Osiya 10 - Baibo Busansulushi Bwa Libuku Ili

¹ Bene Isilaeli bakalingabo anga ncisamu ca minyansa citookula kabotu alimwi cicatite minyansa iinji abuumbi. Bweenka buboni bwabo mbobwalinga kuya ciindaawo kufula, mbweeke ubo ashipaililo mboshakalinga kuya bufula. Bweenka cishi mbocakalinga kuya ciindaawo kusumpuka, mbweeke ubo abalo mbobakalinga kwiindaawo kubotesha mabwe abo asalalite ayo ngobakalinga kulambila.

² Bantu aba bacite myoyo yabubeshi bulya balyeelete kupekwa mulandu kweelana akubisha kwabo. Mwaami Lesa utoomwayoola shipaililo shabo akunyonyoola mabwe asalalite ayo ngobalambila.

³ Bantu aba balaakutalika kwaamba ayi, “Tatucite mwaami ceebo tatukwe kuloonda Mwaami Lesa. Ono nabi netwalinga kucite mwaami, naakwiinga watucitilawonshi?”

⁴ Balashomesha kucita shintu shiinji, kushomesha cakulumbila cakubeca akupanga shipangano shiinji shitaaku mboshibete. Mwasandula bululami kuba kutalulama alimwi kutookula anga ninsaku mumuunda wakashabwa.

⁵ Bantu bekala mundabala ya Samaliya baliloondete, alimwi balaakulila ceebo ca cibumbwabumbwa ca mucende mwaana kuBetelo. Bantu balaakulila pantu pomwi abapailishi abo basebensela cibumbwabumbwa ico. Balaakulila caakufuulwa bulemu bwa ncico bwa golodi.

⁶ Cilaakutolwa kucishi ca Asilya ayi cikabe cipo kumwaami munene wa cishi ico. Bene Efuleemu balaakusebaana bene Isilaeli balaakunyumfwa nsoni ceebo cakulambila cibumbwabumbwa ico.

⁷ Mwaami wa bene Samaliya ulaakutolwa anga nkapampaansha peculu lya maanshi.

⁸ Misena yakulambililaako ya patulundu ya kuAfeni, ilaakunyonyoolwa ceebo cakulengesha bene Isilaeli kubisha. Myuumfwa ashisonsoonya shilaakumena akufwekelesha shipaililo sha njiyo. Bantu balaakutalika kwaambila tulundu tunene ayi, “Amutuwiite,” alimwi atulundu tuniini ayi, “Amutufwekelele.”

Mwaami Lesa mbwaakaambilisha bupingushi bwakwe pabene Isilaeli

⁹ Mwaami Lesa waamba ayi, “Bene Isilaeli tabakwe kucilekaawo kubisha kuswa kuciindi ca Gibiya. Aboobo nkondo ilaakubapolela alimwi balaakukomwa kuGibiya kweenka uko.

¹⁰ Ndaakusuna, ndaakubapa mulandu. Mishobo ilaakulibungabunga mukulwana mbabo. Balaakutolwa mubusha ceebo ca shibiibi shabo shiinji.

¹¹ Bene Efuleemu bakalinga anga nimpwishi itambite iyo isunishi kulupula shili anga ngamaila. Sombi bulya ndaakubakobeka lijoko munshingo shabo shibotu kwaamba ayi basebense ncito iyumu. Bene Juda balyeelete kushaba abalo bene Isilaeli balyeelete kulima.

¹² Nebo ndakaamba ayi, ‘Amulishangile bululami, mukatebule shisepo sha lusuno lutamaani. Amulime myuunda yanu itana kushindwa ceebo cino nciindi cakusandukila kuli ndime neMwaami Lesa. Amunyandoole kushikila nkatiile bululami pali ndimwe.’

¹³ Sombi mwebo mwakashanga bubi akutebula bubi. Mwakalya shisepo sha bubeshi bwanu. “Ono ceebo cakucinka manungo munkusu shanu alimwi amubashilumamba banu baanji,

¹⁴ nkondo ilaakwisa pali ndimwe shiyubilo shanu shoonse shilaakunyonyoolwa. Cilaakubabo anga mbushiku mwaami Shalimani ndyaakanyonyoola ndabala inene ya Beti Abelo muciindi ca nkondo akupwayoola baana abamanyinawabo ayi bafwe.

¹⁵ Ico nceshi cikacitike kuli ndimwe nobene Betelo mukwiinga bubi bwanu mbunene abuumbi. Nkondo yaakutalikabo, mwaami wa bene Isilaeli ulaakunyonyoolwa cakumaninina.”