Mateyo 13 - Baibo Busansulushi Bwa Libuku Ili

Cikoshanyo ca mushangi

¹ Pabushiku bweenka ubo, Jesu wakaswa muŋanda akuya mukwikala muloombe lwa lweenge.

² Likoto lya bantu baanji lyakamubunganina, lyalo wakenjila mubwaato wekala, sombi bantu balo boonse bakeemikana muloombe lwa lweenge petala.

³ Jesu wakabalwiita shintu shiinji mushikoshanyo. Wakaamba ayi, “Kwakalinga muntu umwi wakaya mukushanga mbuto.

⁴ Ono ndyaakalinga kushanga, shimwi mbuto shakalokela munshila abalo bayuni bakesa bashilya.

⁵ Shimwi shakalokela pabulongo bwa mabwe. Imbuto ishi shakafwambaana kumena ceebo bulongo bwakalingabo peculu.

⁶ Sombi lumwi ndilwakabala, busonga boonse bwakapya akuyuma, ceebo miyanda taikwe kuya bunene panshi.

⁷ Imbuto shimwi shakalokela pamyuumfwa, ayalo myuumfwa ndiyakakula yakashitilisha busonga.

⁸ Ono mbuto shimwi shakalokela pabulongo bubotu akucata shakacata. Shimwi shakacata mwaanda, shimwi makumi osanwe alyomwi ashalo shimwi makumi otatwe.”

⁹ Lyalo Jesu wakabaambila ayi, “Uyo ucite matwi aanyumfwe!”

Ceebo cinene ca shikoshanyo

¹⁰ Mpomunyaawo bashikwiiya bakwe bakamwiipusha ayi, “Nceebonshi ncemubalwiitila mushikoshanyo bantu?”

¹¹ Jesu wakabakumbula ayi, “Mwebo mwakapekwa lushibo lwa shintu shishisitwe sha Bweene bwa kwiculu, sombi balo tabakwe kupekwa.

¹² Mukwiinga uyo ucite kale ulaakubikilwaawo, aboobo ulaakuba ashiinji. Sombi ucite kaniini ulaakunyaikwa nabi kaako koonse nkaacite.

¹³ Ndabalwiita mushikoshanyo ceebo nabi balangilisha, sombi tababoneshi alimwi nabi balakutika, sombi tabanyumfwi nabi kunyumfwishisha.

¹⁴ Cacitika muli mbabo kweelana ambwaakaamba Isaya mulaluki mukulukulu ayi, ‘Ncakwiila mulaakukutikisha sombi teshi mukanyumfwishishe, mulaakulangilishisha sombi teshi mukabonesheshe.

¹⁵ Mukwiinga bantu aba mbeshicimpamya, alimwi bashinka mumatwi akucala meenso abo. Nakuteshi boobo naakwiinga kababonesha akunyumfwishisha akuba amyoyo yakusuna kukutika, kwaamba ayi basanduke kuswa kushibiibi shabo, ayi nebo neLesa mbashilike.’

¹⁶ “Sombi mwebo mulicite coolwe mukwiinga meenso anu alabona, aalo matwi anu alanyumfwa.

¹⁷ Ntoomulwiita calushinisho ayi balaluki bakulukulu baanji, alimwi abantu baanji baluleme, bakalinga kuyandishisha kubona sheeshi nshemutoobona, sombi tabakwe kushibona. Bakalinga kuyandishisha kunyumfwa shintu nshemunyumfwa, sombi tabakwe kushinyumfwa.

Jesu mbwaakasansulula cikoshanyo ca mushangi

¹⁸ “Ono amunyumfwe mbocaamba cikoshanyo ca mushangi.

¹⁹ Na bantu banyumfwa maswi a Bweene bwakwe Lesa cakubula kwaanyumfwisha, alakwe Satana ulesa wakushamo sheesho shashangwa mumyoyo yabo. Bantu bali boobo nshembuto shakalokela munshila.

²⁰ Imbuto isho shakalokela pabulongo bwa mabwe mbantu abo bacita na banyumfwa maswi akwe Lesa, baleendililabo kwaatambula cakusangalala.

