Mika 4 - Baibo Busansulushi Bwa Libuku Ili

Bwaami bwa luumuno mucishi coonse bwa Mwaami Lesa

¹ Munshiku shakumamanino, kalundu ka Ŋanda ya Mwaami Lesa kalaakupusha nsonga indilila tulundu tumwi toonse. Kalaakusumpulwa kwiinda tulundu tumwi toonse, lyalo mishobo yoonse ilaakuwuumukila nkuko.

² Bantu baanji balaakwisa akwaamba ayi, “Kamwisa tunooya kukalundu ka Mwaami Lesa. Lesa ulaakutwiisha nshaasuni ayi tucite kwaamba ayi tunookweenda kweelana ambwaasuni. Mukwiinga milawo yakwe ilaakuswita kuSiyoni ncakwiila maswi akwe alaakunooswa kuJelusalemu.”

³ Mwaami Lesa ulaakoombolosha mishobo akumana nkondo pakati ka bantu baanji. Mipeeni yabo balaakunoifula ayi shibe shakulimisha, aalo masumo abo ayi abe shakukwesoosha shisamu. Taaku mushobo weshi ukapililike mipeeni kuya mukulwana umwi, nabi weshi ukanooya mukwiiya shankondo.

⁴ Muntu womwi awomwi ulaakunookala muluumuno pakati ka minyansa yakwe ashisamu shakwe sha nkuyu. Ncakwiila taaku eshi akamuloondeshe. Mwaami Lesa Shinkusu shoonse mbwaakashomesha ubo.

⁵ Mushobo womwi awomwi ulaakunoolambila akunyumfwila lesa wa nguwo, sombi swebo tulaakunoolambila akunyumfwila Mwaami Lesa, Lesa wesu kwalyoonse alyoonse.

Bene Isilaeli mbweshi bakaboole kuswa mubusha

⁶ Mwaami Lesa wakaamba ayi, “Pabushiku bweenka ubo, ndaakubunganya balema. Ndaakubunganya bali mubusha ee, bantu abo mbondakalengesha kuba mubuumba.

⁷ Balema abo ndaakubalengesha kuba bantu bangu. Ncakwiila abo bakakushikwa kumishaabo, ndaakubalengesha kuba mushobo uyumu. Nebo neMwaami Lesa ndaakunoobalela paKalundu ka Siyoni, kuswa bushiku ubo tibili amuyayaya.”

⁸ Ono webo oKalundu ka Siyoni, apo Lesa mpwaalangila bantu anga ngumweembeshi. Bwaami bwako bukulukulu bulya bulaakubooshekwa mumaansaako. Ncakwiila nobene Jelusalemu bwaami bulaakupekwa kuli ndimwe alimwi.

⁹ Ono ceebonshi utoolila cakoolobesha? Sa toocite mwaami? Sa beshikukupandako maano bamana kuloba ico cakulengesha kupenga anga ngumwanakashi uli pankanta?

¹⁰ Ondabala ya Siyoni, kosalooka kubuumba bweenka mbuli mwanakashi uli pankanta mukwiinga bulya bantu bako batooswa mundabala inene akuyaka misumba muluundu mutaamu shisamu. Bantu bako balaakutolwa kuBabiloni, sombi uko balaakufunwa, ncakwiila Mwaami Lesa ulaakubalubula kuswa mumaansa a balwani babo.

¹¹ Bulya ono bamumishobo iinji babungana ayi bakulwaane. Boonse baamba ayi, “Ndabala iyi ilyeelete kunyonyoolwa, ndushinisho tutooyanda kusangalala pakubona ndabala ya Siyoni keenyonyookite.”

¹² Sombi tabeshi miyeeyo ya Mwaami Lesa, ncakwiila tabanyumfwishi muyeeyo wa wooyo ubabunganya anga ngamakunka kumusena wakulupwitaawo.

¹³ Mwaami Lesa waamba ayi, “Nobene Siyoni, amunyamuke akutalika kunyonyoola balwani banu! Ndaakumulengesha kuba ankusu anga ngumucende ucite meeca anshimbi ashoondo sha bulonse. Mulaakupwayoola mishobo ya bantu iinji. Bubile boonse mbobakasaala munkondo, mulaakububenga mumaansaangu, ee, mumaansaangu nebo neMwaami Lesa wa cishi ca panshi coonse.”