Osiya 9 - Baibo Busansulushi Bwa Libuku Ili

Osiya mbwaakaambilisha mulandu pabene Isilaeli

¹ Nobene Isilaeli, amucileeke kusangalala, ee, amucileeke kusamwa pakusekelela kwanu anga njimishobo imwi. Mwebo tamukwe kushomeka kuli Lesa wanu. Mwalyaaba kuli lesa Baali mumisena yoonse ya mucishi anga mbafuule akukondwa shili anga ngamaila amafuta a olifi isho nshemuyeeya ayi nguBaali umupa.

² Kumansa shakulupwitaawo alimwi akushilindi shakutyaninamo minyansa teshi kukaswewo shakulya shakusanina bantu. Ncakwiila mulaakubula waini upya wakunwa.

³ Mwebo nobene Isilaeli teshi mukanoocishiite mucishi ca Mwaami Lesa. Mwebo nobene Efuleemu mulaakuboolela kucishi ca Ijipiti mubusha. Mulaakuya mukunoolya shakulya shitasalalite kweelana aMilawo kuAsilya.

⁴ Teshi mukanoopawo shipo sha shakunwa kuMwaami Lesa. Ayalo milambu yanu teshi ikanoomusangalashaawo napaceyi. Kuli ndimwe milambu yanu iyo ilaakunoobabo anga ncakulya ca pamalilo. Ncakwiila boonse balyaako balaakulengeshekwa kutanoosalalite kweelana aMilawo. Cakulya canu cilaakunoolibo ca mafumo anu, kuteshi kuletwa amuŊanda ya Mwaami Lesa.

⁵ Ono na ciindi cakusekelela kwakulemeka Mwaami Lesa cashikila mwebo mulaakunoocita buyani?

⁶ Nabi nobamwi mukacice kunyonyoolwa, bene Ijipiti balaakumubunganya alimwi mulaakufukililwa kuMemfisi ndabala ya mucishi ico. Pabuboni bwanu bwa silifa palaakumena shisonsoonya. Mumisena ya maandaanu mulaakumena myuumfwa.

⁷ Ciindi cakupekwa mulandu citoosa. Ncakwiila ciindi cakubooshelwa cishole cili pafwaafwi. Ciindi ico nobene Isilaeli mulaakucibona. Mwebo mulaamba mulaluki ayi, “Ngumuluya,” mulaamba muntu ucite Mushimu wakwe Lesa ayi, “Ngumushilu.” Mulaamba boobo ceebo ca shibiibi shanu kufula alimwi aceebo cakwaamba ayi lupato lwanu ndunene.

⁸ Nobene Isilaeli bantu bakwe Lesa, Mwaami Lesa wakantuma ayi mucenjeshe. Nakubi boobo munshila shangu shoonse muliteyetemo toose. Balwani bangu balambelamina amuŊanda yakwe Lesa moonse.

⁹ Mwebo nobantu mwakepila mushibiibi bweenka mbocakalinga kuGibiya. Ono Lesa ulaakwiibaluka bubi bwanu akumupa mulandu ceebo ca shibiibi shanu isho.

Shibiibi sha bene Isilaeli amapensho akonkela

¹⁰ Mwaami Lesa waamba ayi, “Ndindakacanabo bene Isilaeli, cakaba anga nkucana munyansa utoomena muluyanga. Ndindakabona bamashali babo bakulukulu, cakaba anga nkucana nkuyu shakusoma kucisamu ca nshisho. Sombi ndibakashika kuKalundu ka Baali Peoli, bakatalika kulambila shibumbwabumbwa. Mpeeke bakatalika kunensha bunya anga mbalesa abo beenka mbobakalinga kusuni.

¹¹ Bulemu bwa bene Isilaeli bulaakuluka anga nkayuni. Nkokwaamba ayi kutumbuka, kuba amafumo, ee, kumina mate shoonse shilaakumana.

¹² Nakubi kwaamba ayi bakakushewo baana ndaakumana kubalobya boonse. Kulaakuba mapensho anene abuumbi ndaakubafutatila bantu aba!”

¹³ Mwebo noBaami baLesa, nebo mboontoobona, bana ba bene Isilaeli balaakubabo anga mbanyama batooya mukucaikwa. Bene Efuleemu abo balaakutanjilila bana babo kunkondo, sombi uko balaakuyabo mukucaikwa.

¹⁴ Ono mwebo noBaami baLesa mubape isho nshebeelete kupekwa. Mulengeshe mabumbu abo kusowa alimwi akuyumya mukupa munkolo shabo.

Koombolosha kwa Mwaami Lesa pabene Isilaeli

¹⁵ Mwaami Lesa waamba ayi, “Kubisha kwabo kwakatalikila kuGilugala. Uko nkondakatalikila kubapata. Ono ceebo ca shibiibi shabo, ndaakubatandaanya kuswa mucishi cangu. Teshi nkabasuneewo tubili. Bamatanjilili babo boonse bakangashukila.

¹⁶ Bene Isilaeli balibo anga ncisamu cacatwa bulwashi, ee, balibo anga ncisamu cayuma miyanda ico citakoonshi kucata shisepo. Nabi bakashale baana, ndaakucaya bana babo abo basunikwi.”

Mulaluki mbwaakaamba sha pabene Isilaeli

¹⁷ Lesa wangu ulaakubakaka ceebo tabakwe kumunyumfwila. Bene Isilaeli balaakuba beshikwiingooka pakati ka mishobo imwi.