Mateyo 19 - Baibo Busansulushi Bwa Libuku Ili

Makani a kulekana

¹ Ono Jesu ndyaakamana kwaamba makani aya, wakaswaako kuGalili akuya mucishi ca Judeya kwitala lya Mulonga wa Joodani.

² Mpeeke bantu baanji baanji bakamukonkela. Lyalo wakabashilika kweenka uko.

³ Mpomunyaawo baFalisi bamwi bakesa kuli Jesu mukumusunka ayi, “Sa cilasuminishikwa muMilawo muntu kuleka mukaakwe paceebo cili coonse?”

⁴ Jesu wakakumbula ayi, “Sa tamuna kubelengaawo ayi kumatalikilo Lesa wakabalenga musankwa amwanakashi?

⁵ alimwi ayi, ‘Paceebo ceeco, musankwa ulaakushiya baishi abanyina akupankana amukaakwe. Lyalo bantu bobilo aba balaakuba mubili womwi.’

⁶ Nkokwaamba ayi tababete bobilo ono, sombi baba mubili womwi. Aboobo bantu abo Lesa mbwaakabika pantu pomwi, muntu ateeleshi kubapansaanya.”

⁷ Mpeeke baFalisi bakamwiipusha ayi, “Ino nceebonshi Mose ncaakaambila ayi musankwa ulyeelete kulembela mukaakwe nkalata yakumuleka, lyalo akumutanda?”

⁸ Jesu wakabakumbula ayi, “Mose wakamusuminisha kuleka bamakaanu ceebo muli beshicimpamya, sombi teshi mbocakalinga ubo kumatalikilo.

⁹ Ono ntoomulwiita ayi, muntu uli woonse uleka mukaakwe utakwe kucita bulale, akweeba umbi, wacita bulale.”

¹⁰ Lyalo bashikwiiya bakwe bakamwaambila ayi, “Anu na mbocibete ubo mucikwati, nkokwaamba ayi ncibotubo akuteeba.”

¹¹ Sombi Jesu wakabakumbula ayi, “Maswi aya taakumite kubantu boonse, sombi baabo bakapekwa kuswa kuli Lesa.

¹² Mukwiinga nkobali bantu batakoonshi kweeba mukwiinga mbobakashalwa. Nkobali abamwi batakoonshi kweeba ceebo bakacitwa boobo abantu. Nkobali bamwi alimwi abo bakakaka kweeba kwaamba ayi basebensele kabotu Lesa. Uyo weenga wacikonsha kukonkela kwiisha uku, akonkele.”

Jesu mbwaakapa coolwe baana baniini

¹³ Bamwi bantu bakaleta baana baniini kuli Jesu kwaamba ayi abacaate amaansa akubapailila. Sombi bashikwiiya bakakalalila bantu abo.

¹⁴ Mpomunyaawo Jesu wakabaambila ayi, “Amuleke baana baniini bese kuli ndime. Mutanoobakasha ceebo Bweene bwa kwiculu mbwa baabo bali mbuli baaba.”

¹⁵ Lyalo wakabacata amaansa, mpeeke wakaswaawo.

Musankwa mubile

¹⁶ Mpeeke umwi musankwa wakesa kuli Jesu akwiipusha ayi, “NoBafundishi, anu ncintunshi cibotu nceenjelete kucita kwaamba ayi nkabe abuumi butamaani?”

¹⁷ Jesu wakakumbula ayi, “Ceebonshi utoonjiipusha paceeco cili kabotu? Kulibo Womwi uli kabotu. Na ulisuni kuba abuumi butamaani, kokonkela Milawo.”

¹⁸ Lakwe wakeepusha ayi, “Njimilawonshi?” Jesu wakamukumbula ayi, “Utacaayi, utaciti bulale, uteepi, utapi bukamboni bwakubeca,

¹⁹ lemeka baiso abanyoko, alimwi usune mubyo bweenka mboolisuni omwiine.”

²⁰ Musankwa uyo wakakumbula ayi, “Milawo yoonse iyi ndaikonkela. Ino cimwi cacalaako nciinshi?”

²¹ Jesu wakamwaambila ayi, “Na ulisuni kuba muntu ululeme, koya ukoolishe shintu shoonse nshoocite. Maali ngweshi ucaneemo ukaabile bakandu, lyalo ulaakuba abuboni kwiculu. Na umanishe kucita boobo, ndyeshi use unkonkele.”

²² Musankwa uyo ndyaakanyumfwa boobo, wakaswaawo kaaungumene ceebo wakalinga mubile abuumbi.

²³ Lyalo Jesu wakaambila bashikwiiya bakwe ayi, “Ntoomulwiita calushinisho ayi, nciyumu abuumbi muntu mubile kwinjila muBweene bwa kwiculu.

²⁴ Ntoobooshaawo alimwi ayi, ncuubu ngamela kupula muliinso lya nyeleti kwiinda muntu mubile kwinjila muBweene bwakwe Lesa.”

²⁵ Bashikwiiya bakwe ndibakanyumfwa makani aya, bakakankamana abuumbi, mpeeke bakeepusha ayi, “Nkokwaamba ayi ngani eshi akapulushikwe?”

²⁶ Jesu wakabalanga akubaambila ayi, “Kubantu ici inga tacicitikiiwo, sombi kuli Lesa inga cacitika mukwiinga shoonse shintu shilakonsheka kuli nguwe.”

²⁷ Lyalo Pita wakakumbula ayi, “Amubone, swebo twakashiya shoonse akumukonkela. Ino swebo tulaakupekwanshi?”

²⁸ Jesu wakabaambila ayi, “Ntoomulwiita calushinisho ayi shintu shoonse ndyeshi shikalengwe cipya, MwanaaMuntu ndyeshi akekale pacuuna cakwe ca bulemu, amwebo nomukonkela ndime, mulaakwikala pashuuna shili likumi ashobilo. Mulaakoombolosha mishobo ili likumi ayobilo ya muIsilaeli.

²⁹ Uyo woonse wakashiya maanda, banandumi shakwe, banankashi shakwe, baishi, banyina, baana nabi myuunda ceebo ca liina lyangu, ulaakutambula shiinji abuumbi kwiinda sheesho nshaakashiya alimwi ulaakuba abuumi butamaani.

³⁰ Sombi baanji abo bataanshi balaakuba bacaalishi, abalo bacaalishi balakuba bataanshi.