Mateyo 3 - Baibo Busansulushi Bwa Libuku Ili

Kushimikila kwakwe Joni Mubombeki

¹ Munshiku sheenka isho Joni Mubombeki wakesa muluyanga lwa muJudeya kaashimikila ayi,

² “Amusanduke kuswa kushibiibi shanu mukwiinga Bweene bwakwe Lesa buli pafwaafwi.”

³ Isaya mulaluki mukulukulu wakalinga kwaamba Joni, ndyaakaamba ayi, “Muntu umwi utokoolobesha muluyanga ayi, ‘Amubambe nshila ya Mwaami. Amumululikile nshila.’ ”

⁴ Joni wakalinga kufwala shakufwala shakapangwa abooya bwa ngamela alimwi alaamba wacipaya mubukome. Wakalinga kulyabo nsoshi abuuci.

⁵ Bantu bakaya kuli nguwe kuswa kuJelusalemu, mucishi coonse ca Judeya alimwi amishi yoonse ishingulukite Mulonga wa Joodani.

⁶ Ndibakamana kulyaambilila shibiibi shabo, wakababombeka muMulonga wa Joodani.

⁷ Ono Joni ndyaakabona baFalisi abaSaduki baanji kabesa kuli nguwe mukubombekwa, wakabaambila ayi, “Nobana ba nsoka mwebo! Ngani wamucenjesha kuloonda bukali bwakwe Lesa butoosa?

⁸ Amucite ncito shibotu shitondesha ayi mwasanduka kuswa kushibiibi shanu.

⁹ Mutanoolibeca mumyoyo yanu ayi, ‘Swebo tulicite Abulaamu ishiwesu.’ Ntoomulwiita calushinisho ayi Lesa ulakonsha kusandula mabwe kuba bamulunyungu lwakwe Abulaamu.

¹⁰ Bulya keembe kakutimbwishako shisamu kumiyanda kalibambitwe kale. Aboobo, cisamu coonse citacati shisepo shibotu, cilaakutemwa akuwaalwa mumulilo.

¹¹ Nebo ntoomubombeka amaanshi kutondesha kwaamba ayi mwasanduka kuswa kushibiibi, sombi uyo utoosa pesule lyangu uleendaawo nkusu pali ndime. Nsheeleteewo akunyamuna nsapato shakwe. Uyo lakwe ulaakumubombeka aMushimu Usalashi alimwi amulilo.

¹² Lakwe ulicite kale acakuululushishako maila. Ulaakululusha maila akwe akwaalongela mubutala. Lyalo ulaakutenta buungu boonse mumulilo utashimiki.”

Kubombekwa kwakwe Jesu

¹³ Paciindi ico, Jesu wakaswa kucishi ca Galili akushika kuMulonga wa Joodani, uko kwakalinga Joni ayi abombekwe.

¹⁴ Sombi Joni wakalinga kusuni kumukakila. Wakamwaambila ayi, “Nebo ndime njelete kubombekwa amwebo, ono mwesa buyani kuli ndime?”

¹⁵ Sombi Jesu wakamukumbula ayi, “Paciindi cino cita bweenka ubo. Na tucite boobo, nkokwaamba ayi tutoocita kuyanda kwakwe Lesa.” Mpeeke Joni alakwe wakasumina.

¹⁶ Jesu ndyaakamanabo kubombekwa wakaswa mumaanshi. Mpomunyaawo liculu lyakacaluka, lyalo wakabona Mushimu wakwe Lesa kauselukila pali nguwe anga nimpolobe.

¹⁷ Mpeeke liswi lyakanyumfwika kuswa kwiculu ayi, “Uyu ngoMwanaangu ngoonsuni. Pali nguwe ndikondetwe abuumbi.”