Osiya 14 - Baibo Busansulushi Bwa Libuku Ili

Kusenga kwakwe Osiya kubene Isilaeli

¹ Nobene Isilaeli, amusandukile kuMwaami Lesa, Lesa wanu. Shibiibi shanu nsheshamulengesha kuwa.

² Amusandukile kuMwaami Lesa akusenga kuli nguwe ayi, “Amutulekelele shibiibi shesu shoonse. Amutambule mipailo yesu, lyalo tulaakumulumbaisha amilomo yesu.

³ Bene Asilya tabakoonshi kutupulusha. Maaki a nkondo taakoonshi kututabilila. Teshi tukaambewo tubili kusheesho shakapanga maanseesu ayi, ‘Balesa besu’ mukwiinga muli ndimwe bana banshiwa mobacana nkumbu.”

Mwaami Lesa mbwaakashomesha buumi bupya kubene Isilaeli

⁴ Mwaami Lesa waamba ayi, “Ndaakushilika bwaashu bwa bantu bangu akubasuna amoyo wangu woonse. Bukali bwangu pali mbabo bwamana.

⁵ Kubene Isilaeli ndaakuba anga nimfula mucishi citacite maanshi. Balaakusapuka anga ngamaluba. Balaakutola miyanda panshi anga ncisamu ca sida ca kuLebanoni.

⁶ Nsonseela shilaakunookula kabotu. Balaakunooboneka kabotu anga ncisamu ca maolifi. Balaakunoonunkila kabotu anga ncisamu ca sida ca kuLebanoni.

⁷ Kutabililwa balaakunookucana kuli ndime alimwi. Balaakunookula anga nshili anga ngamaila Balaakunoosapuka maluba anga ngumunyansa. Balaakunoopukite anga nguwaini wa kuLebanoni.

⁸ Bene Isilaeli teshi bakanoocibete lubasu kushibumbwabumbwa. Ndaakukumbula mipailo yabo akunoobalama. Nebo ndi anga ncisamu ca mapaini ico citaloshi matewu. Shoolwe shabo shoonse shilaswa kuli ndime.”

Maswi akweelaako

⁹ Anu musongo ngani? Ngooyo weshi akeshibe shintu ishi. Anu ucite maano akunyumfwisha shintu ngani? Ngooyo weshi akanyumfwishe shintu ishi. Nshila sha Mwaami Lesa shililuleme. Baluleme baleendela mumo, sombi baashu balawa ceebo cakusuula nshila isho.