Shakubelenga 17 - Baibo Busansulushi Bwa Libuku Ili

Nkoli yakwe Aloni

¹ Mpomunyaawo Mwaami Lesa wakaambila Mose ayi,

² “Lwiita bene Isilaeli ayi bakupe nkoli shili likumi ashobilo, nkokwaamba ayi yomwi kuswa kumutanjilili womwi awomwi wa mukowa uli woonse. Ulyeelete kulemba liina lya musankwa uli woonse pankoli yakwe.

³ Mpeeke ukalembe liina lyakwe Aloni pankoli itokwiimikanina bene Lefi. Anu kulaakuba nkoli yomwi ya mutanjilili wa mukowa uli woonse.

⁴ Inkoli isho ukashitole kuTente ya Cipangano akushibika kunembo lya Libokoshi lya Cipangano, uko nkoonkumanina awebo.

⁵ Lyalo nkooli ya musankwa ngondasala ilaakusonsa. Munshila iyi ndaakukasha kutongooka kwa bene Isilaeli kutamaani pali ndiwe.”

⁶ Mpeeke Mose wakaamba abene Isilaeli alimwi bamatanjilili babo boonse mumikowa bakamupa nkoli yomwi yomwi, pantu pomwi shoonse shakalinga likumi ashobilo. Nkoli yakwe Aloni ayalo yakabikwa pantu pomwi anshisho.

⁷ Kuswawaawo, Mose wakabika nkoli shoonse muTente, kunembo lya Libokoshi lya Cipangano ca Mwaami Lesa.

⁸ Ingayi bushiku bwakaboolaawo Mose ndyaakenjila MuTente, wakabona nkoli yakwe Aloni, iyo yakalinga kwiimikanina mukowa wa bene Lefi, yasonsa. Maluba akasapuka, yakacata ashisepo shipite shiitwa ayi alimondi!

⁹ Lyalo Mose wakabwesa inkoli shoonse akuya mukubonesha bene Isilaeli. Bakabona cakacitika, mpeeke mutanjilili uli woonse wakabwesa nkoli yakwe.

¹⁰ Kuswawaawo Mwaami Lesa wakaambila Mose ayi, “Boosha nkoli yakwe Aloni kunembo lya Libokoshi lya Cipangano. Ilyeelete kubikwa ayi njakucenjesha bene Isilaeli abo beshikubukila bamatanjilili ayi balaakufwa na kutongooka kwabo kubule kumana.”

¹¹ Alakwe Mose wakacita kweelana abwakaamba Mwaami Lesa.

¹² Bene Isilaeli bakaambila Mose ayi, “Ono nditwamanaawobo soonse!

¹³ Na muntu uli woonse weenga wasenabo pafwaafwi aTente ya Cipangano ulyeelete kufwa, nkokwaamba ayi swebo soonse tuli shuumbwe sheenda!”