Neyemiya 5 - Baibo Busansulushi Bwa Libuku Ili

Neyemiya mbwaakacafwa bakandu

¹ Ono ndipakeenda ciindi, bantu baanji, basankwa abanakashi, bakatalika kutongookela baJudanyinaabo.

² Bamwi bakalinga kwaamba ayi, “Tulicite bana baanji, aboobo tulisuni shili anga ngamaila shakunoolya kwaamba ayi tutafwi kunsala.”

³ Abamwi bakalinga kwaamba ayi, “Bantu bakatucatila myuunda ya shishango shimwi, myuunda yesu ya minyansa amaandeesu ceebo ca shili anga ngamaila nshetwakakweleta kuli mbabo kwaamba ayi tutafwi kunsala.”

⁴ Bamwi abalo bakaamba ayi, “Twakacita kukweleta maali kwaamba ayi tulipile musonko kumwaami wa myuunda ya shishango shimwi aya minyansa.

⁵ Swebo abaJuda bamwi boonse tuli bulowa bomwi. Bana besu balyeelenebo abana babo, nakubi boobo tuloolisha busha bana besu. Ncakwiila bana besu bamwi banakashi bakoolwa kale busha. Sombi tatucite lucafwo mukwiinga myuunda yesu yoonse ili mumaansa a bantu bamwi.”

⁶ Ono ndindakanyumfwa matongooshi akulilaana kwabo, ndakakalala abuumbi.

⁷ Ndindakamana kuyeeya pamakani aya, ndakaambila bamatanjilili alimwi abacinenenene abo ayi, “Mwebo mutoolyatilila baJudanyinaanu.” Mpomunyaawo ndakabunganya bantu baanji kwaamba ayi cikani ici bacibandike.

⁸ Lyalo ndakabaambila ayi, “Swebo twakeelesha kulubula bamakwabesu baJuda abo bakoolishikwa busha kubaswamashi bakunsengwe. Ono mwebo mutokakatisha baJudanyinaanu kulyuulisha kuli ndimwe!” Bamatanjilili bakoomunabo tontolo mukwiinga bakabula maswi akukumbula.

⁹ Mpomunyaawo ndakatolelela akwaamba ayi, “Ncemutoocita ncibiibi. Sa tamweelete kuloonda Lesa wesu akucita shiluleme kwaamba ayi mutakacoboolwi kubaswamashi bakunsengwe balwani besu?

¹⁰ Nebo, mbondakalinga kusebensaabo abasebenshi bangu, twakasumina kunoobakweletesha maali ashili anga ngamaila. Ono atucileeke kubasesa shikwelete isho.

¹¹ Anu bulya bweenka amubaboosheshe myuunda yabo ya shishango shimwi, ya minyansa, ya maolifi alimwi amaandaabo. Mubaboosheshe ashinyona mucila nshimwakalinga kubwesa kuli mbabo.”

¹² Lyalo bamatanjilili bakakumbula ayi, “Tulaakubabooshesha alimwi teshi tukabwese cintu cimwi cakwiilikaawo kuli mbabo. Tutoocita bweenka mbomwaamba.” Mpomunyaawo ndakeeta bapailishi kwaamba ayi bamatanjilili abacinenenene bashomeshe cakulumbila kunembo lyabo kucita bweenka mbuli mbobakashomesha.

¹³ Mpeeke ndakafutula nkomwe shangu akwaamba ayi, “Munshila yeenka iyi muntu uli woonse uyo weshi akabule kucita kweelana ambwaashomesha, Lesa mbweshi akacite kuli nguwe. Ulaakumunyaya maandaanu ashintu shoonse nshemucite alimwi ulaakumushiya maansaabo.” Bantu boonse bakakumbula ayi, “Ameni!” Mpeeke bakalumbaisha Mwaami Lesa akucita kweelana ambobakashomesha.

Kutalisuna kwakwe Neyemiya

¹⁴ Anu kuswabo ndindakasalwa kuba mweendeleshi wabo mucishi ca Juda, nkokwaamba ayi kuswa mumwaaka wamakumi obilo kushika mumwaaka wamakumi otatwe amyaaka yobilo wa bwaami bwakwe Atasakisesi, nebo abamakwesu tatukwe kulyaawo shakulya isho sheelete kulya mweendeleshi.

¹⁵ Beendeleshi bakataanguna kulela nebo kaantana kubaawo bakalinga kulemya bantu. Bakalinga kubasesa maali a silifa ali 40 pabushiku abushiku a cakulya awaini. Abalo basebenshi babo bakalinga kulyatilila bantu. Sombi nebo nshindakalinga kucita boobo mukwiinga ndaloonda Lesa.

¹⁶ Ndakasebensa ankusu shangu shoonse mumulimo wakuyakulula lubumbu ulo alimwi nshikwe kubaawo abuboni. Muntu woonse wakalinga kunsebensela wakasenkana pantu pomwi anebo mukucita mulimo uyo.

¹⁷ Ndakalinga kulya abantu bali 150, baJuda abamatanjilili babo, pantu pomwi abaabo bakalinga kwisa kuli ndiswe kuswa mushishi shimwi shakalinga kushingulukite.

¹⁸ Bushiku abushiku ndakalinga kupa bantu abo musune womwi, mbelele shibotu shiindaawo shosanwe ayomwi alimwi ankuuku shiinji. Ndakalinga kubapa awaini upya lyoonse na peendabo nshiku likumi. Nakubi boobo nshikwe kwaamba ayi banoompa shakulya sheelete kupekwa mweendeleshi mukwiinga ndakalinga kwishi ayi ico inga calengesha mukuli bantu ngobakalinga kucite kwiindaawo kulema.

¹⁹ NobaLesa bangu, amwiibaluke shintu nshendakacitila bantu aba akumpa shoolwe shiinji.