Neyemiya 3 - Baibo Busansulushi Bwa Libuku Ili

Bantu mbobakayakulula lubumbu lwa Jelusalemu

¹ Lyalo Eliyashibu mupailishi munene abapailishinyina bamwi bakatalika mulimo. Bakayakulula Mwinjililo wa Mbelele. Bakausalasha akwiimika shisasa mumisena yeelete. Bakayakulula akusalasha lubumbu kushikila akuŊanda ilaamfu ya Mwaanda alimwi aŊanda ilaamfu ya Ananelo.

² Bantu ba kuJeliko bakayakulula lubumbu pafwaafwi ambabo. Sakuli mwanaakwe Imuli alakwe wakayakulula cipansha ca lubumbu cakakonkelaawo.

³ Bamucipani cakwe Asena bakayakulula Mwinjililo wa Nswi. Bakabika shisamu sha nguwo, shisasa, shakupingilaamo ampingilo mumisena ya nshisho.

⁴ Melemoti mwanaakwe Uliya mwishikulu wakwe Akosi wakayakulula cipansha ca lubumbu cakakonkelaawo. Meshulamu mwanaakwe Belekiya, mwishikulu wakwe Meshesabelo wakayakulula cipansha ca lubumbu cakakonkelaawo. Sadoki mwanaakwe Bana wakayakulula cipansha ca lubumbu cakakonkelaawo.

⁵ Bantu ba kuTekoya bakayakulula cipansha ca lubumbu cakakonkelaawo. Sombi bamatanjilili ba mundabala bakakaka kusebensa milimo iyo yakabapa beshikuyeendelesha.

⁶ Joyada mwanaakwe Paseya aMeshulamu mwanaakwe Besodeya bakayakulula Mwinjililo wa Jeshana. Bakabika shisamu sha nguwo, shisasa, shakupingilaamo ampingilo mumisena ya nshisho.

⁷ Melatiya wa kuGibyoni aJadoni wa kuMelonoti, abasankwa bene Gibyoni aMisipa bakayakulula cipansha ca lubumbu cakakonkelaawo kushikila akuŋanda ya mweendeleshi wakwitala lya Mulonga wa Yufuletisi.

⁸ Usiyelo mwanaakwe Alaiya, shikufula golodi wakayakulula cipansha ca lubumbu cakakonkelaawo. Ananiya umwi shikupanga tununkila kabotu wakayakulula cipansha ca lubumbu cakakonkelaawo kushikila kuLubumbu Lunene.

⁹ Lefaya mwanaakwe Uli, mweendeleshi wa cipansha ca musa wa Jelusalemu wakayakulula cipansha ca lubumbu cakakonkelaawo.

¹⁰ Jedaya mwanaakwe Alumafu wakayakulula cipansha ca lubumbu cakakonkelaawo ico cakalinga pafwaafwi aŋanda yakwe. Atusha mwanaakwe Ashabineiya wakayakulula cipansha ca lubumbu cakakonkelaawo.

¹¹ Malukija mwanaakwe Alimu aAshubu mwanaakwe Paati Moabu bakayakulula cipansha ca lubumbu cakakonkelaawo alimwi aŊanda ilaamfu ya Citofu.

¹² Shalumu mwanaakwe Aloyeshi, mweendeleshi wa cipansha cimwi ca musa wa Jelusalemu wakayakulula cipansha ca lubumbu cakakonkelaawo. Bana bakwe banakashi bakamucafwa.

¹³ Anuni abantu ba kuSanowa bakayakulula Mwinjililo wa Cinyika. Bakabika shisamu sha nguwo, shisasa, shakupingilaamo ampingilo mumisena ya nshisho. Bakayakulula lubumbu lulaampa mamita 440 kuya mukushika kuMwinjililo wa Ntantaala.

¹⁴ Malukija mwanaakwe Lekabu, mweendeleshi wa cishi ca Beti Akelemu wakayakulula Mwinjililo wa Ntantaala. Wakabika shisamu sha nguwo, shisasa, shakupingilaamo ampingilo mumisena ya nshisho.

¹⁵ Shalumu mwanaakwe Koluwose, mweendeleshi wa cishi ca Misipa wakayakulula Mwinjililo wa Kantupu. Wakaubika ciluli akubika shisasa, shakupingilaamo ampingilo mumisena ya nshisho. KuKashiba ka Siloamu wakayakulula lubumbu pafwaafwi amuunda wa mwaami kushikila akushakuselukilaawo kuya kuNdabala inene yakwe Defedi.

¹⁶ Neyemiya mwanaakwe Asibuku, mweendeleshi wa musa wa cishi ca Beti Suli wakayakulula cipansha ca lubumbu cakakonkelaawo kushikila kucuumbwe cakwe Defedi, kukashiba alimwi akumaanda a bashilumamba.

