwaami Lesa wakaambila Aloni ayi, “Webo, bana bako basankwa alimwi abene Lefi bamwi mulyeelete kunoolanga pamilandu ikumite kuTente ya Cipangano. Ono webo alimwi abana bako basankwa, nweenkabo, mulyeelete kunoolanga pamilandu ikumite kubupailishi.

² Unooleta abene Lefinyoko bamulunyungu lwa kumukowa wako ayi banoocafwako ndiwe alimwi abana bako basankwa pakunoosebensa muTente.

³ Balyeelete kunookusebensela alimwi akunoocita milimo imwi yoonse ya muTente, sombi tabeelete kusena pafwaafwi ashintu shisalalite muMusena Usalalite nabi kucipaililo. Na bakasene pafwaafwi, balo amwebo noonse mulaakufwa.

⁴ Balyeelete kunoosebensela pantu pomwi amwebo, akusebensa milimo yoonse ya muTente sombi taaku umwi uli woonse weelete kusena pafwaafwi ampweenga kamubete.

⁵ Webo alimwi abana bako nweenkabo ndimwe mweelete kunoolanga pamilimo ya muMusena Usalalite acipaililo, kwaamba ayi bukali bwangu butakabi pabene Isilaeli alimwi.

⁶ Nebo nemwiine ndime ndasala bene Lefinyoko kuswa pabene Isilaeli ayi cibe ncecipo cako. Babengwa kuli ndime kwaamba ayi banoosebensa milimo ya muTente ya Cipangano.

⁷ Sombi webo alimwi abana bako basankwa nweenkabo, ndimwe mweelete kusebensa mulimo wa bupailishi, uyo ukumite kucipaililo alimwi aMusena Usalalite Wiindaawo. Uyu mulimo wa bupailishi ncipo ncendamupa. Uyo woonse umwi weenga wasena pafwaafwi aMusena Usalalite ulyeelete kucaikwa.”

Cipansha ca bapailishi

⁸ Lyalo Mwaami Lesa wakaambila Aloni ayi, “Nebo nemwiine ndakupa shipo shoonse isho bene Isilaeli nshebampa. Ndapa ndiwe abana bako basankwa ayi ncecipansha canu ico nceshi mukanoopekwa lyoonse.

⁹ Mulyeelete kunoopekwa cipansha ca shintu shisalalite abuumbi isho shitatentwi pacipaililo. Kuswa pacipo coonse cisalalite ciindaawo ico ncebaleta kuli ndimwe, nabi ncipo ca shili anga ngamaila, mulambu wakulekelelwa shibiibi alimwi awakumana milandu, ishi nshaako alimwi abana bako basankwa.

¹⁰ Mukanoolita mumusena usalalite alimwi basankwa beenkabo mbobeelete kulya. Mukanooshilanga ayi nshintu shisalalite.

¹¹ “Kwiilika pashintu ishi shipo shakutambeeka shoonse isho bene Isilaeli nsheenga bandetela ndashipa ndiwe, bana bako basankwa alimwi abanakashi ayi mukanoopekwa lyoonsebo. Woonse muntu uli muŋanda yanu uyo usalalite kweelana aMilawo inga walyaako.

¹² “Ndamupa shintu shibotu shoonse sha mafuta a olifi, waini alimwi ashili anga ngamaila shitaangunwa kutebulwa, isho bene Isilaeli nshebapa ndime neMwaami Lesa kuswa mumyuunda yabo.

¹³ Shoonse shakulya nshebataanguna kutebula mucishi isho nshebapa ndime neMwaami Lesa, shilaakuba shaanu. Woonse muntu uli muŋanda yanu uyo usalalite kweelana aMilawo inga walyaako.

¹⁴ “Anu shoonse shintu mucishi ca Isilaeli isho shabengwa kuli ndime neMwaami Lesa, nshinenu.

¹⁵ “Woonse mwaana wakwiiya wa muntu nabi wa munyama uyo wabengwa kuli ndime neMwaami Lesa, ngwanu. Sombi baana bakwiiya boonse ba bantu alimwi abanyama bakwiiya boonse batasalalite kweelana aMilawo balyeelete kunoolubulwa.