²¹ Sombi maswi taanjili cankusu mumyoyo yabo, aboobo taakaali ciindi. Makatasho nabi mapensho na abapolela ceebo ca maswi akwe Lesa, balatentuka kufwambaana.

²² Ono isho shakalokela pamyuumfwa mbantu abo banyumfwa maswi akwe Lesa, sombi shintu sha mucishi ca panshi, akusuna bubile, shilafulunganya maswi akwe Lesa, aboobo tabacati shisepo.

²³ Sombi mbuto shakalokela mubulongo bubotu mbantu abo banyumfwa maswi akwe Lesa akwaacita. Aboobo balacata shisepo, bamwi mwaanda, bamwi makumi osanwe alyomwi abalo bamwi makumi otatwe.”

Cikoshanyo ca maila amisonde

²⁴ Jesu wakabaambila acimwi cikoshanyo ayi, “Bweene bwa kwiculu buli anga ngumuntu wakashanga mbuto ibotu ya maila mumuunda wakwe.

²⁵ Sombi mashiku bantu boonse ndibakalinga kulete, mulwani wakwe wakesa mukushanga misonde mumuunda wa maila, ndyaakamanisha wakaya.

²⁶ Ono maila alya ndyaakakula akutalika kusapuka ayalo misonde yakaboneka.

²⁷ Basebenshi ba mwine muunda bakaya mukumwaambila ayi, ‘Nkambo te mwakashangabo maila eenka mumuunda wanu? Ino misonde yaswa kuli alimwi?’

²⁸ Lakwe wakabakumbula ayi, ‘Ngumulwani wangu wacita shoonse ishi.’ Mpeeke basebenshi bakamwiipusha ayi, ‘Sa mulisuni ayi tukainonkole misonde?’

²⁹ Sombi lakwe wakabakumbula ayi, ‘Tau ceebo pakunonkola inga mwanonkweta kumwi amaila.

³⁰ Amwileeke misonde amaila shoonse shikulile pantu pomwi kushikila ciindi cakutebula. Lyalo ndaakwaambila beshikutebula ayi bakataangune kubunjika misonde akuyaanga milemile ayi itentwe. Lyalo ndyeshi bakacese maila akwaabika mubutala.’ ”

Cikoshanyo ca mbuto ya masitadi

³¹ Jesu wakabalwiita acimwi cikoshanyo ayi, “Bweene bwa kwiculu bulikoshenye aluseke lwa masitadi ulo muntu ndwaashanga mumuunda wakwe.

³² Nabi nduseke luniini kwiinda nseke shoonse, sombi na lwamena cilaba cisamu cinene kwiinda pambewu shoonse. Lyalo bayuni balesa akupanga shinswa mumisampi ya ncico.”

Cikoshanyo ca cimena

³³ Jesu alimwi wakabalwiita acimwi cikoshanyo ayi, “Bweene bwa kwiculu buli anga ncimena ciniini mwanakashi ncaakasenkanya mushikopo shotatwe sha fulaulo, kushikila woonse wafutumuka.”

Jesu ncaakalinga kwaambila mushikoshanyo

³⁴ Jesu wakaambila bantu shoonse ishi mushikoshanyo. Taaku cintu nabi comwi ncaatakwe kwaamba mucikoshanyo.

³⁵ Shoonse ishi shakacitika kweelana ambwaakaamba mulaluki mukulukulu ayi, “Ndaakubaambila mushikoshanyo, ndaakubayubulwita shintu shakalinga kushisitwe kuswa kumatalikilo a cishi ca panshi.”

Jesu mbwaakapandulula cikoshanyo ca misonde amaila

³⁶ Mpomunyaawo Jesu wakashiya bantu baanji balya akwinjila muŋanda. Mpeeke bashikwiiya bakwe bakaya mukumusenga ayi, “Amutupandulwite cikoshanyo ca nsaku ya misonde mumuunda wa maila.”

³⁷ Jesu wakabakumbula ayi, “Uyo wakashanga maila nguMwanaaMuntu.