Bene Lefi abo bakasebensa pamulimo wakuyakulula lubumbu

¹⁷ Bene Lefi aba bakayakulula shipansha shiinji sha lubumbu shakakonkelaawo. Leyumu mwanaakwe Bani wakayakulula cipansha ca lubumbu cakakonkelaawo. Ashabiya mweendeleshi wa musa wa cishi ca Keila wakayakulwitako cishi cakwe cipansha ca lubumbu cakakonkelaawo.

¹⁸ Bafayi mwanaakwe Enadadi mweendeleshi wa musa umwi wa Keila wakayakulula cipansha ca lubumbu cakakonkelaawo.

¹⁹ Esa mwanaakwe Jeshuwa, mweendeleshi wa kuMisipa, wakayakulula cipansha ca lubumbu cakakonkelaawo kunembo lyaŋanda yakulaminamo shakulwanisha kushikila apalikonko lya lubumbu.

²⁰ Baluki mwanaakwe Sabayi wakayakulula cipansha ca lubumbu cakakonkelaawo kushikila kumwinjililo wa ŋanda yakwe Eliyashibu mupailishi munene.

²¹ Melemoti mwanaakwe Uliya mwishikulu wakwe Akosi wakayakulula cipansha ca lubumbu cakakonkelaawo kuswa kumwinjililo wa ŋanda yakwe Eliyashibu kushikila ankoyakalinga kweela.

Bapailishi abo bakasebensa pamulimo wakuyakulula lubumbu

²² Bapailishi aba bakayakulula shipansha shiinji sha lubumbu shakakonkelaawo. Bapailishi bakalinga kwikala pafwaafwi andabala ya Jelusalemu bakayakulula cipansha ca lubumbu cakakonkelaawo.

²³ Benjameni aAshubu bakayakulula cipansha ca lubumbu cakakonkelaawo ico cakalinga kunembo lya maandaabo. Asaliya mwanaakwe Maseiya, mwishikulu wakwe Ananiya wakayakulula cipansha ca lubumbu cakakonkelaawo ico cakalinga kunembo lya ŋanda yakwe.

²⁴ Binuyi mwanaakwe Enadadi wakayakulula cipansha ca lubumbu cakakonkelaawo kuswa kuŋanda yakwe Asaliya kushika kulikonko lya lubumbu.

²⁵ Palali mwanaakwe Usayi wakayakulula cipansha ca lubumbu cakakonkelaawo. Wakatalikila palikonko lya lubumbu alimwi aŋanda ilaamfu yakalinga peculu lya ŋanda ya bwaami pafwaafwi alubansa lwa ŋanda ya beshikulindilila. Pedaya mwanaakwe Paloshi

²⁶ wakayakulula cipansha ca lubumbu cakakonkelaawo. Wakeela pafwaafwi aMwinjililo wa Maanshi kwicwe alimwi aŋanda ilaamfu yakulindilililaawo kuŊanda yakwe Lesa. Apo pakalinga kubambene acipansha ca ndabala inene ciitwa ayi Ofelo uko kwakalinga kwikala basebenshi ba kuŊanda yakwe Lesa.

Bantu bamwi abo bakasebensa pamulimo wakuyakulula lubumbu

²⁷ Bene Tekowa bakayakulula cipansha ca lubumbu cakakonkelaawo. Cipansha ico balo cakalinga cabili. Bakayakulula kuswa kuŋanda ilaamfu inene yakulindilililaawo kuŊanda yakwe Lesa kuya mukushika kulubumbu lwa kuOfelo.

²⁸ Likoto lya bapailishi bakayakulula cipansha ca lubumbu cakakonkelaawo kuswa kuMwinjililo wa Maaki akulanga kumatwa. Womwi awomwi wakayakulula cipansha ca kunembo lya ŋanda yakwe.

²⁹ Sadoki mwanaakwe Ima wakayakulula cipansha ca lubumbu cakakonkelaawo ico cakalinga kunembo lya ŋanda yakwe. Shemaya mwanaakwe Shekaniya uyo wakalinga kulindilila Mwinjililo wa Kwicwe wakayakulula cipansha ca lubumbu cakakonkelaawo.

³⁰ Ananiya mwanaakwe Shelemiya aAnuni mwanaakwe Salafu wasanu awomwi bakayakulula cipansha ca lubumbu cakakonkelaawo. Cipansha ico balo cakalinga cabili. Meshulamu mwanaakwe Belekiya wakayakulula cipansha ca lubumbu cakakonkelaawo ico cakalinga kunembo lya ŋanda yakwe.

³¹ Malukija wakalinga kufula golodi wakayakulula cipansha ca lubumbu cakakonkelaawo kuya mukushika kuŋanda ya basebenshi ba kuŊanda yakwe Lesa abeshimakwebo. Ŋanda iyi yakalinga kubambene aMwinjililo wa Mifukadi pafwaafwi acipinda cakalinga peculu lya likonko lya lubumbu.

³² Beshikufula golodi abeshimakwebo mbobakayakulula cipansha cakweelaako ca lubumbu. Bakatalikila pacipinda ca peculu lya likonko kuya mukushika kuMwinjililo wa Mbelele.