Sekaliya 3 - Baibo Busansulushi Bwa Libuku Ili

Mulaluki mbwaakabona mupailishi munene mucili anga nciloto

¹ Mucili anga nciloto cimwi Mwaami Lesa wakantondesha Joshuwa mupailishi munene kaaimfwi kunembo lya munjelo wa Mwaami Lesa. Kulubasu lwakwe Joshuwa kwakalinga kwiimfwi Satana uyo wakalinga kulibambite kumushinina.

² Mpeeke munjelo wa Mwaami Lesa wakaambila Satana ayi, “Mwaami Lesa aakukalalile. Ncakwiila Mwaami Lesa uyo usunishi ndabala ya Jelusalemu aakukalalile! Musankwa uyu ulibo anga ndukuni lwayokolwa mumulilo.”

³ Ono Joshuwa wakalinga kufwete shakufwala shishipite ndyaakalinga kwiimfwi kunembo lya munjelo uyo.

⁴ Mpeeke munjelo uyo wakaambila bamwi bakalinga kwiimfwi kunembo lyakwe ayi, “Amumufuule shakufwala shakwe shishipite.” Lyalo wakaambila Joshuwa ayi, “Bona ndakusha shibiibi shako, ono ntookufwalika shakufwala shamakwebo.”

⁵ Mpomunyaawo munjelo wakaambila baabo bakalinga kwiimfwi akwe ayi, “Amumufwalike cisani cakumutwi citashipite.” Mpeeke bakamufwalika cisani ceenka ico. Bakamufwalika shakufwala shipya shimwi shoonse munjelo wa Mwaami Lesa kaaimfwi apo peenka.

⁶ Kuswawaawo munjelo uyo wakaambila Joshuwa ayi,

⁷ “Mwaami Lesa Shinkusu shoonse waamba ayi, ‘Na ukanokweenda munshila shangu akucita nsheensuni, ulaakunokweendelesha Ŋanda yangu amansa shangu. Lyalo ndaakukupa musena pakati ka baanjelo aba beemfwi waawa.

⁸ “ ‘Ono kutika omupailishi munene Joshuwa pantu pomwi abapailishinyoko abo bashiite kunembo lyako. Bapailishi abo batokwiimikanina shintu shitoosa kunembo. Ndaakuleta musebenshi wangu wiitwa ayi Musampi.

⁹ Bona, libwe ndindabika kunembo lyako webo Joshuwa. Palibwe ilyo pali meenso ali osanwe aobilo. Ntootalaawo malembo pali ndilyo alimwi ndaakukusha shibiibi sha cishi cino mubushiku bomwibo.

¹⁰ Pabushiku ubo womwi awomwi pakati kanu ulaakutamba mubye kwisa mukwikala munshaashisamu sha minyansa asha nkuyu. Nebo neMwaami Lesa Shinkusu shoonse ndaamba.’ ”