Mika 5 - Baibo Busansulushi Bwa Libuku Ili

¹ Nobene Jelusalemu, amubunjike bashilumamba banu, twashingulukwa a balwani. Booma muleli wa bene Isilaeli kumeenso amusako.

Lesa mbwaakashomesha muleli kuswa kuBetileemu

² Mwaami Lesa waamba ayi, “Sombi webo Betileemu Efulata, nabi uli ndabala iniini mucishi ca Juda, kuswa muli ndiwe, ndaakuleta muleli wa bene Isilaeli. Mukowa wakwe wakatalikabo kalekale, ee, kuswa kunshiku sha kumatalikilo.”

³ Mwaami Lesa ulaakusuula bene Isilaeli, kushikila muleli uyo akashalwe alimwi kushikila bamakwabo abo bali mubusha bakaboole pakati ka bene Isilaelinyinaabo.

⁴ Aakwisa, ulaakwiimikana akweembela litanga lyakwe lya mbelele munkusu sha Mwaami Lesa amubwaami bwa Mwaami Lesa, Lesa wakwe. Bantu bakwe balaakwikala kwakubula cakulisukama mukwiinga bulemu bwakwe kulaakunyumfwika pacishi coonse ca panshi.

⁵ Muleli uyo ngweshi akabaletele luumuno. Bene Asilya ndyeshi bakese mucishi cesu mukucilwana akwiinda mushiyubilo shesu shoonse, tulaakubatumina bamatanjilili besu ba bashilumamba beendaawo nkusu.

Kupulushikwa akupekwa mulandu

⁶ Bamatanjilili abo balaakukoma cishi ca bene Asilya kumupeeni. Balaakukoma acishi ca Nimulodi kunkondo. Balaakutufuna kuswa kubene Asilya paciindi baakwisa mukulwana cishi cesu, ee, baakwinjila mumanyinsa esu.

⁷ Abo beshibakacaaleewo pabamulunyungu lwakwe Jakobo, pakati ka mishobo iinji ya bantu, balaakuba anga ngumume uswa kuMwaami Lesa. Balaakuba anga nimfula yatepetepe pabwiisu mukucinka manungo muli Lesa kuteshi mumuntu, sobwe.

⁸ Abo beshibakacaaleewo pabamulunyungu lwakwe Jakobo, pakati ka mishobo iinji ya bantu, balaakuba anga ninkalamu ili pakati ka banyama bamuluundu. Balaakuba anga nkana ka nkalamu pakati ka mbelele ako kafwampila akukwamoona mbelele pakuya bweenda. Sombi taaku weenga wafuna mbelele isho.

⁹ Mwebo nobene Isilaeli, mulaakukoma balwani banu boonse. Ncakwiila balwani banu balaakunyonyoolwa boonse.

¹⁰ Mwaami Lesa ulaakwaamba ayi, “Ndaakunyonyoola maaki anu oonse akupwayoola shikoci shanu shoonse.

¹¹ Ndaakunyonyoola mandabala oonse a mucishi canu akupwayoola malinga anu oonse.

¹² Ndaakunyonyoola buloshi bwanu alimwi taaku weshi akalowe tubili.

¹³ Ndaakunyonyoola shibumbwabumbwa shanu shakubesa amabwe asalalite ngomulambila. Teshi mukaafukamineewo tubili shintu nshemwakapanga amaansaanu.

¹⁴ Ndaakushula shikoshanyo shakwe Ashela lesa mwanakashi akumwayoola mandabalaanu oonse.

¹⁵ Mubukali bwangu bunene ndaakuboosha cishole kumishobo yoonse itakwe kunyumfwila ndime.”