³⁸ Muunda uyo ncishi ca panshi. Maila mbantu ba muBweene bwa kwiculu, ayalo misonde mbantu ba Mubiibi.

³⁹ Ono mulwani wakashanga misonde nguMubiibi. Sombi ciindi ca kutebula ngamamanino a cishi ca panshi alimwi beshikutebula mbaanjelo.

⁴⁰ Bweenka mbuli nsaku ya misonde mboibunganishikwa akutentwa mumulilo, akumamanino a cishi ca panshi bweenka ubo mbweshi kukabe.

⁴¹ MwanaaMuntu ulaakutuma baanjelo bakwe ayi bakakuushe bantu babisha babyabo abamucita shibi boonse muBweene bwakwe

⁴² akubawaala mumulilo utamaani. Mwalo umo mweshi bakanoolila akulumanya meeno.

⁴³ Lyalo baluleme balaakubala mbuli lisuba muBweene bwakwe Ishiwabo. Uyo ucite matwi anyumfwe!”

Cikoshanyo ca bubile bushisitwe

⁴⁴ “Bweene bwa kwiculu bulikoshenye abuboni bwakalinga kushisitwe mumuunda, ubo muntu mbwaakeetukila akubushisa pambi. Ono mukusangalala wakaya mukuulisha shintu shoonse nshaakalinga kucite, akuula muunda uyo.

Cikoshanyo ca libwe lya makwebo

⁴⁵ “Bweene bwa kwiculu bulikoshenye amusambashi uyandoola mabwe abotu amakwebo.

⁴⁶ Na wacana libwe libotu abuumbi, ulaya mukuulisha shintu shakwe shoonse akulyuula.

Cikoshanyo ca koombe

⁴⁷ “Bweene bwa kwiculu bulikoshenye akoombe kawaalwa mulweenge, akucata nswi shipusenepusene.

⁴⁸ Ono ndikakesula bakakakwelela kwitala. Lyalo bakekala panshi akutalika kusala nswi shibotu nshebakalinga kubika mumitaanga, akusowa shibiibi.

⁴⁹ Bweenka ubo mbweshi cikabe akumamanino a cishi ca panshi. Baanjelo balaakwisa mukupansaanya babiibi kuswa kubaluleme,

⁵⁰ akubawaala mumulilo utamaani umo mweshi bakanoolila akulumanya meeno.”

Shintu shalushinisho shipya ashikulukulu

⁵¹ Jesu wakeepusha bashikwiiya bakwe ayi, “Sa mwashinyumfwisha shoonse ishi?” Balo bakakumbula ayi, “Ee, twanyuumfwa.”

⁵² Lyalo Jesu wakabakumbula ayi, “Paceebo ceeco mufundishi woonse wa Milawo uyo wakeeya maswi a Bweene bwa kwiculu, uli anga ngumwine ŋanda, uyo ukusha shintu shipya ashikulukulu muŋanda yakusungilaamo shintu.”

Jesu mbwaakakakwa kuNasaleti

⁵³ Jesu ndyaakamanisha kubalwiita shikoshanyo ishi, wakaswaako uko

⁵⁴ akuya kundabala ya kumishaabo. Ndyaakashika wakeeisha bantu mucoonde ca baJuda cakwaamba ayi boonse bakakankamana akutalika kwaamba ayi, “Ino uyu muntu wakakusha kuli busongo ubu ankusu ishi shakucita shaankamiko?

⁵⁵ Sa uyu teshi ngomwaana wa mubeseshi ulya? Sa te baMaliya mbobanyina? Sa te banandumi shakwe nguJemusi, Josefu, Simoni aJudasi?

⁵⁶ Abalo banankashi shakwe te tuli abo kweenka kuno? Ino lakwe shoonse ishi wakashicana kuli?”

⁵⁷ Aboobo bakamusuula. Sombi Jesu wakabaambila ayi, “Mulaluki ulalemekwa kuli koonse kukushakobo kumishaabo, akuŋanda yakwe mwiine.”

⁵⁸ Aboobo Jesu taakwe kucitawo shaankamiko shiinji uko ceebo tabakwe kumushoma.