¹⁶ Baana balaakunoolubulwa amaali osanwe a silifa na bakumanya mweenshi womwi, maali ngomunya amweelo wakasuminishikwa.

¹⁷ Sombi boombe bakwiiya, mbelele alimwi ampongo tabeelete kunoolubulwa, ceebo balisalalite. Mulyeelete kusanseela bulowa bwabo pacipaililo akutenta mafuta abo ayi ngumulambu wa cakulya. Bweema bwa mulambu uyu bulansangalasha nebo neMwaami Lesa.

¹⁸ Yalo nyama njanu, bweenka mbuli ntiti alimwi amweendo wakatako walulyo pamulambu wakutambeeka.

¹⁹ “Nkokwaamba ayi shipo shoonse shisalalite isho bene Isilaeli nsheshi banoondetela lyoonse ndashipa ndiwe, bana bako basankwa alimwi abanakashi ayi ncecipansha canu lyoonse. Ici ncecipangano kuli ndiwe alimwi abamulunyungu lwako lyoonsebo.”

²⁰ Mpomunyaawo Mwaami Lesa wakaambila Aloni ayi, “Taaku cishi nceshi ukapekwe ayi ncaako mucishi ca Isilaeli, alimwi taaku shintu nsheshi ukapekwe anga njimikowa imwi. Nebo neMwaami Lesa ndime cipansha cako alimwi abuboni mboweelete kupyana pabene Isilaeli.”

Cipansha ca bene Lefi

²¹ Mpeeke Mwaami Lesa wakaamba ayi, “Bene Lefi ndabapa calikumi coonse ncebandetela bene Isilaeli, ayi ngomalipilo pamulimo ngobacita muTente ya Cipangano.

²² Kuswa sunu, bene Isilaeli bamwi boonse tabeelete kunoosena pafwaafwi aTente. Na bakasene pafwaafwi, balaakucaikwa ceebo cakubisha uko.

²³ Bene Lefi beenkabo mbobeelete kunoosebensela muTente alimwi mbweshi bakanoopekwa mulandu pacibiibi cacitika umo. Uyu ngumulawo weelete kunookonkelwa lyoonse mumashalane oonse acisa. Bene Lefi teshi bakapekwewo cintu ayi ncabo pamikowa yoonse ya bene Isilaeli.

²⁴ Sombi balo ndabapa shalikumi shoonse isho nsheshi bakanoondetela bene Isilaeli ayi ncipo cangu nebo neMwaami Lesa. Nceceeco ncendabaambilila ayi, ‘Teshi bakapekwewo cintu ayi ncabo pamikowa yoonse ya bene Isilaeli.’ ”

Calikumi ca bene Lefi

²⁵ Mwaami Lesa wakaambila Mose ayi,

²⁶ “Lwiita bene Lefi ayi na mwatambula calikumi kuswa kubene Isilaeli ico ncendamupa ayi ncipansha canu, amwebo mulyeelete kukushawo calikumi akucipa ayi ncipo kuli ndime neMwaami Lesa.

²⁷ Cipo canu ici cilaakuba anga ncipo ca fulaulo shipya nabi waini upya.

²⁸ Munshila iyi, amwebo mulaakunoopa cipo kuli ndime neMwaami Lesa kuswa pashalikumi isho bene Isilaeli nshebampa. Kuswa pashalikumi ishi, mulyeelete kupa Aloni mupailishi cipansha cangu nebo neMwaami Lesa.

²⁹ Cipansha ca Mwaami Lesa cilyeelete kuba ca shintu shiindaawo kubota alimwi shisalalite shiindaawo pashintu shoonse nshemupekwa.

³⁰ Na mwapa kale cipansha ciindaawo kubota, cilaakuba anga ncipo ca fulaulo shipya nabi waini upya.

³¹ Ono mwebo alimwi abamumaandaanu inga mwalita kuli koonse nkomusuni shoonse nsheenga shacaalaawo, mukwiinga ngomalipilo anu pamulimo ngomucita muTente ya Cipangano.

³² Na mwapa kale cipansha ciindaawo kubota, teshi mukanoolipa mulandu pakunoolya. Pakucita boobo, teshi mukalengeshe cipo cisalalite ca bene Isilaeli kuba citasalalite, ceebo inga mwafwa.”