Sekaliya 10 - Baibo Busansulushi Bwa Libuku Ili

Mwaami Lesa mbwaakashomesha kufuna bene Juda

¹ Anu amusenge mfula kuMwaami Lesa kumatalikilo amainsa. NguMwaami Lesa uleta makumbi alosha mfula. Ncakwiila ngoolengesha mfula yatepetepe kuloka akulengesha shishango sha muntu woonse kushiya.

² Mushibumbwabumbwa taamu lushinisho. Beshikusonda balaba ashili anga nshiloto shabubeshi alimwi balasansulula shiloto shiteshi shalushinisho. Ncakwiila baloombulusha citacite mpindu. Paceebo ceeco bantu baleengailabo anga nimbelele shitacite mweembeshi.

³ Mwaami Lesa waamba ayi, “Ono ndakalala abuumbi pabeembeshi, ee, ndaakupa mulandu bamatanjilili boonse. Nebo neMwaami Lesa Shinkusu shoonse ndaakunoolama litanga lyangu lya bene Juda. Ncakwiila ndaakubalengesha kuba anga ndiaki lya nkondo licite nkusu abuumbi.

⁴ Kubene Juda kulaakuswa libwe lya mulikonko lya ŋanda, kuli mbabo kulaakuswa mpoopo ya kutente, kuli mbabo kulaakuswa buta bwa nkondo, alimwi kuli mbabo kulaakuswa baleli boonse.

⁵ Boonse pantu pomwi balaakuba anga mbashilumamba beshinkusu abo balyatoola balwani babo kubapisha mumatipa mumikwakwa. Ceebo cakwaamba ayi nebo neMwaami Lesa ndi ambabo, balaakunoolwana akukoma balwani babo beshimaaki.

⁶ “Ndaakupa nkusu bene Juda ee, ndaakupulusha bene Isilaeli. Ndaakubanyumfwila nkumbu akubaboosha boonse. Ncakwiila balaakubabo anga nshina kubafutatilaawo kale. Nebo ndime Mwaami Lesa, Lesa wabo, ndushinisho ndaakukumbula mipailo yabo.

⁷ Bene Isilaeli balaakuba ankusu anga mbashilumamba. Balaakukondwabo anga ngumuntu walinga kunwa waini. Bamulunyungu balaakwiibaluka kukoma uko akusangalala ceebo ca sheesho Mwaami Lesa nshaakacita.

⁸ “Ndaakwiita bantu bangu akubabunganya mucishi cabo. Ncakwiila ndaakubapulusha. Balaakufula bweenka mbobakalinga kataanshi.

⁹ Nakubi kwaamba ayi ndakabapalanganishisha pakati ka mishobo imwi, kweenka kushishi shakulaale uko balaakunjibaluka. Balo abana babo balaakunoolibo boomi alimwi balaakuboola kumishaabo.

¹⁰ Ndaakubaboosha kuswa kuIjipiti akubaboosha kuswa kuAsilya. Ndaakubaleta kuGilyadi akuLebanoni alimwi ncakwiila balaakwaata uko.

¹¹ Baakwiinda mulweenge lwa mapensho abo, maaba ayoosha alaakukomwa. Ndushinisho maanshi alaamfu amuMulonga wa Nailo alaakuyuma kushika apanshi peene. Kulisumpula kwa bene Asilya kulaakumanishikwa abwalo bweendeleshi bwa bene Ijipiti bulaakwiinda.

¹² Ndaakulengesha bantu bangu kuba ankusu alimwi balaakunoonambila akunyumfwilabo ndime. Nebo neMwaami Lesa ndaamba.”